ភ្នំពេញ៖ ដើម្បីទ្រទ្រង់ដល់ដំណើរការរបស់មន្ទីរពេទ្យ គន្ធបុប្ផា ធនាគារអភិវឌ្ឍន៍ជនបទ និង កសិកម្ម បានចុះអនុស្សារណៈយោគយល់គ្នាជាមួយមូលនិធិគន្ធបុប្ផាកម្ពុជា ដើម្បីកៀរគរ និងទទួលវិភាគទានពីសប្បុរសជនពីគ្រប់ទិសទីតាមរយៈការប្រើប្រាស់សេវាកម្មរបស់ធនាគារ។

នៅថ្ងៃទី១៣ខែឧសភា ឆ្នាំ២០២២ ធនាគារអភិវឌ្ឍន៍ជនបទ និងកសិកម្ម (ធ.អ.ជ.ក.) និងមូលនិធិគន្ធបុប្ផាកម្ពុជា បានចុះហត្ថលេខាលើអនុស្សរណៈយោគយល់គ្នា ស្តីពីការប្រើប្រាស់​សេវាកម្មរបស់ធនាគារអភិវឌ្ឍន៍ជនបទ និងកសិកម្ម សម្រាប់កៀរគរ និងទទួលវិភាគទាន​សប្បុរសធម៌​ជូនមូលនិធិគន្ធបុប្ផាកម្ពុជា។

ការចុះអនុស្សរណៈយោគយល់គ្នានេះ មានគោលបំណងចូលរួម ទ្រទ្រង់​ផ្នែកហិរញ្ញវត្ថុ​សម្រាប់​និរន្តរភាព​នៃ​កិច្ចដំណើរការរបស់មន្ទីរពេទ្យគន្ធបុប្ផា ​តាមរយៈការប្រើប្រាស់សេវា​ធនាគារ​ឌីជីថល របស់​ធនាគារអភិវឌ្ឍន៍ជនបទនិងកសិកម្ម។

ឯកឧត្តម កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម មានប្រសាសន៍ថា ការប្រើប្រាស់សេវាកម្ម ធនាគារក្នុងការប្រមូល វិភាគទាន​សប្បុរសធម៌ ពីសាធារណជន នឹងផ្ដល់លក្ខណៈងាយស្រួលដល់សាធារណជន ក្នុងការចូល​រួម​បរិច្ចាគវិភាគទាន ​ជូនមន្ទីរពេទ្យគន្ធបុប្ផា ដើម្បីធានានិរន្តរភាពសេវាកម្មរបស់មន្ទីរពេទ្យ ក្នុងការ​លើកកម្ពស់​សុខុមាលភាព​ដល់​មាតា ទារក និង​កុមារ ​ដែលជា​ មូលដ្ឋានគ្រឹះ ​សំខាន់​ក្នុងការកសាង កម្លាំង​ពលកម្ម​ប្រកប​ដោយចីរភាពស្របតាមចក្ខុវិស័យរបស់រដ្ឋាភិបាល។

ជាមួយគ្នានោះដែរឯកឧត្តម ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង​ជាប្រធានលេខាធិការដ្ឋានមូលនិធិគន្ធបុប្ផាកម្ពុជា​ បានបញ្ជាក់ដែរថា ​ការចុះអនុស្សរណៈនៅថ្ងៃនេះ ជា​សក្ខីភាពដែលបង្ហាញអំពីការចូលរួមរបស់ធនាគារអភិវឌ្ឍន៍ជនបទ និងកសិកម្ម ក្នុងការ គាំទ្រ និងផ្តល់កិច្ចសហការជាមួយមូលនិធិគន្ធបុប្ផាកម្ពុជាសំដៅចូលរួម ​ចំណែកជួយសង្រ្គោះជីវិត​កុមារកម្ពុជា។

ព្រមជាមួយគ្នានេះ ថ្នាក់ដឹកនាំនិងបុគ្គលិកនៃធនាគារ ARDB ​បានស្ម័គ្រចិត្តចូលរួមបរិច្ចាគវិភាគ​ទាន​ប្រចាំខែចាប់ពីថ្ងៃចុះអនុស្សរណៈនេះតទៅ។

ធនាគារអភិវឌ្ឍន៍ជនបទ និងកសិកម្មបានប្រគល់ថវិកាចំនួន ២៥.០៥២.០០០ រៀល ដែលបាន​ទទួល​ការ​បរិច្ចាគថវិកាពីឯកឧត្តមបណ្ឌិត កៅ ថាច ​និងលោកជំទាវ ​ព្រមទាំងថ្នាក់ដឹកនាំ និង​បុគ្គលិកទាំងអស់ជូនមូលនិធិគន្ធបុប្ផាកម្ពុជា។

សាធារណជនដែលមានបំណងចូលរួមបរិច្ចាគវិភាគទានជូនមូលនិធិគន្ធបុប្ផាកម្ពុជា សូមផ្ទេរ ឬដាក់ប្រាក់ចូលគណនីមូលនិធិគន្ធបុប្ផាកម្ពុជា ​ដែលមានឈ្មោះ​ និងលេខគណនី ​នៅធនាគារ ARDB ​ដូចខាងក្រោម ឈ្មោះគណនី៖ Cambodia Kantha Bopha Foundation លេខគណនីជាប្រាក់រៀល៖ ១០២០០០០៣៧០លេខគណនីជាប្រាក់ដុល្លារអាមេរិក៖ ២០២០០០២៩៣១៕ អត្ថបទ៖ សូដាវណ្ណ