កំពត៖ មន្ត្រីជំនាញ បានលើកឡើងថា កុមារជាវ័យទន់ខ្សោយ ទាមទារការគាំពារ និងតាមមើលថែពីគ្រប់ភាគីពាក់ព័ន្ធជាប់ជានិច្ច ព្រោះថា ភាពរីកចម្រើនខាងផ្នែកបច្ចេកវិទ្យា សង្គម និងបរិស្ថានជុំវិញ បង្កឲ្យប៉ះពាល់ដល់សិទ្ធិ និងសុវត្ថិភាពរបស់កុមារ។

ក្នុងពិធីបើកសិក្ខាសាលា ស្ដីពីការជួញដូរមនុស្ស និងកុមារចំណាកស្រុកដោយសុវត្ថិភាព សិទ្ធិកុមារ កិច្ចការពារកុមារ និងច្បាប់ពាក់ព័ន្ធនឹងប្រព័ន្ធកិច្ចការពារកុមារ ក្នុងនិងក្រៅប្រទេស ដែលបាន​ធ្វើឡើង​នៅខេត្តកំពត​ នៅថ្ងៃទី១៦ ខែឧសភានេះ លោកស្រី ញ៉េប សុភាព អគ្គលេខាធិការ នៃ​អគ្គលេខាធិការគណៈកម្មាធិការពិគ្រោះយោបល់ស្ត្រី និងកុមារ បានឱ្យដឹងថា កន្លងមក ការងារ​លើកកម្ពស់ការគោរពសិទ្ធ និងការការពារកុមារ ត្រូវបានធ្វើឡើងយ៉ាងផុលផុសនៅទូទាំងប្រទេស និងបានដាក់ចេញនូវយន្តការជាច្រើនក្នុងការគ្រប់គ្រង និងផ្តល់សេវាដល់មុខសញ្ញាកុមារទូទៅ កុមារងាយរងគ្រោះ និងកុមារកំពុងរងគ្រោះ ។

លោកស្រី បានបញ្ជាក់ថា អាជ្ញាធរមន្ត្រីជំនាញពាក់ព័ន្ធ ត្រូវបន្តរួមគ្នាធ្វើការងារនេះឲ្យបានខ្លាំង​បន្ថែម​ទៀតដើម្បីឈាន​ទៅ​លុបបំបាត់​ការរំលោភសិទ្ធិ និង​ផលប៉ះពាល់ដល់កុមារ​ព្រោះការស្រាវជ្រាវបាន​បង្ហាញថា ភាពរីកចម្រើនខាងបច្ចេកវិទ្យា កត្តាអភិវឌ្ឍន៍សង្គមនៅក្នុងមូលដ្ឋាន​ និងបរិស្ថានជុំវិញ គឺជាកត្តាចម្បងបង្ក​ឲ្យ​ប៉ះពាល់សិទ្ធិ និងសុវត្ថិភាព​សុខភាពកុមារ។

លោក កៅ រិទ្ធ អនុប្រធានគណៈកម្មាធិការពិគ្រោះយោបល់កិច្ចការស្ត្រី ​និងកុមារ​ ខេត្តកំពត បាន​បញ្ជាក់ថា ​ទោះបីគ្រប់ផ្នែកពាក់ព័ន្ធ ​និងអង្គការដៃគូ ​ខិតខំធ្វើកិច្ចការងារជាច្រើននាពេលកន្លងមកក្តី កុមារក្នុងខេត្តកំពតមួយចំនួន ​នៅតែទទួលរងគ្រោះ ដូចជា ​ករណីកេងប្រវ័ញ្ចកម្លាំងពលកម្ម ការ​ទទួលទានចំណីអាហារ ​ដែលពុំមានសុវត្ថិភាពនៅតាមសាលារៀន គ្រោះថ្នាក់ចរាចរណ៍ ការរំលោភសេពសន្ថវៈជាដើម។ គណៈកម្មាធិការខេត្ត ​បានរកឃើញចំណុច​កុមារ​ទទួល​រងគ្រោះ និង​ការបំពាន​ដោយ​ករណីផ្សេងៗ​រហូតដល់៨ប្រភេទសំខាន់ៗ៕ អត្ថបទ៖ អន សារឹម