​ប្រណាំង​យានយន្ត៖ ការ​ប្រណាំង​យានយន្ត​ឆ្លងកាត់​ឧបសគ្គ​ខ្មែរ​រ៉ា​លី​រ៉េដ ឬ KHMER RALLY RAID PRACTICE ឆ្នាំ​២០២២ ទទួលបាន​ជោគជ័យ​ខ្លាំង​នៅ​ថ្ងៃ​ទី​១ កីឡាករ-កីឡា​ការិនី​ធ្វើ​បាន​ល្អ រីឯ​ក្រុមការងារ​ក៏​ដូចគ្នា​លើ​ចម្ងាយ​ផ្លូវ​ពី​ភ្នំពេញ​ឆ្ពោះទៅកាន់​ខេត្តកំពតមាន​រយៈ​ចម្ងាយ​ផ្លូវ ១៧៣​គីឡូម៉ែត្រ ហើយ​ផ្លូវ​ប្រណាំង​មាន​ចម្ងាយ​ផ្លូវ​ ៦៩​គីឡូម៉ែត្រ នេះ​ជា​បញ្ជាក់​របស់លោក ហូ សិទ្ធី​គុណ ស្ថាបនិក KARA កម្ពុជា។

​ស្ថាបនិក KARA រូបនេះបានបញ្ជាក់​បន្ថែមថា ការរៀបចំ​ផ្លូវ​ប្រណាំង​បានល្អ និង​ច្បាស់លាស់​ ៩៥% ដែល​ធ្វើអោយ​កីឡាករ-កីឡាការិនី​ទាំងថ្មី និង​ចាស់​វង្វេង និង​ចំណាយ​ពេលវេលា​ច្រើន។ ចំពោះ​គណកម្មការ​រៀបចំមាន​ចំនុច​ខ្វះ​ខាត​​តិចតួច​ទាក់ទង​នឹង​ពេលវេលា រីឯ​បច្ចេកទេស​វិញ​គឺ​ល្អប្រសើរ​។​ ​លោក​បាន​គូ​បញ្ជាក់ទៀតថា ព្រឹត្តិការណ៍​ប្រណាំង​នេះ​រៀបចំឡើង ក្នុង​គោលបំណង​លើកស្ទួយ​វិស័យ​កីឡា​យានយន្ត​នៅ​កម្ពុជា ហើយក៏​ជាការ​ផ្តល់ឱកាស​ឲ្យ​កីឡាករ​ជំនាញ​ប្រកួត​កម្តៅ​សាច់ដុំ និង​អ្នកថ្មី​ចេះ​មើលសៀវភៅ​បង្ហាញផ្លូវ និង Rally Meters ជាពិសេស​ឲ្យ​យុវជន​បាន​រៀន​ពី​ការរៀបចំ​កម្មវិធី​ប្រណាំង​យានយន្ត​ឆ្លងកាត់​ឧបសគ្គ​កម្រិត​ជាតិ និង​ឈានទៅ​រៀបចំ​កម្រិត​អន្តរជាតិ​ផងដែរ។

​ដោយឡែក​កីឡាករ-កីឡាការិនីបាន​សរសើរ​ថា ការរៀបចំ​ផ្លូវ​នេះ​បានល្អ ពិបាក វង្វេង​ច្រើន តែ​សប្បាយ មាន​ទេស​ភាព​ស្រស់ស្អាតទាក់ទាញ​ខ្លាំង ហើយ​ពួកគេ​សន្យាថា​នឹងចូលរួម​ទៀត ជាពិសេស​បើកបរ​ដោយ​ខ្លួនឯង។​ សូម​​បញ្ជាក់ថា ព្រឹត្តិការណ៍​ប្រណាំង​យានយន្ត​ឆ្លងកាត់​ឧបសគ្គខ្មែរ​រ៉ា​លី​រ៉េដ ឬ KHMER RALLY RAID PRACTICE រៀបចំ​ដោយ​ភ្នាក់ងារ​រៀបចំ​ការប្រកួត​កម្ពុជា Kara សហការ​ដោយ​ក្រសួងបរិស្ថាន សហ​ភាព​សហព័ន្ធ​យុវជន​កម្ពុជា គាំទ្រ​ដោយ​សហព័ន្ធ​កីឡា​យានយន្ត​កម្ពុជា។ មាន​ប្រទេស​ចូលរួម​ចំនួន​ ១១​ប្រទេស​ចូលរួមក្នុងនោះ​មានឡាន ៣៥ ចែកជា​២ គឺ class A ៧​គ្រឿង, Class B ២៨​គ្រឿង, UTV មាន ​១០​គ្រឿង និង​ម៉ូតូ​ ១៤​គ្រឿង៕

អត្ថបទ៖ លី ឈុនឡា