ភ្នំពេញ៖ សេចក្តីព្រាងច្បាប់ស្តីពីសុវត្ថិភាពម្ហូបអាហារ ត្រូវបានរដ្ឋសភាអនុម័តគាំទ្រទាំងស្រុង នៅក្នុងសម័យប្រជុំពេញអង្គរដ្ឋសភាលើកទី៧ នីតិកាលទី៦ កាលពីព្រឹកថ្ងៃទី១១ ខែឧសភា ឆ្នាំ២០២២នេះ។ សេចក្តីព្រាងច្បាប់នេះ នឹងជំរុញផលិតផលម្ហូបអាហារត្រូវបានផលិត កែច្នៃ វេចខ្ចប់ និងចែកចាយ ផ្អែកទៅតាមស្តង់ដារ និងបទប្បញ្ញត្តិបច្ចេកទេសជាតិ។

ប្រភពក្រសួងពាណិជ្ជកម្ម បានឲ្យទូរទស្សន៍ព័ត៌មាន ប៊ីធីវី ដឹងថា ក្នុងឱកាសដឹកនាំ​គណៈប្រតិភូ​ក្រសួង​ពាណិជ្ជកម្ម ចូលរួមការពារសេចក្តីព្រាងច្បាប់ស្តីពីសុវត្ថិភាព​ម្ហូបអាហារ​ ឯកឧត្តម អង្គ វង្សវឌ្ឍានា ទេសរដ្ឋមន្រ្តីទទួលបន្ទុកបេសកកម្មពិសេស ​តំណាងរាជរដ្ឋាភិបាល បានជម្រាបជូន​អង្គប្រជុំថា សេចក្ដីព្រាងច្បាប់នេះ ​ពិតមានសារៈសំខាន់ខ្លាំងណាស់សម្រាប់កម្ពុជា ព្រោះច្បាប់នេះ​នឹង​ចូលរួមគាំពារដល់សុខសុវត្ថិភាពផ្នែកម្ហូបអាហារ​ជូនប្រជាពលរដ្ឋគ្រប់រូប ដោយធានា​បាន​នូវ​ការពារសុខភាព​ និង​អាយុជីវិត​ តាមរយៈការការពារការ​ទទួលទាន​អាហារ​គ្មាន​សុវត្ថិភាព ដែល​បណ្ដាល​ឱ្យកើតមានជំងឺផ្សេងៗ​ ព្រមទាំង​អត្ថប្រយោជន៍​សំខាន់ៗ​មួយចំនួនទៀត ដែលកម្ពុជា​អាច​ទទួលបាន នៅពេលដែលសេចក្ដីព្រាងច្បាប់​នេះ​ចូលជាធរមានក្នុងពេលឆាប់ៗខាងមុខ។

ឯកឧត្តម ទេសរដ្ឋមន្រ្តី បានលើកឡើងបន្តថា អត្ថប្រយោជន៍ ​និងចំណុចសំខាន់ៗជាច្រើន​របស់​សេចក្ដី​ព្រាងច្បាប់នេះ ​មានដូចជា៖ ការបង្កើតឱ្យយន្តការទទួលខុសត្រូវរបស់ក្រសួង និង​ស្ថាប័ន​ជាតិ ​ដើម្បី​គ្រប់គ្រង​ប្រតិបត្តិករអាជីវកម្មម្ហូបអាហារ ​នៅគ្រប់ដំណាក់កាលនៃខ្សែចង្វាក់​ផលិតកម្ម ចាប់ពី​កសិដ្ឋាន​ផលិតរហូតដល់តុអាហារ ​និងធានាថាផលិតផលម្ហូបអាហារទាំងអស់ ដែល​ចរាចរ​នៅក្នុងព្រះរាជាណាចក្រកម្ពុជា ​មានគុណភាព សុវត្ថិភាព និងអនាម័យល្អ សម្រាប់ប្រជាពលរដ្ឋ​គ្រប់ៗរូប​ និងការកំណត់​គោលការណ៍ជាមូលដ្ឋាន ​ដើម្បីជំរុញផលិតផលម្ហូបអាហារត្រូវបានផលិត កែច្នៃ ​វេចខ្ចប់ និងចែកចាយ ផ្អែកទៅតាមស្តង់ដារ និងបទប្បញ្ញត្តិបច្ចេកទេសជាតិ សំដៅធានា​ឱ្យបាននូវការការពារអាយុជីវិត និងសុខភាពប្រជាពលរដ្ឋ និងជំរុញប្រសិទ្ធភាពខ្ពស់ក្នុង​ការ​អនុវត្ត​ពាណិជ្ជកម្ម​ស្មើភាពសំដៅការពារផលប្រយោជន៍អ្នកប្រើប្រាស់ រួមចំណែកយ៉ាងសំខាន់ក្នុង​ការកាត់បន្ថយភាពក្រីក្ររបស់ប្រជាពលរដ្ឋ-ល-។

ក្រសួងពាណិជ្ជកម្ម បានបញ្ជាក់ថា ជាលទ្ធផល បន្ទាប់អង្គសភាបានពិភាក្សា និងស្ដាប់ការបក​ស្រាយ​ពីតំណាងរាជរដ្ឋាភិបាលរួចមក ​រដ្ឋសភាបានគាំទ្រទាំងស្រុងចំពោះសេចក្តី​ព្រាងច្បាប់​ស្តីពី​សុវត្ថិភាពម្ហូបអាហារ និងបាន​សម្តែងការកោតសរសើរចំពោះក្រុមការងារតាក់តែង​សេចក្តីព្រាង​ច្បាប់នេះ ដែលដឹកនាំដោយ ឯកឧត្តម ប៉ាន សូរស័ក្ដិ រដ្ឋមន្រ្តីក្រសួងពាណិជ្ជកម្ម ក្នុងការខិតខំប្រឹង​ប្រែង​លើការរៀបចំ​តាក់តែង​សេចក្ដីព្រាងច្បាប់នេះ​ប្រកបដោយជោគជ័យ៕អត្ថបទ៖ រ៉ាវី