​អ៊ុយក្រែន៖ រយៈពេល​បី​ថ្ងៃ​បន្ទាប់ពី​មជ្ឈមណ្ឌល​ជំនួយ​រង​ការវាយប្រហារ​ដោយ​ការវាយលុក​របស់​រុស្ស៊ី ក្រុម​អ្នក​ពន្លត់អគ្គីភ័យ​នៅតែ​បន្ត​ពន្លត់ភ្លើង​ដែល​នៅ​សេសសល់​ នៅក្នុង​មជ្ឈមណ្ឌល​វប្បធម៌​មួយ​នៅក្នុង​ភូមិ Derhachi ភាគ​ខាងជើង​ទីក្រុង Kharkiv ជាទី​ក្រុង​ធំ​ទី​ពីរ​របស់​អ៊ុយ​ក្រែ​ន។

អគារ​នេះ​ត្រូវ​បាន​ប្រែក្លាយ​ទៅជា​ទីតាំង​ចែកចាយ​ជំនួយ ហើយ​ពេលនេះ​ត្រូវបាន​បំផ្លាញ​ទាំងស្រុង​ដោយ​ការ​បាញ់​ផ្លោង​។​ ​លោក Vyacheslav Zadorenko អភិបាលក្រុង Derhachi និយាយ​ថា ទីក្រុង​របស់​លោក​បាន​រង​ការបាញ់​ផ្លោង​ជាច្រើនលើក ហើយ​មជ្ឈមណ្ឌល​ចែកចាយ​ជំនួយ​ក្រោយមក​ត្រូវបាន​វាយប្រហារ​ដោយ​គ្រាប់​រ៉ុក្កែត​ Uragan បណ្តាល​ឱ្យ​អគារ​កម្ពស់​បី​ជាន់​ដួល​រលំ​ទាំងស្រុង​។ ការ​បាញ់​ផ្លោង​ដោយ​គ្រាប់​រ៉ុក្កែត​មិន​បណ្តាល​ឲ្យ​មាន​អ្នក​ស្លាប់​នោះ​ទេ វា​បាន​កើតឡើង​នៅ​ពេល​យប់ ដូច្នេះ​មនុស្ស​នៅ​ក្នុង​បន្ទប់​ក្រោម​ដី​ភាគច្រើន​មាន​របួស​តិចតួច​ប៉ុណ្ណោះ​។​

​កងកម្លាំង​រុស្ស៊ី​បាន​នឹង​កំពុង​ដកថយ​ពី​ភាគ​ខាងជើង​ក្រុង Kharkiv ក្រោយ​ការវាយប្រហារ​ប្រឆាំង​តបរបស់​អ៊ុយ​ក្រែ​ន​។ យោធា​អ៊ុយ​ក្រែ​ន​បាន​និយាយ​ថា កងកម្លាំង​រុស្ស៊ី​កំពុង​ដកថយ​ពី​តំបន់​ជុំវិញ​ទីក្រុង Kharkiv ហើយ​ផ្តោត​លើ​ការ​ការពារ​នៅ​ច្រក​ផ្គត់ផ្គង់​៕

អត្ថបទ៖ ប៊ុនថន