ភ្នំពេញ៖ នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានដាស់តឿនដល់កងកម្លាំងនគរបាលជាតិទាំងអស់ ប្រឹងប្រែងបំពេញភារកិច្ច ដើម្បីបុព្វហេតុជាតិ សាសនា ព្រះមហាក្សត្រ ព្រមទាំងប្តេជ្ញាការពាររាជរដ្ឋាភិបាលស្របច្បាប់ និងបម្រើប្រជាពលរដ្ឋដោយអត់ធ្មត់ ប្រកាន់ខ្ជាប់នូវវិន័យ និងមានមនសិកាវិជ្ជាជីវៈខ្ពស់បន្ថែមទៀត បើទោះបីកិច្ចការងារនាពេលកន្លងទៅបានល្អប្រសើរក៏ដោយ។

តាមរយៈសារលិខិតរបស់អគ្គស្នងការនគរបាលជាតិ ផ្ញើជូនកងកម្លាំងនគរបាលជាតិ ក្នុងឱកាសខួប អនុស្សាវរីយ៍លើកទី៧៧ ថ្ងៃកំណើតនគរបាលជាតិ( ១៦ ឧសភា១៩៤៥-១៦ឧសភា ២០២២) នាយឧត្តមសេនីយ៍ នេត សាវឿន បានលើកឡើងថា អំឡុងឆ្នាំ២០២២ សភាពការណ៍​សន្តិសុខ​សកលលោក​នៅតែបន្ត​ប្រែប្រួល​ដោយភាព​ស្មុគ្រស្មាញ​ ដែល​ហេតុការណ៍ មួយចំនួន​អាច​ជះ​ឥទ្ធិពល​ដោយផ្ទាល់ ​និងប្រយោលដល់កម្ពុជា​ ដូច្នេះក្នុងនាមយើងជាកងកម្លាំងនគរបាលត្រូវតែ​បង្កើន​សកម្មភាពរបស់ខ្លួនបន្ថែមទៀត​ដើម្បីសុខសន្តិសុខ សណ្តាប់ធ្នាប់ជូនដល់​សង្គមជាតិ​ទាំងមូល។

ឯកឧត្តមនាយឧត្តមសេនីយ៍ បញ្ជាក់ថា ឯកឧត្តម«សូមវាយតម្លៃខ្ពស់ និងសូមគ្រាំទ្រលើកទឹក​ចិត្ត​ដល់ ​បងប្អូនកង​ កម្លាំង​នគរបាលជាតិទាំងអស់ ​ឲ្យបន្តកិច្ចខិតខំប្រឹងប្រែងបំពេញភារកិច្ច​ដើម្បី​បុព្វហេតុជាតិ សាសនា ​ព្រះមហាក្សត្រ ប្តេជ្ញា​ការពាររាជរដ្ឋាភិបាលស្របច្បាប់ និង​បម្រើ​ប្រជាពលរដ្ឋ​ដោយភាព​អត់ធ្មត់ ​ប្រកាន់ខ្ជាប់ ​នូវវិន័យ ​សីលធម៌ ​អាកប្បកិរិយា​ថ្លៃថ្នូរ ​ម៉ឺងម៉ាត់ និង​មាន​មនសិការវិជ្ជាជីវៈខ្ពស់»។

តាមរយៈលិខិតនេះដែរ នាយឧត្តមសេនីយ៍ នេត សាវឿន ក៏បានលើកឡើងថា ទន្ទឹមនេះបញ្ហា​ប្រឈម​មួយចំនួន​ នៅតែបន្តកើតមានឡើងដូចជា៖ បទឧក្រិដ្ឋឆ្លងដែន ​បទល្មើស​ព្រហ្មទណ្ឌ​គ្រប់ប្រភេទ ​បទល្មើសគ្រឿងញៀន ​អំពើជួញដូរមនុស្ស ​ពិសេសស្ត្រី និងកុមារ ​បទល្មើសបច្ចេកវិទ្យា ជាដើម។

ព្រឹត្តិការណ៍ និងហេតុការណ៍ ទាំងអស់នេះ ទាមទារ​ចាំបាច់ឲ្យកងកម្លាំងនគរបាលជាតិ បន្ត​លើក​កម្ពស់​ស្មារតីប្រុងប្រយ័ត្ន ​ខិតខំប្រឹងប្រែងអនុវត្តឲ្យ ​បានម៉ឺងម៉ាត់ ហ្មត់ចត់ រាល់ផែនការវិធានការ ក៏ដូចជា យុទ្ធនាការសំខាន់ៗ​របស់រាជរដ្ឋាភិបាល ​និងក្រសួងមហាផ្ទៃ ដើម្បីធ្វើឲ្យ​បរិយាកាស​សង្គម​មានភាពកក់ក្តៅ ​មានលក្ខណៈសម្បត្តិល្អប្រសើរ ​បម្រើឲ្យព្រឹត្តិការណ៍ ​នយោបាយជាតិ និងព្រឹត្តិការណ៍អន្តរជាតិទាំងនេះ។

ជាមួយគ្នាននោះដែរ ឯកឧត្តមនាយឧត្តមសេនីយ៍ នេត សាវឿន អំពាវនាវដល់នគរបាលទាំងអស់ ត្រូវបន្តការប្រុងប្រយ័ត្នខ្ពស់ចំពោះសុខភាពផ្ទាល់ខ្លួន ​និងក្រុមគ្រួសារ​ ដោយអនុវត្តឲ្យបាន​ខ្ជាប់ខ្ជួន​នូវវិធានសុខាភិបាល ​និងវិធានការ ៣ការពារ ៣កុំ ឲ្យបានគ្រប់ៗគ្នា ​ដើម្បីធ្វើជាគំរូល្អដល់​សាធារណជនផងដែរ៕អត្ថបទ៖ បាន ចក់