ភ្នំពេញ៖ បណ្តាក្រុមប្រឹក្សាឃុំសង្កាត់នៅក្នុងអណតិ្តទី៤ នៅរាជធានីភ្នំពេញ និងខេត្តកណ្តាល បានអះអាងថា នៅក្នុងមូលដ្ឋានឃុំសង្កាត់របស់ខ្លួនទទួលបានកញ្ចប់គម្រោងអភិវឌ្ឍន៍មូលដ្ឋាន​ជាច្រើនពីរាជរដ្ឋាភិបាល ពីក្រុមការងារចុះជួយមូលដ្ឋានរបស់គណបក្សប្រជាជនកម្ពុជា និងពីបណ្តាសប្បុរសជននានា ក្នុងការធ្វើផ្លូវកៅស៊ូ ធ្វើប្រឡាយ ដាក់លូបង្ហូរ សម្អាតបរិស្ថាន និងការអភិវឌ្ឍសំណង់ហេដ្ឋានរចនាសម្ព័ន្ធឃុំសង្កាត់នានាទៀត ដើម្បីជម្រុញជីវភាពប្រជាពលរដ្ឋភាពរីកចំរើន។

បើតាមលោក លីវ វណ្ណផេង ប្រធានក្រុមប្រឹក្សាសង្កាត់ព្រែកថ្មី នៅរាជធានីភ្នំពេញ បានថ្លែងប្រាប់​BTV​នៅថ្ងៃទី១៦ ខែឧសភានេះថា ​នៅក្នុងអណត្តិទី៤ ដែលលោកបាននិងកំពុងដឹកនាំ​សង្កាត់​ព្រែកថ្មី ​ដែលកើតចេញពីបោះឆ្នោតជ្រើសរើសក្រុមប្រឹក្សាឃុំសង្កាត់នេះ គឺសង្កាត់របស់លោក​បាន​ធ្វើការអភិវឌ្ឍធ្វើពីផ្លូវដីទៅផ្លូវបេតុងបានច្រើនលើសការរំពឹងទុក បើទោះណាគម្រោង​អភិវឌ្ឍន៍នោះ​ការអនុវត្តមានការធ្លាក់ចុះបន្តិច នៅក្នុងឆ្នាំ២០២១ ដោយយើងទាំងអស់គ្នាជាប់​រវល់​ធ្វើការងារ​ប្រយុទ្ធ​ប្រឆាំង​ការរាតត្បាតកូវីដ១៩ នៅក្នុងសហគមន៍។

ដោយឡែក បើតាមលោក គង់ អិត ចៅសង្កាត់ស្វាយរលំ នៅក្នុងទឹកដីខេត្តកណ្តាលវិញថា នៅក្នុងសង្កាត់របស់លោក ​ក៏ទទួលបានកញ្ចប់គម្រោងអភិវឌ្ឍន៍ច្រើនដែរ ​ដូចជា ការ​ស្ថាបនា​ពីផ្លូវដីទៅផ្លូវបេតុង គម្រោងជីព្រែក ដាក់លូ គម្រោងសំអាតបរិស្ថាន សុខភាព ហើយ​គម្រោង​ភាគច្រើនយើងទទួលបានឧបត្ថម្ភគាំទ្រពីរាជរដ្ឋាភិបាល​ ពីរដ្ឋបាលសាលាខេត្តកណ្តាល ពី​ក្រុមការងារគណបក្សប្រជាជនកម្ពុជា ​និង​សប្បុរសជន​នៅក្នុងមូលដ្ឋាន។

ឯកឧត្តម ង៉ាន់ ចំរើន រដ្ឋលេខាធិការក្រសួងមហាផ្ទៃ បានថ្លែងថា ក្នុងមួយឆ្នាំៗ រាជរដ្ឋាភិបាល តាមរយៈគណៈកម្មការជាតិសម្រាប់អភិវឌ្ឍន៍តាមបែបប្រជាធិបតេយ្យនៅថ្នាក់ក្រោមជាតិ គ.ជ.អ.ប រៀបចំ​កញ្ចប់​គម្រោងអភិវឌ្ឍន៍ឃុំសង្កាត់​ទំលាក់​ទៅអោយរដ្ឋបាលឃុំសង្កាត់​ប្រមាណ​ជាង​ ១៦០០​គម្រោង​ ហើយគម្រោងអភិវឌ្ឍន៍​ភាគច្រើនជាដេញថ្លៃ ​ស្ថាបនាផ្លូវ ធ្វើទំនប់ និងគម្រោង​ស្តារប្រឡាយជាដើម ។

ឯកឧត្តម បន្តថា បច្ចុប្បន្ននៅទូទាំងប្រទេសមានឃុំសង្កាត់ប្រមាណជាង ​១៦០០ឃុំសង្កាត់ ហើយ​គ្រប់ឃុំសង្កាត់ដែលទទួលបានគម្រោងអភិវឌ្ឍន៍គឺបាន​កើតឡើង​ដោយសារ ពលរដ្ឋនៅតាម​ឃុំសង្កាត់​បានជួបប្រជុំជាមួយថ្នាក់ដឹកនាំក្រុមប្រឹក្សាឃុំសង្កាត់ ​រៀបចំ​គម្រោង​ដាក់ស្នើ​ទៅ​រដ្ឋបាលថ្នាក់​ជាតិ ​ដើម្បីស្នើការអភិវឌ្ឍមូលដ្ឋានខ្លួនរបស់ខ្លួន៕អត្ថបទស៊ុម សុខជា