ពលរដ្ឋ​បង្ហាញការពេញចិត្ត ក្នុងការចូលរួមផ្តល់ព័ត៌មានទៅក្នុង App Kapea Scams ប្រសិន​បើ​មាន​​ការ​សង្ស័យ​លើ​អំពើឆបោកតាមប្រព័ន្ធអនឡាញ ដែលទាក់ទងទៅកាន់ពួកគេ។

App​ Kapea Scams ត្រូវបានអគ្គស្នងការដ្ឋាននគរបាលជាតិ បាន​ដាក់​ឲ្យ​ដំណើរ​ការ​សាក​ល្បង​គិត​ចាប់​ពី​ថ្ងៃ​ទី២៨ ខែកញ្ញា ឆ្នាំ២០២៦កន្លងទៅ ដោយចាប់អនុវត្តសាកល្បងរយៈពេល០៣ខែ មុន​ឈានទៅដាក់ឲ្យដំណើរការជាផ្លូវការ សម្រាប់ការទទួលព័ត៌មាន ទន្និន័យ ឬលេខទូរស័ព្ទ ដែល​ពលរដ្ឋមានការសង្ស័យថា ជាប់ពាក់ព័ន្ធអំពើឆបោក តាមរូបភាពសន្ទនានានា ដើម្បី​សមត្ថកិច្ច​យក​ព័ត៌មានទៅវិភាគ និងឈានទៅការចាត់វិធានការ ប្រសិនបើរក​ឃើ​ញ​មាន​ជាប់​ពាក់​ព័ន្ធ​អំពើ​បទល្មើស ឆបោកតាមប្រព័ន្ធអនឡាញនោះ ។

ពលរដ្ឋ យល់ឃើញថា ៖ កម្មវិធី Kapea Scams នេះ បានដើរតួនាទីសំខាន់ ក្នុងការបើកឱកាសឲ្យអ្នកដែលប្រឈមនឹងការរងគ្រោះដោយអំពើឆបោកតាមប្រព័ន្ធបច្ចេកវិទ្យាទាំងឡាយ ដែលបង្កឡើងដោយក្រុមជនខិលខូច ឬក្រុមឧក្រិដ្ឋកម្មឆបោកតាមប្រព័ន្ធបច្ចេកវិទ្យា ជាដើម អាចផ្តល់ព័ត៌មានទៅកាន់អាជ្ញាធរមានសមត្ថកិច្ចដើម្បីមានចំណាត់ការ និងវិធានការបន្ទាន់ ។

ពួកគាត់សម្តែងក្តីសាទរ ចំពោះស្ថាប័ន្ថមានសមត្ថកិច្ច ដែលបានការបង្កើតកម្មវិធី App នេះឡើងមក ដែលបច្ចុប្បន្ននេះ មានពលរដ្ឋយើងមួយចំនួនធំហើយ ដែលបានជួបប្រទះនឹងការឆបោក តាមរយះការ Hack គណនេយ្យធនាគារ ឬទន្និន័យផ្សេងៗ ក៏ដូចជាខលទំនាក់ទំនងដើរតួជាតួអង្គមន្ត្រីស្ថាប័ន្ថរដ្ឋ សន្ទនាប្រឌិតដើរដើម្បីឆបោកទារប្រាក់ ជាដើម។

ពលរដ្ឋបន្ថែមថា យន្តការថ្មីនេះ នឹងជួយចូលរួមលុបបំបាត់រាល់បទល្មើសទាំងឡាយដែលកំពុងកើតមានក្នុងព្រះរាជាណាចក្រកម្ពុជា ហើយនេះជាការសបញ្ជាក់ឲ្យឃើញពីជំហររបស់រាជរដ្ឋាភិបាល ក្នុងការថែរក្សាការពារសន្តិសុខសុវត្ថិភាពជូនប្រជាពលរដ្ឋក្នុងសង្គមជាតិ កុំឲ្យពលរដ្ឋធ្លាក់ខ្លួនចូលទៅក្នុងការអូសទាញ ពីសំណាក់ជនដែលមិនស្គាល់មុខ ហើយនាំឲ្យខាតបង់ផលប្រយោជន៍ផ្ទាល់ខ្លួនតែម្តង ។

កាលពីពេលថ្មីៗកន្លងទៅ លោកឧត្តមសេនីយ៍ទោ សុខ នីត្យា ប្រធាននាយកដ្ឋានប្រឆាំងបទល្មើសបច្ចេកវិទ្យា នៃអគ្គស្នងការដ្ឋាននគរបាលជាតិ ក៏បានរំលេចខ្លះៗ អំពីបទល្មើសឆបោកបច្ចេកវិទ្យាដែលកំពុងប្រឈមរួមមាន ៖ ការឆបោកតាមរយៈការទិញលក់ឥវ៉ាន់ , ការលួចគណនេយ្យ ទាំងគណនេយ្យបណ្តាញសង្គម គណនេយ្យធនាគារ , ការឆបោកវិនិយោគ , ការឆបោកក្រោមរូបភាពលួងលោមស្នេហា ។ ហើយជាពិសេសនោះ ក្នុងបច្ចុប្បន្នភាពនេះ ក្រុមជនខិលខូចបានបន្លំខ្លួនធ្វើជាសាច់ញាតិ ធ្វើជាបុគ្គលិកស្ថាប័ន្ថឯកជន ឬមន្ត្រីស្ថាប័ន្ថរដ្ឋជាដើម ដោយធ្វើការទំនាក់ទំនងតាមរយៈប្រព័ន្ធទូរគមនាគមន៍ប្រពៃណី ( ប្រព័ន្ធទូរស័ព្ទដៃ ) បន្លំថាមានគ្រោះថ្នាក់ចរាចរណ៍ រួចទាមទារតម្រូវឲ្យមានការដោះស្រាយ តាមរយៈការបង់ប្រាក់ទៅពួកគេ ដើម្បីកុំឲ្យមានរឿងរ៉ាវវែងឆ្ងាយ ជាដើម ។

ប្រធាននាយកដ្ឋានដដែល ក៏បានអំពាវនាវដល់ប្រជាពលរដ្ឋទូទៅទាំងអស់នៅទូទាំងសូមព្យាយាមស្វែងយល់អំពីអត្ថប្រយោជន៍របស់ កម្មវិធី Kapea Scams ឲ្យបានទូលំទូលាយ ខណៈកម្មវិធីនេះ ត្រូវបានតម្លើងរួចរាល់ជាស្រេច នៅក្នុង App Store ឬ Play Store ៕