បាល់ទាត់៖ ក្រុមបាល់ទាត់ជំរើសជាតិអ៊ុយក្រែនបានចាប់ផ្តើមការត្រៀមលក្ខណៈរបស់ខ្លួន មុនការប្រកួតជាមួយក្រុមស្កុតឡេននៃវគ្គ Play-Off រកកៅអី World Cup ជាមួយនឹងការប្រកួតមិត្តភាពកំដៅសាច់ដុំមួយជាមួយក្រុមអាល្លឺម៉ង់ Borussia Monchengladbach។
នេះជាការប្រកួតដំបូងរបស់ក្រុមជំរើសជាតិអ៊ុយក្រែន តាំងពីសង្គ្រាមរបស់រុស្ស៊ីមកលើទឹកដីអ៊ុយក្រែន ដែលធ្វើឱ្យ សកម្មភាពកីឡាក្នុងប្រទេសទាំងស្រុងត្រូវបានផ្អាក។ អ៊ុយក្រែនបានយកឈ្នះលើ Monchengladbach ២-១ ក្នុងការប្រកួតមិត្តភាពនេះដែលមានអ្នកចូលទស្សនាជាង ២ម៉ឺននាក់ ដោយថវិកាបានមកពីការលក់សំបុត្រចូលទស្សនាការប្រកួតនេះ ត្រូវបានបរិច្ចាគដល់ជនរងគ្រោះដោយសារសង្គ្រាម ខណៈអ្នកទស្សនាជាជនអ៊ុយក្រែនអាចចូលទស្សនាបានដោយឥតគិតថ្លៃ។ អ៊ុយក្រែននឹងត្រូវជួបជាមួយស្កុតឡេននៅថ្ងៃទី១ ខែមិថុនានៃវគ្គ Play-Off ពាក់កណ្តាលផ្តាច់ព្រ័ត្រ។
កាលវិភាគដំបូង ក្រុមទាំងពីរត្រូវជួបគ្នានៅខែមីនា ថ្ងៃទី២៤ តែក៏ត្រូវបានពន្យាពេលដោយសារសង្គ្រាម។ ក្រុមដែលឈ្នះពីការប្រកួតនេះនឹងបន្តជួបជាមួយវែលនៅវគ្គផ្តាច់ព្រ័ត្រនៅថ្ងៃទី៥ ខែមិថុនាដើម្បីយកកៅអីចុងក្រោយ។ រំលឹកថា ក្រុមជំរើសជាតិអ៊ុយក្រែនបានប្រកាសលក្ខណៈអន្តរជាតិចុងក្រោយបំផុតតាំងពីខែវិច្ឆិកា នៅពេលយកឈ្នះបូស្នៀ ២-០ ដើម្បីធានាបានកៅអីវគ្គ Play-Off នេះ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
