អាស៊ី៖ បណ្ដាប្រទេសជាច្រើននៅអាស៊ី កំពុងពន្លឿនការចាក់វ៉ាក់សាំងបង្ការជំងឺ COVID-19 របស់ក្រុមហ៊ុន AstraZeneca ក្រោយទំនុកចិត្តលើសុវត្ថិភាពរបស់វា រងភាពរង្គោះរង្គើបន្ទាប់ពីមានសេចក្តីរាយការណ៍ថា ការចាក់វ៉ាក់សាំងមួយនេះ បណ្ដាលឲ្យមានឈាមកកដ៏កម្រមួយនៅអឺរ៉ុប កាលពីដើមខែកន្លងទៅ។
បន្ទាប់ពីផ្អាកការចាក់វ៉ាក់សាំងមួយរយៈពេលខ្លី ប្រទេសជាច្រើននៅអឺរ៉ុបបានចាប់ផ្ដើម ប្រើប្រាស់វ៉ាក់សាំងនៅក្នុងកម្មវិធីបង្ការរបស់ពួកគេឡើងវិញ ក្រោយក្រុមនិយ័តករក្នុងតំបន់និយាយថា វាមានសុវត្ថិភាព ស្របពេលដែលមេដឹកនាំប្រទេសជាច្រើន នៅក្នុងប្លុកមួយនេះ ទទួលការចាក់វ៉ាក់សាំងផងដែរ ដើម្បីបង្កើនទំនុកចិត្តលើវា។ គួរឲ្យដឹងថា វ៉ាក់សាំងរបស់ក្រុមហ៊ុនអង់គ្លេស AstraZeneca ស្ថិតនៅក្នុងចំណោមវ៉ាក់សាំងបង្ការជំងឺ COVID-19 ដំបូងគេ និងមានតម្លៃថោកជាងគេបំផុត ត្រូវបានផលិតឡើង និងដាក់ឲ្យប្រើប្រាស់ក្នុងទំហំដ៏ច្រើន ហើយវានឹងក្លាយជាវ៉ាក់សាំងទ្រទ្រង់ដ៏សំខាន់មួយ នៅក្នុងកម្មវិធីចាក់វ៉ាក់សាំងនៅតាមបណ្ដាប្រទេសកំពុងអភិវឌ្ឍន៍ នៅលើពិភពលោក។
ប៉ុន្តែការផ្អាកការប្រើប្រាស់វ៉ាក់សាំងមួយនេះ មួយរយៈពេលខ្លីបង្កឲ្យមានក្តីកង្វល់ និងពន្យឺតដល់ដំណើរការចាក់វ៉ាក់សាំង ដែលអាចធ្វើឲ្យប៉ះពាល់ដល់យុទ្ធនាការប្រយុទ្ធប្រឆាំងសកល នឹងការរីករាលដាលឆ្លងជំងឺ COVID-19 ស្របពេលដែលករណីឆ្លងវីរុសដ៏កាចសាហាវមួយនេះ បន្តហក់ឡើងខ្ពស់នៅតាមបណ្ដាប្រទេសមួយចំនួន ធ្វើឲ្យបាក់ស្រុតប្រព័ន្ធថែទាំងសុខភាព និងធ្លាក់សេដ្ឋកិច្ច។ នាយករដ្ឋមន្ត្រីកោះតៃវ៉ាន់ លោក ស៊ូ សេងឆាង បាននិយាយប្រាប់ក្រុមអ្នកសារព័ត៌មានថា លោកទើបតែចាក់វ៉ាក់សាំងរបស់ក្រុមហ៊ុន AstraZeneca។ លោកគ្មានការឈឺចាប់នោះទេត្រង់កន្លែងចាក់ ហើយលោកក៏គ្មានការឈឺចាប់ក្នុងរាងកាយអ្វីនោះដែរ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
