ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា នាយឧត្តមសេនីយ៍ ទៀ សីហា នឹង​ដឹក​នាំ​គណៈ​ប្រតិ​ភូជាន់ខ្ពស់ក្រសួងការពារជាតិ និងអគ្គបញ្ជាការ​បំពេញ​ទស្សន​កិច្ច​នៅ​ប្រទេស​អូស្រ្តាលី​រយៈ​ពេល​៥​ថ្ងៃ គឺចាប់ពីថ្ងៃទី៦ ដល់ថ្ងៃទី១០ ខែកញ្ញា ឆ្នាំ២០២៦នេះ ខណៈដំណើរ​ទស្សន​កិច្ច​នេះ​ក្នុង​គោលបំណងពង្រឹង កិច្ចសហប្រតិបត្តិការផ្នែកយោធាទ្វេភាគីរវាងកម្ពុជា និងអូស្រ្តាលី​ឲ្យ​កាន់​តែ​ល្អប្រ​សើរ​បន្ថែម​ទៀត។

យោងតាមសេចក្តីប្រកាសព័ត៌មានរបស់ក្រសួងការពារជាតិបានឲ្យដឹងថា តបតាមការ​អញ្ជើញ​របស់​ឯកឧត្តម រីឆាត ម៉ាឡេស ឧបនាយករដ្ឋមន្រ្តី និងជារដ្ឋមន្រ្តីការពារជាតិអូស្រ្តាលីនោះ នាយ​ឧត្តម​​សេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា នឹង​អញ្ជើញ​ដឹក​នាំ​គណៈ​ប្រតិភូ​ជាន់ខ្ពស់ក្រសួងការពារជាតិ និងអគ្គបញ្ជាការដ្ឋាន នៃកងយោធពលខេមរភូមិន្ទ ធ្វើ​ទស្សន​កិច្ច​ផ្លូវការ និងជាលើកដំបូងក្នុងប្រវត្តិសាស្រ្ត នៅប្រទេសអូស្រ្តាលី ចាប់ពីថ្ងៃទី៦ ដល់​ថ្ងៃ​ទី​១០ ខែកញ្ញា ឆ្នាំ២០២៦នេះ។

សេចក្តីប្រកាសបានបញ្ជាក់ថា នៅក្នុងដំណើរទស្សនកិច្ចដ៏មានសារៈសំខាន់នេះ ឯកឧត្តម នាយ​ឧត្តម​សេនីយ៍ ​ទៀ សីហា នឹងជួបពិភាក្សាការងារជាមួយ មេបញ្ជា​ការ​ប្រភេទ​ទ័ព​អូស្រ្តាលី​មួយ​ចំនួន​ ហើយ​ក្រុមការងារជំនាញរបស់ក្រសួងការពារជាតិទាំងពីរ ក៏នឹង​ពិភាក្សា​ការងារ​នៅ​ក្នុង​កិច្ច​ប្រជុំ​តុ​មូល​ផង​ដែរ។ ដោយនៅក្នុងកិច្ចប្រជុំទាំងនោះ ភាគីទាំងពីរគ្រោងនឹង​លើក​យក​ប្រធា​នប​ទ​សំខាន់​ៗ​ជា​ច្រើនដូចជា កិច្ចសហប្រតិបត្តិការយោធាទ្វេភាគី វិស័យសន្តិសុខលម្ហសមុទ្រ និង​សន្តិសុខ​តាមអ៊ី​នធឺណិត ការចែករំលែក ព័ត៌មាន ការអប់រំ និងបណ្តុះបណ្តាលយោធិនអាជីព និង​ការ​អភិវឌ្ឍ​គោលនយោបាយការពារជាតិ និងបញ្ហាសន្តិសុខក្នុងតំបន់ជាដើម។

តាមរ​​យៈសេចក្តីប្រកាសព័ត៌មានខាងលើនេះបានបញ្ជាក់ទៀតថា ដំណើរទស្សនកិច្ចផ្លូវការរបស់ ឯកឧត្តម​ នាយឧត្តមសេនីយ៍ រដ្ឋមន្រ្តីក្រសួងការពារជាតិនេះ ក៏នឹង​បញ្ជាក់​ជា​ថ្មី​នៃ​ទំនាក់​ទំនង​ជា​មិត្តភាព​ និង​ជា​ប្រវត្តិសាស្រ្ត ជាពិសេសកិច្ចសហប្រតិបត្តិការយោធារវាងប្រទេសទាំងពីរ ដែល​កំពុង​មាន​ការ​រីក​ចម្រើន​ជា​លំដាប់ ហើយការពង្រឹងទំនាក់ទំនងនេះ ស្រប​តាម​គោ​ល​នយោបា​យ​របស់​រាជ​រដ្ឋាភិបាលប្រទេសទាំងពីរ ដែលកំពុងជំរុញ​ការ​លើក​កម្រិត​ទំនាក់​ទំនង​ទ្វេភាគី​ឲ្យ​ដល់​កម្រិត ​«ភាពជាដៃគូគ្រប់ជ្រុងជ្រោយ» នាពេលឆាប់ៗខាងមុខនេះ៕ អត្ថបទ៖ បាន ចក់