បាល់ទាត់៖ ក្រុមបាល់ទាត់ម្ចាស់ផ្ទះវៀតណាមបានកក់កៅអី នៅវគ្គពាក់កណ្តាលផ្តាច់ព្រ័ត្រលើវិញ្ញាសាបាល់ទាត់ នៅព្រឹត្តិការណ៍កីឡាស៊ីហ្គេមហើយ ក្រោយយកឈ្នះទីម័រឡេស្តេ ២-០ ក្នុងពូល A។
ពីរគ្រាប់ជ័យជំនះរបស់វៀតណាមត្រូវរង់ចាំដល់វគ្គទី២ នាទីទី៥៣ ទើប Nguyen Van Tung រកបានគ្រាប់នាំមុខ និងមួយគ្រាប់ទៀតនៅនាទីទី៦៥ ដោយ Ho Thanh Minh។ បីពិន្ទុនេះបានធ្វើឱ្យវៀតណាមបញ្ចប់ការប្រកួតក្នុងពូលជាក្រុមលេខ ១ ក្រោយលេង ៤ប្រកួតមាន ១០ពិន្ទុ។ នេះជាលើកទី៧ ហើយដែលក្រុម U23 វៀតណាមបានឈានឡើងវគ្គពាក់កណ្តាលផ្តាច់ព្រ័ត្រស៊ីហ្គេមគិតចាប់ពីឆ្នាំ២០០១ ដែលវិញ្ញាសាបាល់ទាត់ត្រូវចូលរួមដោយក្រុម U23។ ក្នុងចំណោមវគ្គពាក់កណ្តាលផ្តាច់ព្រ័ត្រទាំង ៧លើកវៀតណាមឆ្លងផុតឡើងដល់វគ្គផ្តាច់ព្រ័ត្រ ៤ និងបរាជ័យ ៣លើក។
៤លើកដែលឡើងដល់វគ្គផ្តាច់ព្រ័ត្រវៀតណាមចាញ់ថៃ ២លើក និងចាញ់ម៉ាឡេស៊ី ១លើក ខណៈ ១លើកទៀតយកឈ្នះឥណ្ឌូនេស៊ីនៅវគ្គផ្តាច់ព្រ័ត្រ ដណ្តើមបានមេដាយមាសកាលពីស៊ីហ្គេមលើកទី៣០ ឆ្នាំ២០១៩ នៅហ្វីលីពីន។ ចំណែកមួយគូទៀតម្សិលមិញដែរ ឥណ្ឌូនេស៊ីបានបិទបញ្ចប់ការប្រកួតក្នុងពូលដោយយកឈ្នះមីយ៉ាន់ម៉ា ៣-១ ទទួលបាន ៣ពិន្ទុធានាកៅអីនៅវគ្គពាក់កណ្តាលផ្តាច់ព្រ័ត្រផងដែរ។ សំរាប់ពូល B ប្រកួតបញ្ចប់ថ្ងៃនេះដោយថៃជួបឡាវ និងម៉ាឡេស៊ីជួបកម្ពុជាផ្សាយផ្ទាល់ពី BTV៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
