ស្ទឹងត្រែង៖ ក្នុងបេសកកម្មរយៈពេល៤ថ្ងៃ ចាប់ពីថ្ងៃទី៩ ដល់ ១២ ខែឧសភា ឆ្នាំ២០២២នេះ នៅលើទឹកដីនៃខេត្តស្ទឹងត្រែង កាកបាទក្រហមកម្ពុជា ដែលមាន ហ្លួងម៉ែ នរោត្តម មុនិនាថ សីហនុ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឱ្យក្រុមការងារផ្តល់អំណោយមនុស្សធម៌ ដល់ជនចាស់ឥតទីពឹង ជនមានពិការភាព ស្ត្រីមេម៉ាយមានកូនច្រើន និងកុមារកំព្រាចំនួន៧៧៥គ្រួសារ រស់នៅក្នុងស្រុកបុរីអូរស្វាយសែនជ័យ, ក្រុងស្ទឹងត្រែង, ស្រុកថាឡាបរិវ៉ាត់ និងស្រុកសៀមបូក នៃខេត្តស្ទឹងត្រែង។ 

ឯកឧត្តម អ៊ុយ សំអាត បានឱ្យដឹងថា ក្នុងរយៈពេល៤ថ្ងៃ នៅលើទឹកដីខេត្តស្ទឹងត្រែងនេះ ក្រុមការងារបានផ្តល់អំណោយមនុស្សធម៌ ជូនប្រជាពលរដ្ឋងាយរងគ្រោះសរុបចំនួន៧៧៥គ្រួសា ដោយចែកចេញជា៤ទីតាំងផ្សេងគ្នា ដើម្បីកុំឱ្យប្រជាពលរដ្ឋ ពិបាកក្នុងការធ្វើដំណើរឆ្ងាយ មកប្រមូលផ្តុំគ្នាតែមួយកន្លែង។ 

ឯកឧត្តម បានពាំនាំនូវព្រះរាជបណ្តាំ ផ្ញើសួរសុខទុក្ខពីសំណាក់ហ្លួងម៉ែ នរោត្តម មុនិនាថ សីហនុ ព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ជូនចំពោះបងប្អូនប្រជាពលរដ្ឋទាំងអស់ ដោយក្តីអាណិតស្រឡាញ់ជាទីបំផុត។ ក្នុងនោះដែរបើទោះជាសម្តេចកិត្តិព្រឹទ្ធបណ្ឌិតប្រធានមានទុក្ខធុរៈមិនបានអញ្ជើញមកផ្ទាល់ ក៏លោកនៅតែបន្តដឹកនាំ និងចង្អុលបង្ហាញឱ្យក្រុមការងារ ចុះធ្វើសកម្មភាពមនុស្សធម៌ជាប្រចាំ ដោយមិនទុកឱ្យប្រជាពលរដ្ឋណាម្នាក់ ស្លាប់ដោយអត់អាហារនោះទេ។

ឯកឧត្តមបានថ្លែងអំណរគុណយ៉ាងជ្រាវជ្រៅបំផុត ចំពោះសប្បុរសជនគ្រប់មជ្ឈដ្ឋាន ដែលបានបរិច្ចាគថវិកាជូនកាកបាទក្រហមកម្ពុជា ក្នុងឱកាសទិវាពិភពលោកកាកបាទក្រហម និងអឌ្ឍចន្ទក្រហម៨ឧសភា ជាពិសេសព្រះរាជូបត្ថម្ភដ៏ឧត្តុង្គឧត្តមរបស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ ជាអម្ចាស់ជីវិតលើត្បូង និងហ្លួងម៉ែ នរោត្តម មុនិនាថ សីហនុ ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គទាំងទ្វេបានប្រោសប្រទាន ព្រះរាជទ្រព្យជារៀងរាល់ខែ រៀលរាល់ត្រីមាស និងក្នុងឱកាសផ្សេងៗជាបន្តបន្ទាប់ ដើម្បីឱ្យកាកបាទក្រហមកម្ពុជា អាចបន្តសកម្មភាពមនុស្សបានទៀត។ 

ទន្ទឹមនឹងនោះឯកឧត្តមវេជ្ជ. ក៏បានពាំនាំនូវសារអំពាវនាវពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនបងប្អូនប្រជាពលរដ្ឋទាំងអស់ សូមថែទាំសុខភាពផ្ទាល់ខ្លួនឱ្យបានល្អ មានអនាម័យក្នុងការរស់នៅ និងប្រុងប្រយ័ត្នចំពោះ អាកាសធាតុ ដែលអាចធ្វើឱ្យប៉ះពាល់ដល់សុខភាព។ ជាមួយគ្នានេះសូមប្រជាពលរដ្ឋ បន្តចូលរួមទប់ស្កាត់ជំងឺកូវីដ-១៩ ចាក់វ៉ាក់សាំងដូសទី៣ ឬដូសទី៤ ឱ្យបានគ្រប់ៗគ្នា ព្រោះថាប្រសិទ្ធភាពនៃវ៉ាក់សាំង អាចការពារអាយុជីវិតរបស់យើងបាន ហើយ ធ្វើឱ្យយើងអាចទប់ស្កាត់ការរីករាលដាលជំងឺកូវីដ-១៩ និងអាចស្តារសេដ្ឋកិច្ចគ្រួសារឡើងវិញ។

ប្រជាពលរដ្ឋដែលទទួលអំណោយទាំងនេះ បានសម្តែងនូវសោមនស្សសប្បាយរីករាយបំផុត និងថ្លែងអំណរគុណយ៉ាងជ្រាវជ្រៅ ចំពោះទឹកចិត្តសប្បុរធម៌ របស់សម្តេចកិត្តិព្រឹទ្ធ បណ្ឌិត ប៊ុនរ៉ានី ហ៊ុនសែន ដែលតែងតែគិតគូរជានិច្ច ដល់ប្រជាពលរដ្ឋ ដែលកំពុងតែជួបការលំបាកក្នុងជីវភាពគ្រប់ទីកន្លែង។

សូមបញ្ជាក់ថា បន្ទាប់ពីបញ្ចប់បេសកកម្មនៅខេត្តស្ទឹងត្រែងរួច ក្រុមការងារនិងបន្តទៅផ្តល់អំណោយ មនុស្សធម៌ដល់ប្រជាពលរដ្ឋងាយរងគ្រោះបំផុត នៅខេត្តមណ្ឌលគិរី និងខេត្តរតនគិរី ជាបន្តបន្ទាប់ទៀត៕