ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឲ្យប្រើប្រាស់ជាផ្លូវការ «មន្ទីរពេទ្យ ហ្លួង ម៉ែ» នៅព្រឹកថ្ងៃទី១៦ ខែកញ្ញា ឆ្នាំ២០២៦នេះ, សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា មានប្រសាសន៍បញ្ជាក់ថា នាពេលខាងមុខ សម្ដេចនឹងឆ្មក់ចុះពិនិត្យតាមមណ្ឌលសុខភាពនៅម៉ោង២ទៀបភ្លឺដើម្បីប្រាកដថា ពិតជាបានបើកផ្ដល់សេវាជូនពលរដ្ឋ ២៤ម៉ោងលើ២៤ ពិតប្រាកដមែន។

សម្ដេចធិបតី នាយករដ្ឋមន្រ្ដីបានថ្លែងបញ្ជាក់បែបនេះ បន្ទាប់ពីរបាយករណ៍របស់រដ្ឋមន្រ្ដី ក្រសួងសុខាភិបាលបានបង្ហាញថា មកដល់ពេលនេះមណ្ឌលសុខភាពដែលមានលទ្ធភាព បើក ២៤ម៉ោង លើ២៤ម៉ោង នៅទូទាំងប្រទេស កើនដល់ ៩៩.៣ ភាគរយ ខណៈ ៧% ដែលនៅសល់ គឺស្ថិតនៅតាមបណ្ដាខេត្តជាប់ព្រំដែនរវាងកម្ពុជា និងថៃ ដែលមិនទាន់អាចសម្រេចបាន។

សម្ដេចធិបតី នាយករដ្ឋមន្រ្ដី បានបញ្ជាក់ថា ថ្ងៃណាមួយនៅម៉ោង ២ទៀបភ្លឺ សម្ដេចនឹងទៅដល់មុខផ្ទះរដ្ឋមន្រ្ដីសុខាភិបាលដើម្បីហៅចុះទៅពិនិត្យតាមមណ្ឌលសុខភាពថា ពិតជាបានបើកដំណើរការ ២៤ម៉ោងលើ២៤ម៉ោង ពិតប្រាកដមែន ខណៈរដ្ឋមន្រ្ដីបានអះអាងថាមណ្ឌលសុខភាពទូទាំងប្រទេសស្ទើតែ ១០០% បានបើកដំណើរការរួចហើយនោះ។

ក្នុងឱកាសនោះ សម្ដេចធិបតី បញ្ជាក់ថា កន្លងទៅ សម្ដេចបានឆ្មក់ចុះទៅពិនិត្យមើលជាក់ស្ដែងចំពោះការងារតាមវិស័យរបស់ក្រសួងស្ថាប័នមួយចំនួនរួចហើយ ក្នុងនោះមានវិស័យធនធានទឹក, វិស័យកសិកម្ម, និងទេសចរណ៍, ចំណែក វិស័យសុខាភិបាល សម្ដេចនឹងបន្តចុះទៅមើលនាពេលខាងមុខ៕