ភ្នំពេញ៖ ខណៈការឃោសនាបោះឆ្នោតជ្រើសរើសក្រុមប្រឹក្សាឃុំ/សង្កាត់ នឹងត្រូវចាប់ផ្តើមពីថ្ងៃទី២១ ខែឧសភា ដល់ថ្ងៃទី៣ ខែមិថុនា ឆ្នាំ២០២២ គណបក្សនយោបាយ ដែលបានដាក់បេក្ខជនប្រកួតប្រជែង បានត្រៀមលក្ខណៈរួចរាល់ និងគោរពតាមលក្ខខណ្ឌកំណត់របស់គណៈកម្មាធិការជាតិរៀបចំការបោះឆ្នោត។

លោក សុខ ឥសាន្ត អ្នកនាំពាក្យគណបក្សប្រជាជនកម្ពុជា នៅថ្ងៃទី១៦ ខែឧសភានេះ បានប្រាប់ BTVថា ការឃោសនាបោះឆ្នោតជ្រើសរើសក្រុមប្រឹក្សាឃុំ/ សង្កាត់ អាណត្តិ​ទី៥ ដែលចាប់ផ្តើម​ក្នុង​ពេលឆាប់ៗនេះ បក្សប្រជាជនកម្ពុជា​ បានត្រៀមលក្ខណៈរួចរាល់។

លើសពីនេះ ​លោក​បានលើកឡើង​ពី​គោលនយោបាយរបស់គណបក្ស ដើម្បីទាក់ទាញ​ប្រជាប្រិយភាព ​ពីប្រជាពលរដ្ឋ ​ផ្តល់ទំនុកចិត្តបោះឆ្នោតជូនគណបក្សប្រជាជនកម្ពុជាផងដែរ។

លោក ញឿន រ៉ាដែន​ អ្នក​នាំពាក្យគណបក្ស​ហ៊្វុនស៊ិនប៉ិច ​បានលើកដែរថា បក្សហ៊្វុនស៊ិនប៉ិច នឹង​គោរព​តាមការណែរបស់គ.ជ.ប ​ដែលជាស្ថាប័ន ឯករាជ្យ អព្យាក្រឹត សច្ចៈ យុត្តិធម៌ ​និង​តម្លាភាព ដែល​ផ្តល់ឱកាសដល់គណបក្សនយោបាយមានសិទ្ធិស្មើៗគ្នា​ក្នុងការប្រកួតប្រជែង។

លោក បានបញ្ជាក់ថា ​លទ្ធិប្រជាធិបតេយ្យនៅកម្ពុជា ​គឺមានស្ថានភាពល្អប្រសើរ ព្រោះគណបក្ស​នយោបាយមានសិទ្ធស្មើៗគ្នា។

សេចក្តីជូនដំណឹងរបស់គណៈកម្មាធិការជាតិរៀបចំការបោះឆ្នោត​ បានបញ្ជាក់ថា ការ​ឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់ នឹងត្រូវចាប់ផ្តើមពីថ្ងៃទី២១ ​ខែឧសភា ដល់ថ្ងៃទី៣ ​ខែមិថុនា ឆ្នាំ២០២២។ ​ការឃោសនាបោះឆ្នោត នឹង​ត្រូវធ្វើឡើងជាសាធារណៈ ដើម្បី​បញ្ចុះបញ្ចូល​អ្នក​បោះឆ្នោតឱ្យបោះឆ្នោតគាំទ្របេក្ខជន​ ឬគណបក្សនយោបាយណាមួយ។ ក្រៅពីនេះ គ.ជ.ប​ បានអំពាវនាវដល់គ្រប់គណបក្សនយោបាយ ​ដែលបានចុះបញ្ជីបេក្ខជន នៃ​គណបក្សនយោបាយផ្លូវការ ​និងបេក្ខជនឈរឈ្មោះបោះឆ្នោត ​ត្រូវគោរពច្បាប់​ បទបញ្ជា​ និងនីតិវិធី នៃការ​បោះឆ្នោត ​និងក្រមសីលធម៌ ដែលបានកំណត់ដោយ គ.ជ.ប។

ការបោះឆ្នោតជ្រើសរើសក្រុមប្រឹក្សាឃុំ/សង្កាត់ អាណត្តិទី៥ នឹងប្រព្រឹត្តទៅនៅថ្ងៃទី៥​ ខែមិថុនា ឆ្នាំ២០២២ ​ដោយមានគណបក្សចូលរួមប្រកួតប្រជែងចំនួន១៧ ​ក្នុងចំណោមនេះ មានតែ​គណបក្សប្រជាជនកម្ពុជា តែមួយប៉ុណ្ណោះ ដែលបានដាក់បេក្ខជនទូទាំងឃុំ/សង្កាត់ នៅទូទាំងប្រទេសកម្ពុជា៕អត្ថបទ៖ ទូច សោភ័ណ