ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមប្រឹក្សាភិបាលមូលនិធិអភិវឌ្ឍន៍សហគមន៍កសិកម្ម (ម.អ.ស) បានអញ្ជើញដឹកនាំកិច្ចប្រជុំលើកដំបូងរបស់ក្រុមប្រឹក្សាភិបាលមូលនិធិអភិវឌ្ឍន៍សហគមន៍កសិកម្ម ហៅកាត់ ម.អ.ស។
ក្រោយចប់កិច្ចប្រជុំ កាលពីរសៀលថ្ងៃទី៧ ខែកញ្ញា ឆ្នាំ២០២៦កន្លងទៅ ក្រសួងកសិកម្ម រុក្ខាប្រមាញ់ និងនេសាទ បានសសេរឱ្យដឹងថា ក្នុងអង្គប្រជុំបានពិនិត្យ ពិភាក្សា និងអនុម័តលើសំណើរបស់សហភាពសហគមន៍កសិកម្មទំនើប ដើម្បីផ្តល់ការគាំទ្រហិរញ្ញវត្ថុលើគម្រោងអភិវឌ្ឍន៍សហគមន៍កសិកម្មទំនើបបុរី ៣ ០០០ខ្នង ស្ថិតនៅភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ និងគម្រោងអភិវឌ្ឍន៍មួយទៀត ផ្តោតលើកសិដ្ឋានទំនើបម្ទេស ស្ថិតនៅតំបន់អូរសេវ ស្រុកសេសាន ខេត្តស្ទឹងត្រែង។
ប្រភពដដែល បានឱ្យដឹងទៀតថា ក្រោមការគាំទ្រពីក្រុមប្រឹក្សាភិបាលមូលនិធិអភិវឌ្ឍន៍សហគមន៍កសិកម្ម គម្រោងទាំងពីរនេះ នឹងរៀបចំខ្សែច្រវាក់ផលិតកម្មកសិកម្ម ដើម្បីបង្កើតការងារ និងលើកកម្ពស់ជីវភាពរស់នៅរបស់ប្រជាពលរដ្ឋជាជនភៀសសឹកក្នុងខេត្តបន្ទាយមានជ័យ និងសម្បទានិកដីធ្លីការពារព្រៃក្នុងខេត្តស្ទឹងត្រែង ឱ្យកាន់តែប្រសើរឡើង។
សូមបញ្ជាក់ថា ក្រុមប្រឹក្សាភិបាលមូលនិធិអភិវឌ្ឍន៍សហគមន៍កសិកម្ម (ម.អ.ស) ត្រូវបានបង្កើតឡើងក្នុងគោលបំណងផ្តល់ការគាំទ្រផ្នែកហិរញ្ញវត្ថុ បច្ចេកទេស និងការកសាងសមត្ថភាពដល់សហគមន៍កសិកម្មនៅកម្ពុជា ដើម្បីបំប្លែងពីការធ្វើកសិកម្មបែបប្រពៃណី ទៅជា «សហគមន៍កសិកម្មទំនើប»។ ការជំរុញគម្រោងកសិកម្មទំនើបនេះ គឺជាយុទ្ធសាស្ត្រគន្លឹះមួយរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការធានាឱ្យបាននូវខ្សែច្រវាក់ផលិតកម្មមួយដែលមានភាពធន់នឹងការប្រែប្រួលអាកាសធាតុ មានទីផ្សារច្បាស់លាស់ កាត់បន្ថយការចំណាយលើការផលិត និងធានាបាននូវប្រាក់ចំណេញខ្ពស់ជូនកសិករ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
