ភ្នំពេញ៖ យុវជន សិស្ស និស្សិត សិល្បករ មកពីបណ្តារាជធានី-ខេត្ត ចូលរួមបង្ហាញស្នាដៃសិល្បៈ ក្នុងព្រឹតិ្តការណ៍មហោស្រពសិល្បៈជាតិ គំនូរវិចិត្រកម្មពណ៌ទឹក ក្រោមប្រធានបទ៖ «ជីវិត និងធម្មជាតិ» រយៈពេល០៣ថ្ងៃ ចាប់ពីថ្ងៃទី១៨-២០ ខែឧសភា ឆ្នាំ២០២២ នៅក្នុងបរិវេណ សាលសន្និសីទចតុម្មុខ។

លោក ឈឹម សុធី ប្រធាននាយកដ្ឋានសិល្បៈសូនរូប និងសិល្បៈសិប្បកម្ម នៃក្រសួងវប្បធម៌ និងវិចិត្រសិល្បៈ បានប្រាប់BTV ព័ត៌មាន នាថ្ងៃនេះថា ជាទូទៅនាយកដ្ឋានសិល្បៈសូនរូប និងសិល្បៈសិប្បកម្ម បានជ្រើសរើសនូវប្រធានបទប្លែកៗ ផ្សេងៗគ្នា និងទម្រង់ខុសៗគ្នា នៅក្នុងវិស័យសិល្បៈសូនរូប និងសិល្បៈសិប្បកម្ម មកប្រកួតប្រជែង និងដាក់ជូននូវប្រធានបទប្លែកៗ ដល់សិល្បករ សិប្បករ ដើម្បីឲ្យបានចូលរួមប្រកួតប្រជែង។

ជារៀងរាល់ឆ្នាំយើងមានប្រធានបទ ដូចជា៖ ចម្លាក់ស្បែក មុខខ្មុក ចម្លាក់ឈើ ចម្លាក់ស្ពាន់ ក៏ដូចជាគំនូរវិចិត្រកម្ម និងគំនូរទំនើប ​បានប្រព្រឹត្តទៅច្រើនលើករួចមកហើយ។ ដោយឡែកនៅក្នុងឆ្នាំ២០២២នេះ ​ដោយជ្រើសរើស​នូវប្រធានបទ ទាក់ទង​នឹង​គំនូរ​វិចិត្រកម្មពណ៌ទឹក។

បច្ចុប្បន្នគំនូរវិចិត្រកម្មពណ៌ទឹក មានការរីកចម្រើន ក្នុងនាមលោក ជាប្រធាននាយកដ្ឋាន និងជាអ្នករៀបចំកម្មវិធីមហោស្រពសិល្បៈជាតិ គំនូរវិចិត្រកម្មពណ៌ទឹក ក្រោមប្រធានបទ៖ «ជិវិត និងធម្មជាតិ» បានមូលមតិគ្នា ជ្រើសរើសនូវប្រធានបទនេះ​ ដើម្បីដាក់ជូនបេក្ខជន បេក្ខនារី ជូនប្អូនៗយុវជន «គូរ»។

ជាលទ្ធផលយើងទទួលបានស្នាដៃ ចំនួន៦០ស្នាដៃទូទាំងប្រទេស​ ដែលបានផ្ញើមកពីមនី្ទរវប្បធម៌ និង​វិចិត្រសិល្បៈរាជធានី-ខេត្ត ជាពិសេសប្អូនៗនៅសាកលវិទ្យាល័យភូមិន្ទវិចិត្រសិល្បៈ និងអង្គការ សមាគម សិល្បៈដទៃទៀតផងដែរ។ ហើយក្នុងចំណោម៦០ស្នាដៃនោះ គណៈកម្មការរៀបចំមហោ​ស្រពសិល្បៈជាតិ ​បានជ្រើសរើសជ័យលាភីលេខ១ ​លេខ២​ និងលេខ៣ និងស្នាដៃល្អបន្ទាប់ ជ្រើសរើស​យកចំនួន៣ស្នាដៃបន្ថែមទៀត ​ជាស្នាដៃសិល្បៈលំដាប់កិតិ្តយស និងជាង៥០ស្នាដៃទៀត ជាស្នាដៃសិល្បៈលំដាប់លើកទឹកចិត្ត ទន្ទឹមនោះ​ក្នុងមហោស្រពរយៈពេល០៣ថ្ងៃនេះដែរ ក៏មានការតាំងពិព័រណ៌ផលិតផលស្នាដៃសិល្បៈទូទៅគ្រប់ទម្រង់ផងដែរ។

ក្នុងកម្មវិធីមហោស្រពនេះ ក្នុងនាមក្រសួងវប្បធម៌ លោក ឈឹម សុធី សូមឲ្យអ្នកចូលរួមគ្រប់រូបមេត្តា​យកចិត្តទុកដាក់គោរពនូវវិធានការរបស់ក្រសួងសុខាភិបាល ​និង៣កុំ ៣ការពារ ដើម្បីការពារទប់ស្កាត់ការរីករាលដាលនៃជំងឺកូវីដ-១៩៕អត្ថបទ៖ រដ្ឋា