ភ្នំពេញ​៖​ ថ្នាក់ដឹកនាំយុវជនរបស់គណបក្សប្រជាជនកម្ពុជា ឯកឧត្តម ហ៊ុន ម៉ានីប្រធានកិត្តិយសក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានបញ្ជាក់ថា ប្រជាជនខ្មែរតែងតែនៅជាមួយគ្នាជានិច្ច ជាពិសេសក្នុងគ្រាលំបាក។

ការថ្លែងរបស់ឯកឧត្តម ហ៊ុន ម៉ានី យ៉ាងដូច្នេះ នាឱកាសអញ្ជើញជាអធិបតីភាពក្នុងពិធីសកម្មភាពសប្បុរសធម៌ដ៏ល្អថ្លៃថ្លារបស់ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី លើទឹកដីស្រុកសស្រីសន្ធរ ខេត្តកំពង់ចាមនេះ ដែលមានក្រុមការងារគ្រូពេទ្យស្ម័គ្រចិត្តចំនួន៥២១នាក់ និងស្រី្តចំនួន៣១៥នាក់ បានចុះពិនិត្យ ពិគ្រោះ ព្យាបាលជំងឺ និងចាក់វ៉ាក់សាំងបង្ការជំងឺកូវីដ-១៩ ដូសទី១ ដូសទី២ ដូសទី៣ និងដូសទី៤ រួមទាំងអប់រំសុខភាព ចែកថ្នាំពេទ្យដោយឥតគិតថ្លៃជូនបងប្អូនប្រជាពលរដ្ឋ ចំនួន៦៨៧៦នាក់ ក្នុងនោះស្រី្តមានចំនួន៤៦០៧នាក់ នៅក្នុងវិទ្យាល័យ ស្រីសន្ធរ ឃុំព្រែកពោធិ៍ ស្រុកស្រីសន្ធរ ខេត្តកំពង់ចាម និងអមដំណើរដោយឯកឧត្តម លេង ផាលី ប្រធានប្រតិបត្តិក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ឯកឧត្តម នួន ផារ័ត្ន អភិបាលរងរាជធានីភ្នំពេញ សហការជាមួយឯកឧត្តម លូ គឹមឈន់ ប្រធានក្រុមការងារថ្នាក់ជាតិចុះជួយស្រុកស្រីសន្ធរ ឯកឧត្តម ហេង វណ្ណនី អភិបាលរងខេត្តកំពង់ចាម រួមជាមួយក្រុមការងារចុះជួយស្រុកស្រីសន្ធរជាច្រើនរូប។

បន្ទាប់ពីបានស្ដាប់របាយការណ៍របស់ឯកឧត្តម ហេង វណ្ណនី អភិបាលរងខេត្តកំពង់ចាម ឯកឧត្តម ហ៊ុន ម៉ានី បានធ្វើការកោតសរសើរ និងថ្លែងអំណរគុណដល់ក្រុមគ្រូពេទ្យស្ម័គ្រចិត្តទាំងអស់ ជាពិសេសការលះបង់របស់ក្រុមការងារក្រុមគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលតែងតែខិតខំប្រឹងប្រែងបំពេញតួនាទី ប្រកបដោយទំនួលខុសត្រូវយ៉ាងល្អប្រសើរ ដោយឈរលើគោលការណ៍ស្ម័គ្រចិត្តគួបផ្សំ នឹងការងារស្នូល មិនរាថយទោះស្ថិតក្នុងកាលៈទេសៈណាក៏ដោយ។ 

 ឯកឧត្តម ហ៊ុន ម៉ានី ក៏បានរំលឹកឡើងពីការឆ្លងកាត់ការលំបាកនានារបស់ថ្នាក់ដឹកនាំ ជាពិសេសការប្រយុទ្ធក្នុងបរិបទកូវីដ-១៩ ដែលបង្ហាញអោយឃើញកាន់តែច្បាស់ពីការលះបង់ ការយកចិត្តដាក់របស់រាជរដ្ឋាភិបាលទៅលើប្រជាជន ជាពិសេសអាជ្ញាធរថ្នាក់មូលដ្ឋានក៏ដូចជាក្រុមគ្រូពេទ្យស្ម័គ្រចិត្តទាំងអស់ដែលបានបន្តចូលរួម និងជួយសម្របសម្រួលតាំងពីពេលចាប់ផ្ដើមរហូតមកដល់ពេលបច្ចុប្បន្ន សកម្មភាពទាំងអស់នេះហើយ ដែលអាចនិយាយបានថា « ប្រជាជនខ្មែរតែងតែនៅជាមួយគ្នាជានិច្ច ជាពិសេសក្នុងគ្រាលំបាក» ។សូមបញ្ជាក់ផងដែរថា ក្នុងរយៈពេល១០ឆ្នាំ (០២ ធ្នូ ឆ្នាំ២០១២ ដល់ ១៤ ឧសភា ឆ្នាំ២០២២) ក្រោមការដឹកនាំចង្អុលបង្ហាញដោយផ្ទាល់របស់ឯកឧត្តម ហ៊ុន ម៉ានី ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី មានចំនួន៦,៧៧៩នាក់ បានចុះអប់រំផ្សព្វផ្សាយជំងឺកូវីដ-១៩ យុទ្ធនាការចាក់វ៉ាក់សាំងបង្កាកូវីដ-១៩ ក្នុងក្របខណ្ឌទូទាំងប្រទេស សង្រ្គោះបឋម យកសំណាករកវីរុសកូវីដ-១៩ និងពិនិត្យ ព្យាបាលជំងឺជូនប្រជាពលរដ្ឋដោយឥតគិតថ្លៃក្នុងក្នុង ២៥ រាជធានី-ខេត្ត នៃព្រះរាជាណាចក្រកម្ពុជា បានចំនួន ៥៨៣ លើក មានប្រជាពលរដ្ឋចូលរួមចំនួន ៨,១៧៦,០៥៦នាក់ (ប្រាំបីលាន ដប់ប្រាំពីរម៉ឺន ប្រាំមួយពាន់ ហាសិប ប្រាំមួយនាក់) ក្នុងនោះស្ត្រីមានចំនួន ៤,៣៨៣,៩៤៩នាក់ (បួនលាន សាមសិបប្រាំបីម៉ឺន បីពាន់ ប្រាំបួនរយ សែសិប ប្រាំបួននាក់) ស្មើនឹង ១ ភាគ ២ នៃប្រជាជនសរុបទូទាំងប្រទេសចំនួន ១៦,៨៤៣,៣៣៣ នាក់ (ដប់ប្រាំមួយលាន ប៉ែតសិបបួនម៉ឺន បីពាន់ បីរយ សាមសិប បីនាក់) ធៀបនឹងឆ្នាំ២០២២ ដោយសហការជាមួយ អាជ្ញាធរនៃបណ្តារាជធានី-ខេត្ត ក្រុមការងាររាជរដ្ឋាភិបាលចុះជួយរាជធានី-ខេត្ត សាខាសកម្មជនក្រុមការងារយុវជនរាជធានីភ្នំពេញ សហភាពសហព័ន្ធយុវជនកម្ពុជា យុវជនកាកបាទក្រហមកម្ពុជា យុវជនកាយរិទ្ធិកម្ពុជា មន្ទីរសុខាភិបាលខេត្ត និងអាជ្ញាធរគ្រប់ជាន់ថ្នាក់៕