​ប្រណាំង​យាន​យន្ត៖ កីឡា​យានយន្ត​-​ព្រឹត្តិការណ៍​ប្រកួត​រថយន្ត​ឆ្លងកាត់​ឧបសគ្គ Khmer Rally Raid Practice 2022 រយៈពេល​ ២​ថ្ងៃពី​រាជធានី​ភ្នំពេញ និង​ខេត្តកំពតបានបញ្ចប់​ដោយ​ជោគជ័យដោយ​អត្ត​ព​លិ​ក​ជាតិ និង​អន្តរជាតិកោតសរសើរ​ពី​ការរៀបចំ​របស់​ក្រុមការងារ Kara កម្ពុជាជាមួយនឹង​ទឹកមុខ​សប្បាយរីករាយ។

​តំណាង​យុវជន​សស​យក រាជធានី​ភ្នំពេញបានអោយដឹងថា ការចូលរួម​ជា​ក្រុមការងារ Kara គឺជា​ចំណែក​មួយ​ជួយ​ផ្សព្វផ្សាយ​កីឡា​យានយន្ត និង​សក្តានុពល​ទេសចរបរិស្ថានដ៏​សម្បូរបែប​របស់​កម្ពុជា និង​ជា​បទពិសោធន៍​ថ្មី​មួយ ទោះ​មាន​ផល​ពិបាក​ក៏ដោយ​។​ ​ថ្លែង​ក្នុង​ពិធី​បិទ លោក សុំ មនោ​រម្យ តំណាង​ឯកឧត្តម សាយ សំ​អាល់ រដ្ឋមន្ត្រី​ក្រសួងបរិស្ថាន​បាន​កោតសរសើរ និង​វាយតម្លៃ​ខ្ពស់​ចំពោះ​ក្រុមការងារ Kara កម្ពុជា ជាពិសេស​លោក ហូ សិទ្ធី​គុណ ជា​ស្ថាបនិក Kara ដែល​បាន​ផ្តួចផ្តើម​គៀងគរ​ស្វែងរក​ដៃគូ​ឯកជន​ សហការ​រៀបចំ​ព្រឹត្តិការណ៍ប្រកួត​ខាងលើក្នុង​គោល​បំណង​លើកស្ទួយ​វិស័យ​កីឡា​យានយន្ត​នៅ​កម្ពុជា ហើយក៏​ជាការ​ផ្តល់ឱកាស​ឲ្យ​កីឡាករ​ជំនាញ​ប្រកួត​កម្តៅ​សាច់ដុំ និង​អ្នកថ្មី​ចេះ​មើលសៀវភៅ​បង្ហាញផ្លូវ និង Rally Meters ជា​ពិសេស​ឲ្យ​យុវជន​បាន​រៀន​ពី​ការរៀបចំ​កម្មវិធី​ប្រណាំង​យានយន្ត​ឆ្លងកាត់​ឧបសគ្គ​កម្រិត​ជាតិ នឹង​ឈាន​ទៅ​រៀបចំ​កម្រិត​អន្តរជាតិ​ផងដែរ។

តំណាង​ក្រសួងបរិស្ថាន​រូបនេះ​បន្តថា ព្រឹត្តិការណ៍​នេះក៏បាន​ផ្សព្វផ្សាយ​តំបន់​ទេសចរណ៍​ផ្សេងៗ​នៅតាម​ខេត្ត ក៏ដូចជា​នៅតាម​តំបន់​អភិរក្ស​ធនធាន​ធម្មជាតិ ​ដើម្បី​បង្ហាញ​ពី​សក្តានុពល​ទេសចរណ៍​ធម្មជាតិ ដែល​ជា​ទេសចរណ៍​ផ្សារភ្ជាប់​ទឹកដីក្នុង​គោលបំណង​ទាក់ទាញ​ភ្ញៀវ​ជាតិ និង​ភ្ញៀវ​ទេសចរណ៍​អន្តរជាតិ​ឲ្យ​ទៅលេង​កម្សាន្តតំបន់​អេកូ​ទេសចរ និង​តំបន់​អភិរក្ស​ធនធានធម្មជាតិ​ដ៏​សម្បូរ​បែប និង​មាន​សក្តានុពលលើ​ទឹកដី​ប៉ែក​និរតីនៃ​ប្រទេស​កម្ពុជា ស្រប​ពេលដែលវិបត្តិ​ជំងឺ​កូ​វីត​-១៩ ធូរស្បើយ ក្រោម​ការ​យកចិត្តទុកដាក់​ពី​រាជរដ្ឋាភិបាល​កម្ពុជា បូករួម​នឹង​ការលើកលែង​វិធាន​សុវត្ថិភាព​ផ្សេងៗដល់​ភ្ញៀវ​អន្តរជាតិ​ដែល​មក​ទេសចរនៅ​កម្ពុជា។ សូម​បញ្ជាក់​ថា ព្រឹត្តិការណ៍​ប្រណាំង​យានយន្ត​ឆ្លងកាត់​ឧបសគ្គខ្មែរ​រ៉ា​លី​រ៉េដ ឬ KHMER RALLY RAID PRACTICE ឆ្នាំ​២០២២ រៀបចំ​ដោយ​ភ្នាក់ងារ Kara កម្ពុជាគាំទ្រ​ដោយ​ក្រសួងបរិស្ថាន សហភាព​សហព័ន្ធ​យុវជន​កម្ពុជា និង​សហព័ន្ធ​កីឡា​យានយន្ត​កម្ពុជា៕

អត្ថបទ៖ លី ឈុនឡា