អ៊ុយក្រែន៖ កងកម្លាំងអ៊ុយក្រែនបានបន្តវាយរុញច្រានកងកម្លាំងរុស្ស៊ីនៅភាគខាងជើងទីក្រុង Kharkiv ជាទីក្រុងធំទីពីររបស់អ៊ុយក្រែនកាលពីថ្ងៃសុក្រ ដោយដណ្តើមបានមកវិញភូមិជាច្រើន។ ការរុលទៅមុខរបស់រុស្សីត្រូវបានបញ្ឈប់នៅជាយក្រុងភាគខាងជើង ជាកន្លែងដែលមានការប្រយុទ្ធគ្នាខ្លាំងដែលបានអូសបន្លាយជាច្រើនសប្តាហ៍ ហើយភាគច្រើនប្រយុទ្ធដោយកាំភ្លើងធំធុនធ្ងន់។
កងកម្លាំងអ៊ុយក្រែនបានធ្វើការវាយបកវិញ និងដណ្តើមបានមកវិញភូមិជាច្រើន បន្ទាប់ពីបានបំបែកការឡោមព័ទ្ធធ្វើឡើងដោយកងកម្លាំងរុស្ស៊ីនៅទីក្រុងមួយ ដែលមានចម្ងាយមិនដល់ ៤០គីឡូម៉ែត្រពីព្រំដែនរុស្ស៊ី។ ទាហានបាននិយាយថា ទោះបីជាសមរភូមិជួរមុខនៅតែអស្ថិរភាពក៏ដោយ ប៉ុន្តែពេលនេះទីក្រុង Kharkiv នៅក្រៅចម្ងាយទីតាំងបាញ់កាំភ្លើងធំរបស់រុស្ស៊ី។ កងកម្លាំងរុស្ស៊ីបានបង្កើតសមរភូមិជួរមុខជុំវិញភូមិ Kutuzivka ជាកន្លែងដែលរថក្រោះ និងរថពាសដែករុស្ស៊ីជាច្រើនគ្រឿងត្រូវបានទុកចោល និងបំផ្លាញ។
ទន្ទឹមនឹងនេះ យុទ្ធនាការរបស់រុស្ស៊ីនៅភាគខាងកើតរបស់អ៊ុយក្រែន អាចរុលទៅមុខបានតិចតួចប៉ុណ្ណោះ។ មន្ត្រីអ៊ុយក្រែន និងអង់គ្លេសបាននិយាយថា រុស្ស៊ីបានទទួលរងការខាតបង់ធ្ងន់ធ្ងរ នៅពេលដែលកងកម្លាំងអ៊ុយក្រែនបានបំផ្លាញស្ពានបណ្តែតទឹកមួយកន្លែង ដែលកងទ័ពរុស្ស៊ីកំពុងប្រើប្រាស់ដើម្បីព្យាយាមឆ្លងកាត់ទន្លេ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
