ស្វាយរៀង៖ អគារទីស្នាក់ការគណបក្សប្រជាជនកម្ពុជាស្រុកកំពង់រោទិ៍ ខេត្តស្វាយរៀង មានតម្លៃជាង ១៣ម៉ឺនដុល្លារ រួមនឹងបំពាក់គ្រឿងសង្ហារិម សម្ភារៈការិយាល័យ ត្រូវបានសម្ពោធដាក់ឱ្យប្រើប្រាស់ជាផ្លូវការនៅថ្ងៃទី១៣ ខែឧសភា ឆ្នាំ២០២២ ក្រោមវត្តមានលោកជំទាវកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា ។

លោកជំទាវ ម៉ែន សំអន បាន​ថ្លែង​កោត​សរសើរ​ចំពោះ ​ឯកឧត្តម លោកជំទាវ លោក លោកស្រី ពិសេស​ក្រុមការងារគណបក្សប្រជាជនកម្ពុជា ចុះជួយស្រុក ​ដែល​បានរួមផ្តុំ​ និង​គៀងគរ​ថវិកា យក​មកកសាងទីស្នាក់ដ៏ល្អស្អាត ​ដើម្បី​បម្រើ​ការងារគណបក្សនៅថ្នាក់មូលដ្ឋាន ក្នុងគោលបំណង​រួមថែ​រក្សាគណបក្សប្រជាជនកម្ពុជា​អោយបានរុងរឿងតទៅអនាគត។

ទាក់ទងទៅនិងកិច្ចការចំពោះមុខ ក្នុងនាមប្រធានក្រុមការងារគណបក្សចុះជួយខេត្ត លោកជំទាវ បាន​ជំរុញដល់មន្ត្រីបក្សនៅថ្នាក់មូលដ្ឋាន ​ត្រូវ​ចុះសិក្សា​ស្វែង​យល់ពីជីវភាព និង​ធ្វើការ​ឆ្លើយតប​រាល់សេវាតម្រូវការ ​ជូនពួកគាត់​អោយបានទាន់ពេល ​សំដៅធ្វើការ​ទាក់ទាញ​សមាន​ចិត្ត​ពលរដ្ឋ ឱ្យ​មក​បោះឆ្នោត​គាំទ្រ​គណបក្សប្រជាជកម្ពុជា ​ដើម្បី​ដណ្តើម​តួនាទីដឹកនាំក្រុមប្រឹក្សា ​ឃុំ/សង្កាត់ នៅថ្ងៃទី៥ ខែមិថុនា ឆ្នាំ២០២២ ​ខាងមុខឱ្យបានគ្រប់ៗគ្នា៕អត្ថបទ៖ ភា សារិទ្ធ​