ភ្នំពេញ៖ អគ្គនាយកដ្ឋានពន្ធដារ កំពុងរៀបចំសេចក្តីព្រាងច្បាប់ស្តីពីសារពើពន្ធថ្មី ក្នុងគោលដៅឱ្យច្បាប់ស្តីពីសារពើពន្ធថ្មីនេះ កាន់តែមានភាពគ្រប់ជ្រុងជ្រោយ ស៊ីចង្វាក់ប្រទាក់ក្រឡាគ្នា ឆ្លើយតបនឹងស្ថានភាពជាក់ស្តែងនៃសេដ្ឋកិច្ចជាតិតំបន់ និងពិភពលោក នឹងដើម្បីឱ្យមានសង្គតិភាពជាមួយ នឹងច្បាប់ស្តីពីវិនិយោគនៃព្រះរាជាណាចក្រកម្ពុជា។

ឯកឧត្តម គង់ វិបុល រដ្ឋមន្ត្រីប្រតិភូអមនាយករដ្ឋមន្រ្តី និងទទួលបន្ទុកជាអគ្គនាយក​នៃ​អគ្គនាយក​ដ្ឋាន​ពន្ធដារ លើកឡើងក្នុងកិច្ចពិភាក្សាការងារជាមួយ លោកឧកញ៉ា គង់ សាង ប្រធានសមាគម​រោងចក្រកាត់ដេរ (GMAC) ​តាមប្រពន្ធអនឡាញនៅ ថ្ងៃទី១២ ខែឧសភា ឆ្នាំ២០២២នេះថា អគ្គនាយកដ្ឋានពន្ធដារ ជាសេនាធិការរបស់ក្រសួងសេដ្ឋកិច្ច និងហិរញ្ញវត្ថុ បានកំពុងរៀបចំ​សេចក្តីព្រាងច្បាប់​ស្តីពីសារពើពន្ធថ្មី ​ក្នុងគោលដៅឱ្យច្បាប់​ស្តីពីសារពើពន្ធថ្មីនេះ កាន់តែមានភាព​គ្រប់ជ្រុងជ្រោយ ​ស៊ីចង្វាក់ប្រទាក់ក្រឡាគ្នា​ ឆ្លើយតបនឹងស្ថានភាពជាក់ស្តែងនៃសេដ្ឋកិច្ចជាតិ​តំបន់ និង​ពិភពលោក ​ក៏ដូចជាប្រមូលផ្ដុំនូវច្បាប់ស្តីពីសារពើពន្ធ ដែលកន្លងមកមាន​លក្ខណៈដាច់​ដោយឡែកៗ​ពីគ្នា ​ហើយសេចក្តីព្រាងថ្មីនេះ ​គឺដើម្បីឱ្យមានសង្គតិភាពជាមួយ នឹង​ច្បាប់ស្តីពី​វិនិយោគ​នៃព្រះរាជាណាចក្រកម្ពុជា ​ដែលបានដាក់ឱ្យប្រើប្រាស់ដោយនាពេលកន្លងមក។

ចំពោះការអនុវត្តការងារ, អគ្គនាយកដ្ឋានពន្ធដារនៅ​តែបន្តប្រកាន់ខ្ជាប់ នូវគោលជំហរផ្តល់សេវា​ជូន​អ្នកជាប់ពន្ធប្រកបដោយគុណភាពខ្ពស់​ ក្នុងនោះពង្រឹង​ការអនុវត្តតាមប្រព័ន្ធបច្ចេកវិទ្យាព័ត៌មាន និង​តាមអនឡាញរួមមាន​ ប្រព័ន្ធគ្រប់គ្រងការដាក់លិខិតប្រកាសពន្ធតាមអនឡាញ​ (E-Filing និង Tol E-Filing), បង់ប្រាក់ពន្ធតាមអនឡាញ​ (E-Payment System)​ ដែលមានលក្ខណៈពេញលេញ ជួយ​សម្រួល និងផ្តល់លទ្ធភាពឱ្យអ្នកជាប់ពន្ធដាក់លិខិតប្រកាសតាម​អនឡាញបានយ៉ាងរលូន និងចំណេញពេលវេលាជាដើម។

ចំណែកសំណើរបស់សមាគម GMAC ​ពាក់ព័ន្ធនឹងការបង្វិលសងអាករលើតម្លៃបន្ថែម, ឯកឧត្តម បញ្ជាក់ជូនថា ​ចាប់តាំងពីអគ្គនាយកដ្ឋានពន្ធដារ​បានរៀបចំប្រព័ន្ធ E-VAT ដែលបច្ចុប្បន្នជាប្រព័ន្ធ​ប្រកាសពន្ធតាមប្រព័ន្ធអនឡាញ​ E-Filing អគ្គនាយកដ្ឋានពន្ធដារបានកំពុងពង្រឹងការធ្វើ Cross Check ព្រមទាំងជំរុញ​និងអនុវត្តកាន់តែមានប្រសិទ្ធភាពបន្ថែមទៀត នូវការបង្វិលសងអាករ​លើ​តម្លៃបន្ថែមសម្រាប់រយៈពេល ២ ឆ្នាំចុងក្រោយនេះ ស្របតាមខ្លឹមសារនៃប្រកាសចុះនៅឆ្នាំ២០១៨ ស្តីពីយន្តការបង្វិលសង​អាករលើតម្លៃបន្ថែម។

ក្នុងកិច្ចពិភាក្សានេះ, លោកឧកញ៉ា គង់ សាង បានទទួលស្គាល់អំពីចំណុចឆកល្វែង និងកង្វះខាត របស់សហគ្រាស ​រោងចក្រជាសមាជិកសមាគម GMAC ​​ហើយបានគាំទ្រ និងឯកភាព នូវ​ដំណោះស្រាយរបស់អគ្គនាយកដ្ឋានពន្ធដារ ​ចំពោះការបង្វិលសងអាករលើតម្លៃបន្ថែម នៃ​រយៈពេលមិន​លើសពី ១២ឆ្នាំថយក្រោយ​ ហើយជំរុញឱ្យសមាជិកទាំងអស់ សហការការងារ​នេះ​ជាមួយអគ្គនាយកដ្ឋានពន្ធដារឡើងវិញ។

ក្នុងជំនួបនេះដែរ,លោកឧកញ៉ា គង់ សាង បានបង្ហាញអំពីតួរលេខ របស់សហគ្រាស រោងចក្រ ជាសមាជិកសរុបចំនួន ៦១៧ ក្នុងនោះមានរោងចក្រកាត់ដេរ​សំលៀកបំពាក់​ចំនួន ​៤៦៣, រោង​ចក្រស្បែកជើងចំនួន ១២, រោងចក្រកាបូបចំនួន ៩១, ក្រុមហ៊ុនម៉ៅការបន្តចំនួន ០៦, រោងចក្រ​ផលិតផលិតផលមិនមែនកាត់ដេរចំនួន ៣០​ និងក្រុមហ៊ុនផ្សេងៗ​ចំនួន ១៥ ដែលកំពុង​មាន​សកម្មភាពអាជីវកម្មនៅក្នុងព្រះរាជាណាចក្រកម្ពុជា ៕ អត្ថបទ៖ សុន រ៉ាឌី