ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ មានប្រសាសន៍ថា និវត្តន៍ជន និងអតីតយុទ្ធជន សុទ្ធតែជាតួអង្គដ៏សំខាន់ ដែលបានចូលរួមចំណែកដើម្បីទប់ស្កាត់ការវិលត្រឡប់មកវិញ នៃរបបប្រល័យពូជសាសន៍ប៉ុល ពត បញ្ចប់សង្រ្គាមទាំងស្រុង កសាង និងរក្សាសន្តិភាពរហូតមកដល់បច្ចុប្បន្ន។

ក្នុងពិធីសំណេះសំណាលជាមួយនិវត្តន៍ជនស៊ីវិល និងនិវត្តន៍ជនអតីតយុទ្ធជន ក្នុងខេត្តបាត់ដំបង ជាង៣ពាន់នាក់ នៅថ្ងៃទី១៦ ខែឧសភានេះ សម្ដេចក្រឡាហោម ស ខេង មានប្រសាសន៍ថា ក្រោយ​ពី​របបប្រល័យ​ពូជសាសន៍ ប៉ុល ពត ដួលរលំ ​នៅឆ្នាំ១៩៧៩ និវត្តន៍ជន ​និង​អតីតយុទ្ធជន បាន​សម្រេចចិត្តចូលរួមតស៊ូប្រឆាំងនឹងការវិលត្រឡប់មកវិញនៃរបបប្រល័យពូជសាសន៍ និង​បញ្ចប់​សង្រ្គាម​ ដើម្បីកសាងសន្តិភាព ​ដែលជាការសម្រេចចិត្តដ៏ត្រឹមត្រូវ ​និងបង្ហាញពីឧត្តមគតិ​ស្នេហាជាតិ។

សម្ដេចក្រឡាហោម បានបញ្ជាក់ថា អ្វីៗគ្រប់យ៉ាង ដែលកម្ពុជាកំពុងមានសព្វថ្ងៃនេះ គឺមិនអាច​កាត់ផ្ដាច់​បានអំពីគុណបំណាច់របស់មន្រ្តីចូលនិវត្តន៍​ និងអតីតយុទ្ធជន ខណៈរាជរដ្ឋាភិបាល មិនបានបោះ បង់និវត្តន៍ជន ​និងអតីតយុទ្ធជននោះទេ។

សម្ដេច មានប្រសាសន៍បន្តថា ការបោះឆ្នោតនេះ ជាផ្នែកមួយនៃការពង្រឹងស្ថិរភាពនយោបាយ នៅ​មូលដ្ឋាន​ទូទាំងប្រទេស​ ក្នុងគោលដៅលើកកម្ពស់លទ្ធិប្រជាធិបតេយ្យ ​សេរីពហុបក្ស ដើម្បី​ជំរុញការ​អភិវឌ្ឍសេដ្ឋកិច្ច សង្គម កាត់បន្ថយភាពក្រីក្រ តាមរយៈការផ្ដល់​សិទ្ធិអំណាច​ជ្រើសរើស​ក្បាល​ម៉ាស៊ីនដឹកនាំឃុំ-សង្កាត់​ តាមរយៈការបោះឆ្នោត​ដោយផ្ទាល់​ពីប្រជាពលរដ្ឋនៅមូលដ្ឋាន។

សម្ដេច ស ខេង បាន​អំពាវនាវ​ដល់និវត្តន៍ជន​ និងអតីតយុទ្ធជន ត្រូវចេះ​ប្រើ​ឱកាស​មាស​ឱកាស​ប្រាក់​ចូលរួមបោះឆ្នោតឱ្យបានគ្រប់ៗគ្នា ​ដើម្បីគាំទ្រ និងរួមចំណែក​ធ្វើឱ្យការបោះឆ្នោត​ជ្រើសរើស​ក្រុមប្រឹក្សាឃុំ-សង្កាត់ អាណត្តិទី៥ ​ដែលនឹងធ្វើឡើងនាថ្ងៃទី៥ ​ខែមិថុនា ឆ្នាំ២០២២ បានប្រព្រឹត្តទៅដោយជោគជ័យ៕ អត្ថបទ៖ នឿត សុភក្ត្រ