ភ្នំពេញ៖ ឯកឧត្តម ស៊ុ សន្និសិទ្ធ ទេសាភិបាលរង ធនាគារជាតិនៃកម្ពុជា បានអញ្ជើញចូលរួមធ្វើជាសហប្រធាន ជាមួយក្រសួងសេដ្ឋកិច្ច និងហិរញ្ញវត្ថុកម្ពុជា ក្រសួងហិរញ្ញវត្ថុចិន និងធនាគារកណ្តាលចិន ដើម្បីដឹកនាំកិច្ចប្រជុំថ្នាក់រដ្ឋមន្ត្រីក្រសួងហិរញ្ញវត្ថុ និងទេសាភិបាលធនាគារកណ្តាលអាស៊ានបូក៣ លើកទី២៥ តាមរយៈប្រព័ន្ធអនឡាញ។កិច្ចប្រជុំនេះធ្វើឡើងនៅថ្ងៃទី១២ ខែឧសភា ដោយមានគោលបំណងពិនិត្យនិងពិភាក្សាលើវឌ្ឍនភាពនៃកិច្ចសហប្រតិបត្តិការផ្នែកហិរញ្ញវត្ថុក្នុងតំបន់ និងផ្តល់ការណែនាំដល់ក្រុមការងារបច្ចេកទេស សំដៅពង្រឹងបណ្តាញសុវត្ថិភាពហិរញ្ញវត្ថុតំបន់អាស៊ានបូក៣។
អង្គប្រជុំ បានពិភាក្សាអំពីស្ថានភាពបច្ចុប្បន្ននិងទស្សនវិស័យសម្រាប់សេដ្ឋកិច្ចតំបន់ និងពិភពលោក ហានិភ័យនិងបញ្ហាប្រឈមចម្បងៗ និងការអនុវត្តគោលនយោបាយឆ្លើយតបនានា។
កិច្ចសហប្រតិបត្តិការហិរញ្ញវត្ថុអាស៊ានបូក៣ បានដើរតួនាទីយ៉ាងសំខាន់ក្នុងការរួមចំណែករក្សាស្ថិរភាពម៉ាក្រូសេដ្ឋកិច្ច និងហិរញ្ញវត្ថុក្នុងតំបន់ ដើម្បីគាំទ្រការអភិវឌ្ឍប្រកបដោយភាពធន់ ចីរភាព និងបរិយាបន្ន។
ក្នុងទិសដៅនេះ រដ្ឋមន្ត្រីក្រសួងហិរញ្ញវត្ថុ និងទេសាភិបាលធនាគារកណ្តាលអាស៊ានបូក៣ បានឯកភាពលើការពង្រឹងសមត្ថភាពរបស់អង្គភាពស្រាវជ្រាវម៉ាក្រូសេដ្ឋកិច្ចអាស៊ានបូក៣ ក្នុងការតាមដាននិងវាយតម្លៃស្ថានភាពម៉ាក្រូសេដ្ឋកិច្ចរបស់ប្រទេសជាសមាជិក និងគាំទ្រដល់ដំណើរការកិច្ចព្រមព្រៀងពហុនីយកម្មគំនិតផ្តួចផ្តើមឈៀងម៉ៃ ដែលជាយន្តការផ្តល់ហិរញ្ញប្បទាន ក្នុងចំណោមប្រទេសជាសមាជិកដែលប្រឈមនឹងហានិភ័យឬជួបវិបត្តិសេដ្ឋកិច្ច ដើម្បីបង្ការនិងដោះស្រាយវិបត្តិ។
បន្ថែមលើនេះ អង្គប្រជុំក៏បានគាំទ្រដល់ការអភិវឌ្ឍទីផ្សារសញ្ញាប័ណ្ណតំបន់ជារូបិយវត្ថុក្នុងស្រុក ដើម្បីកៀរគរការសន្សំ និងការប្រើប្រាស់ប្រភពទុនក្នុងតំបន់ តាមរយៈគំនិតផ្តួចផ្តើមទីផ្សារមូលបត្រអាស៊ី (ABMI)។
អង្គប្រជុំក៏បានបន្តជំរុញដល់ការអភិវឌ្ឍគំនិតផ្តួចផ្តើមថ្មីៗនាពេលអនាគតរបស់អាស៊ាន+៣ ក្នុងនោះរួមមាន ការផ្តល់ហិរញ្ញប្បទានលើការកសាងហេដ្ឋារចនាសម្ព័ន្ធ ការរៀបចំបង្កើតបន្ថែមឧបករណ៍ហិរញ្ញវត្ថុរយៈពេលវែង ការបង្ការគ្រោះមហន្តរាយធម្មជាតិ ការសម្របសម្រួលគោលនយោបាយដើម្បីឆ្ពោះទៅរកវឌ្ឍនភាពបច្ចេកវិទ្យា ការធ្វើឌីជីថលូបនីយកម្មហិរញ្ញវត្ថុ និងការគាំទ្រហិរញ្ញប្បទានបៃតង សំដៅពង្រឹងស្ថិរភាពហិរញ្ញវត្ថុ និងជំរុញកំណើនសេដ្ឋកិច្ចក្នុងតំបន់៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
