ភ្នំពេញ៖ ក្រុមការងារគ្រូពេទ្យប្រចាំការិយាល័យស្រុកប្រតិបតិ្តពោធិ៍សែនជ័យ នៃមនី្ទរសុខាភិបាលរាជធានីភ្នំពេញ បានបន្តចុះចាក់វ៉ាក់សាំងបង្ការជំងឺកូវីដ-១៩ ដូសមូលដ្ឋាន និងដូសជំរុញទី៣ និងដូសជំរុញទី៤ទាំងយប់ ជូនបងប្អូន ពលរដ្ឋ កម្មករ កម្មការិនី នៅតំបន់ងាយរងគ្រោះ អតីតតំបន់ក្រហម ក្នុងអន្តរកាលកូវីដ-១៩ គោលដៅ ស្ថិតក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ។

បើតាមលោក ប៉ាង លីដា អភិបាលរងខណ្ឌពោធិ៍សែនជ័យ ប្រាប់BTV ព័ត៌មាន នាយប់ថ្ងៃទី១១ ខែឧសភា ឆ្នាំ២០២២ថា រដ្ឋបាលខណ្ឌ បានសហការជាមួយក្រុមការងារគ្រូពេទ្យប្រចាំការិយាល័យ​ស្រុកប្រតិបតិ្តពោធិ៍សែនជ័យ រៀបចំយកទីតាំងគោលដៅ ដែលសំបូរទៅដោយរោងចក្រ និង​មាន​ប្រជាពលរដ្ឋរស់នៅប្រមូលផ្តុំគ្នាច្រើនម៉ឺននាក់ ដើម្បីផ្តល់វ៉ាក់សាំងជូនបងប្អូនប្រជាពលរដ្ឋ កម្មករ កម្មការិនី ចាប់ពីម៉ោង៦ល្ងាច រហូតដល់ម៉ោង៩យប់ ក្នុងគោលដៅបង្កើនភាពស៊ាំ និង​ទប់ស្កាត់​ការរីករាលដាលជំងឺកូវីដ-១៩ ក្នុងសហគមន៍ផងដែរ។

ជាមួយគ្នានោះ បងប្អូនប្រជាពលរដ្ឋរស់នៅគោលដៅឡ ភូមិត្រពាំងថ្លឹង២ មកចូលរួមចាក់វ៉ាក់សាំង​បង្ការជំងឺកូវីដ-១៩ ចាប់ពីដូសទី១ ដូសទី២ ដូសទី៣ និងដូសទី៤ ​បានបង្ហាញពីការសប្បាយរីករាយ ដែលវត្តមានរបស់ក្រុមគ្រូពេទ្យ ចុះមកចាក់វ៉ាក់សាំងផ្ទាល់ ក៏សូមគោរពថ្លែងអំណរគុណជូន​ចំពោះ​ប្រមុខរាជរដ្ឋាភិបាល ជាពិសេសសម្តេចតេជោ ហ៊ុន សែន នាយករដ្ឋមន្រី្ត បានយកចិត្តទុកដាក់​ចំពោះ​សុខទុក្ខពលរដ្ឋ ជាពិសេសផ្នែកសុខភាព។

ជាចុងក្រោយក្នុងនាមក្រុមការងារគ្រូពេទ្យ លោក ចាប សុវណ្ណ ប្រធានកម្មវិធីផ្តល់ថ្នាំបង្ការ​នៃ​ការិយាល័យ​ស្រុកប្រតិបតិ្តពោធិ៍សែនជ័យ ទាំងអស់គ្នា ​សូមប្តេជ្ញាថា នឹងខិតខំចុះចាក់វ៉ាក់សាំង​បង្ការជំងឺកូវីដ-១៩ជូនប្រជាពលរដ្ឋ ​ឲ្យបានគ្រប់ៗគ្នា ចុះអប់រំផ្សព្វផ្សាយបង្ការកូវីដ-១៩ អប់រំសុខភាព រៀនរស់នៅធម្មតាក្នុងប្រក្រតីភាពថ្មី វិធានការសុខាភិបាល “ ៣ការពារ ៣កុំ ” និងបន្តផ្តល់សេវា​សុខភាព​ជូន​ប្រជាពលរដ្ឋឲ្យបានច្រើនបំផុតតាមលទ្ធភាពដែលអាចធ្វើទៅបានដោយឥតគិតថ្លៃ៕

អត្ថបទ៖ រដ្ឋា