កំពង់ស្ពឺ៖ ក្នុងឱកាសដឹកនាំប្រតិភូ ចូលរួមកិច្ចប្រជុំផ្លាស់ប្ដូរកិច្ចសហប្រតិបត្តិការសេដ្ឋកិច្ច និង​ពាណិជ្ជ​កម្មអាស៊ាន-ហួយហ្វា នៅទីក្រុងណាននីង តំបន់ស្វយ័តក្វាងស៊ី នៃប្រទេសចិន ឯកឧត្តម​បណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានជួបពិភាក្សាការងារ​ជាមួយ​អ្នក​វិនិយោគ​ចិន ​ក៏ដូចជាកៀរគរការវិនិយោគបន្ថែម នៅក្នុងប្រទេសកម្ពុជា ។

ក្នុងជំនួបជាមួយអ្នកវិនិយោគចិន កាលពីថ្ងៃទី១៦ ខែកញ្ញា ឆ្នាំ២០២៦ ឯកឧត្តមបណ្ឌិត ជាម ច័ន្ទសោភ័ណ មានប្រសាសន៍ថា ខេត្តកំពង់ស្ពឺ ស្ថិតនៅកណ្តាលប៉ូលសេដ្ឋកិច្ច (ភ្នំពេញ-ព្រះសីហនុ) ដែលមានអំណោយផលទៅដល់ការដឹកជញ្ជូន ខណៈខេត្តមួយនេះ មានវិស័យជាអាទិភាពចំនួន៤ ក្នុងនោះមានវិស័យកសិកម្ម វិស័យឧស្សាហកម្ម វិស័យទេសចរ និងវិស័យកសិ-ទេសចរ ហើយបាននិងកំពុងទាក់ដួងចិត្ត អ្នកវិនិយោគគ្រប់ជាតិសាសន៍ ឱ្យទៅបោះទុនវិនិយោគជាហូរហែរ ។

ឯកឧត្តមបានបន្តថា គិតមកទល់ពេលនេះខេត្តកំពង់ស្ពឺ មានការរីកចម្រើនខ្លាំង ហើយជាខេត្តស៊ីវិល័យ ដោយបានរុញច្រាននូវទស្សនៈអវិជ្ជមាន របស់អ្នកមួយចំនួន ដែលតែងចំអកមើលងាយជាខេត្តក្រខ្សត់ គ្មានចំណេះដឹងឱ្យទៅឆ្ងាយ ហើយទទួលស្គាល់ជាខេត្តដែលមានការអភិវឌ្ឍន៍លឿន ហើយធុរជនគ្រប់ជាតិសាសន៍ បានដាក់ទុករកស៊ីក្នុងខេត្តនេះ ដោយទំនុកចិត្ត ភាគច្រើនជាធុរជនចិនដែលបច្ចុប្បន្នមានប្រមាណជាង ៩០ភាគរយ ។

អភិបាលខេត្តកំពង់ស្ពឺ បានបន្ថែមថា នាពេលបច្ចុប្បន្ននេះ ខេត្តកំពង់ស្ពឺមានរោងចក្រសហគ្រាសប្រមាណជិត ៣ពាន់រោងចក្រ សហគ្រាស និងកម្មករ កម្មការិនីកំពុងបំពេញការងារប្រមាណជាង ៤០ម៉ឺននាក់ ដែលនេះនៅមិនទាន់គិតពីពលរដ្ឋ ដែលកំពុងបំពេញការងារនៅតាមកសិដ្ឋានចិញ្ចឹមសត្វ និងវិស័យកសិកម្ម និងការងារក្រៅប្រព័ន្ធជាច្រើនទៀត ។

ជាមួយនឹងអត្រាខ្ពស់ នៃការបោះទុនវិនិយោគក្នុងខេត្តកំពង់ស្ពឺ ឯកឧត្តមបណ្ឌិត ជាម ច័ន្ទសោភ័ណ បានបញ្ជាក់ថា ដោយសារតែអ្នកវិនិយោគ មានការជឿជាក់លើការដឹកនាំ របស់រាជរដ្ឋាភិបាលកម្ពុជា ក្នុងការធានាបាននូវសន្តិសុខ សុវត្ថិភាពជូនធុរជន ជាពិសេសគឺរដ្ឋបាលខេត្តកំពង់ស្ពឺ បានខិតខំក្នុងការសម្របសម្រួល គ្រប់នីតិវិធីដល់អ្នកវិនិយោគ តាំងពីចាប់ផ្តើមរហូតដល់ដំណើរការជាផ្លូវការ ។ ទោះបីជាកំណើនអ្នកវិនិយោគកើនឡើងជារៀងរាល់ថ្ងៃ សក្តានុពលនៃខេត្តកំពង់ស្ពឺ នៅតែមិនទាន់បានប្រើប្រាស់អស់សក្តានុពលនោះទេ ដូច្នេះធុរជនចិនអាចបន្តដាក់ទុនវិនិយោគក្នុងខេត្តនេះ បានច្រើនបន្តទៀតលើវិស័យអាទិភាពទាំង ៤ខាងលើ ដើម្បីទទួលឱកាសចំណេញ ។

ក្រោយទទួលបានការលើកឡើងរបស់ អភិបាលខេត្តកំពង់ស្ពឺ ក្រុមអ្នកវិនិយោគចិន ក៏បានបង្ហាញនូវចំណាប់អារម្មណ៍លើវិស័យអាទិភាពចំនួនបី នៃខេត្តនេះ គឺវិស័យទេសចរ វិស័យកសិកម្ម និងវិស័យឧស្សាហកម្ម ដោយជុំវិញការចាប់អារម្មណ៍នេះ អ្នកវិនិយោគចិនក៏បានបញ្ជាក់ប្រាប់ថា នឹងគៀងគរបន្ថែមដល់អ្នកវិនិយោគផ្សេងទៀត ចុះមកសិក្សាស្វែងយល់ ក្នុងពេលដ៏ខ្លីខាងមុខ ពីសក្តានុពល និងជ្រើសយកខេត្តកំពង់ស្ពឺ ជាខេត្តគោលដៅសម្រាប់វិនិយោគ ៕ អត្ថបទ បាន សុខរិទ្ធិ