ទ្រីយ៉ាត្លុង៖ សហព័ន្ធកីឡាទ្រីយ៉ាត្លុងកម្ពុជាបានត្រៀមខ្លួន ចូលរួមប្រកួតប្រជែងលើវិញ្ញាសាចំនួន ៤ នៅក្នុងព្រឹត្តិការណ៍កីឡាថ្នាក់តំបន់អាស៊ីអាគ្នេយ៍ ស៊ីហ្គេមលើកទី៣១ នាខែវិច្ឆិកាដល់ខែធ្នូ ឆ្នាំ២០២១ នៅប្រទេសវៀតណាម ប៉ុន្តែនៅក្នុងស្ថានភាពនៃវិបត្តិជំងឺកូវីដ-១៩ ព្រឹត្តិការណ៍សហគមន៍២០កុម្ភៈកំពុងបង្កផលប៉ះពាល់ មិនអាចប្រមូលផ្តុំការហ្វឹកហាត់បានទេ ដោយបានរៀបចំកម្មវិធីហ្វឹកហាត់នៅតាមផ្ទះរៀងៗខ្លួន ដើម្បីថែរក្សាថាមពលកម្លាំង និងគុណភាពបច្ចេកទេសកុំឲ្យធ្លាក់ចុះខ្លាំងពេក។
លោក ងិន សុខបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជា បញ្ជាក់កាលពីថ្ងៃទី១៩ ខែមីនា ឆ្នាំ២០២១ ថា វិញ្ញាសាចំនួន ៤ ដែលកម្ពុជាត្រៀមចូលរួមប្រកួតនេះរួមមាន៖ ១-វិញ្ញាសាទ្រីយ៉ាត្លុងស្តង់ដារអន្តរជាតិចំនួន ២វិញ្ញាសាបុរស-នារី ដែលត្រូវហែលទឹកចម្ងាយ ១៥០០ម៉ែត្រ-ជិះកង់ ៤០គីឡូម៉ែត្រ និងបន្តរត់ ៥គីឡូម៉ែត្រ។ ២-វិញ្ញាសាឌូយ៉ាត្លុងបុរស-នារីមានរត់ ១០គីឡូម៉ែត្រ-ជិះកង់ ៤០គីឡូម៉ែត្រ និងរត់ ៥គីឡូម៉ែត្រ។ លោកបន្តថា បច្ចុប្បន្នក្រុមជម្រើសជាតិទ្រីយ៉ាត្លុងមានសរុបចំនួន ១៤នាក់ក្នុងនោះមានកីឡាករ ៩នាក់ និងកីឡាការិនី ៥នាក់ និងគ្រូបង្វឹក ៤នាក់ ក្នុងនោះមានគ្រូបរទេសថ្មីម្នាក់ជាជនជាតិណូវែលសេឡង់ ដែលទើបនឹងមកជួយដល់ការបង្វឹក របស់ក្រុមជម្រើសជាតិកម្ពុជា។ ពេលនេះក្រុមជម្រើសជាតិទ្រីយ៉ាត្លុង កំពុងបន្តការហ្វឹកហាត់នៅតាមផ្ទះរៀងៗខ្លួន ដោយសារស្ថានភាពវិបត្តិជំងឺកូវីដ-១៩ នៅតែបង្កផលប៉ះពាល់ខ្លាំងនោះទើបក្រសួងអប់រំ យុវជន និងកីឡាប្រកាសរំសាយការហ្វឹកហាត់ លក្ខណៈប្រមូលផ្តុំជាបណ្ដោះអាសន្ន។
អ្វីដែលចាំបាច់ក្នុងស្ថានភាពនេះ គឺគ្រូបង្វឹកជម្រើសជាតិបានរៀបចំកម្មវិធីហ្វឹកហាត់ច្បាស់លាស់ ប្រចាំថ្ងៃនៅតាមផ្ទះសិន ដើម្បីថែរក្សាកម្លាំងកុំឲ្យធ្លាក់ចុះខ្លាំងពេក ហើយការត្រួតពិនិត្យការហ្វឹកហាត់របស់កីឡាករ-កីឡាការិនីពីគ្រូបង្វឹកធ្វើឡើងតាមប្រព័ន្ធអនឡាញ។ លោក ងិន សុខបញ្ញា បានលើកឡើងទៀតថា ក្រសួងអប់រំ យុវជន និងកីឡា ក៏ដូចជាគណៈកម្មាធិការជាតិអូឡាំពិកកម្ពុជា តែងតែផ្តល់ជាការលើកទឹកចិត្ត ធ្វើយ៉ាងណាជំរុញឲ្យកីឡាករ- កីឡាការិនីជម្រើសជាតិនានា បង្កើនការហ្វឹកហាត់នៅតាមផ្ទះនេះឲ្យបានខ្លាំងក្លា តាមកម្មវិធីដែលបានរៀបចំដើម្បីត្រៀមស៊ីហ្គេមចុងឆ្នាំ២០២១ នេះ ពីព្រោះថា ពេលវេលាកាន់តែកៀកហើយ ដែលជាក្តីបារម្ភយ៉ាងខ្លាំងដល់ការអភិវឌ្ឍបច្ចេកទេសផងដែរ៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
