ភ្នំពេញ៖ បងប្អូនប្រជាពលរដ្ឋខ្មែរ ដែលកំពុងរស់នៅតំបន់អឺរ៉ុប បានសម្តែងការស្វាគមន៍ចំពោះដំណើរទស្សនកិច្ច របស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា ទៅកាន់ប្រទេសស្វីសនាថ្ងៃទី២០ ខែឧសភា ឆ្នំា២០២២ខាងមុខនេះ ដើម្បីចូលរួមវេទិកាសេដ្ឋកិច្ចពិភពលោកដែលនឹងប្រព្រឹត្តទៅនាថ្ងៃទី២២-២៦ ខែឧសភា ឆ្នាំ២០២២ នៅទីក្រុងDavos ប្រទេសស្វីសជាមួយនឹងការពិភាក្សាជាក្រុម ស្តីពីបទពិសោធន៍អាស៊ាន ខណៈដំណើរទស្សនកិច្ចនេះសម្តេចតេជោ ក៏នឹងជួបសំណេះសំណាល និងសួរសុខទុក្ខដល់បងប្អូនខ្មែរ ដែលរស់នៅទីនោះរាប់ពាន់នាក់ដែរនោះ។
តាមរយៈវីដេអូឃ្លីបរបស់បងប្អូនប្រជាពលរដ្ឋខ្មែរ ដែលកំពុងរស់នៅប្រទេសបារាំង អាលីម៉ង់ ប្រទេសស្វីស និងប្រទេសមួយចំនួនទៀតនៅក្នុងតំបន់អឺរ៉ុបនេះបានលើកឡើងថា ពួកគេពិតជាសប្បាយរីករាយយ៉ាងខ្លាំងបន្ទាប់ពីដឹងដំណឹងថា សម្តេចតេជោ ហ៊ុន សែន មគ្គុទេសគ៍ឯករបស់កម្ពុជានឹងដឹកនាំគណៈប្រតិភូទៅកាន់ប្រទេសស្វីសនាពេលខាងមុខនេះ ហើយបងប្អូនខ្មែរដែលរស់នៅទីនោះនឹងរង់ចាំទទួលស្វាគមន៍យ៉ាងកក់ក្តៅក្រៃលែងចំពោះដំណើរទស្សនកិច្ចរបស់សម្តេចតេជោនេះជានិច្ច។
តាមរយៈវីដេអូឃ្លីបរបស់បងប្អូនប្រជាពលរដ្ឋ ដែលកំពុងរស់នៅក្នុងតំបន់អឺរ៉ុបទាំងនោះ បានលើក ឡើងថា ក្នុងដំណើរទស្សនកិច្ចរបស់សម្តេចតេជោ ហ៊ុន សែន នាយករដ្ឋមន្រ្តីនេះ នឹងទទួលបានជោគគ្រប់ភារកិច្ចទាំងអស់ ខណៈកិច្ចប្រជុំដ៏ធំមួយនេះនឹងមានថ្នាក់ដឹកនាំបណ្តាប្រទេសនៅលើពិភពលោកចូលរួមនោះ។ បងប្អូនប្រជាពលរដ្ឋខ្មែរដែលកំពុងរស់នៅទីនោះក៏បានជូនពរដល់សម្តេចតេជោ ហ៊ុន សែន នាយករដ្ឋមន្រ្តីមានសុខភាពល្អបរិបូរ ដើម្បីបន្តដឹកនាំប្រទេសកម្ពុជាឲ្យកាន់តែមានសុខសន្តិភាព និងការអភិវឌ្ឍលើគ្រប់វិស័យបន្ថែមទៀតផងដែរ៕ អត្ថបទ៖ បាន ចក់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
