ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានស្នើឱ្យអាមេរិក ពន្យល់អំពីថា តើការគប់ស្បែកជើងដាក់សម្ដេច ពេលសម្ដេចនៅអាម៉េរិក ជាសកម្មភាពនៃសិទ្ធិបញ្ចេញមតិ ឬក៏ជាអំពើហិង្សា បើទោះបីជាសម្ដេច បានបញ្ជាឲ្យអ្នកគាំទ្រសម្តេចទាំងអស់ មិនត្រូវធ្វើសកម្មភាពហិង្សា ឬបាតុកម្មអ្វី ដើម្បីឆ្លើយតបចំពោះជននោះក្ដី។

នៅក្នុងឱកាសអញ្ជើញជួបសំណេះសំណាលជាមួយក្រុមគ្រូពេទ្យស្ម័គ្រចិត្តយុវជនសម្ដេចតេជោ (TYDA) នៅព្រឹកថ្ងៃទី១៧ ខែឧសភានេះ សម្តេចតេជោ ហ៊ុន សែន​ បានសម្ដែងការហួសចិត្ត​ចំពោះ​ជនព្រហើនម្នាក់ ដែលយកស្បែកជើងគប់មកលើសម្តេច ហើយត្រូវបានជន​មួយ​ក្តាប់​តូច ចាត់​ទុក​ជាវីរបុរស​ និងបានកើតឡើងនៅលើទឹកដីអាម៉េរិក ដែលជាបិតាលទ្ធិប្រជាធិបតេយ្យទៅទៀត។

តែទោះជាយ៉ាងណាក៏ដោយសម្តេចតេជោ មិនទាមទារឲ្យដាក់ទោសដល់ជនព្រហើននេះទេ គ្រាន់តែចង់ដឹងថា រដ្ឋបាលអាម៉េរិក នឹងធ្វើការស៊ើបអង្កេតយ៉ាងម៉េច ​ខណៈកងការពារអាមេរិក ត្រូវបានចាត់ទុកថា ​ខ្លាំង​ជាងគេនៅលើពិភពលោកនោះ។

សម្តេចតេជោ បានបញ្ជាក់ទៅកាន់រដ្ឋបាលអាម៉េរិកផងដែរថា ការ​គប់គេ​នឹងស្បែកជើងនេះ​ គឺជា សិទ្ធិសេរីភាពបញ្ចេញមតិ ឬជាអំពើហិង្សា ​ខណៈបុគ្គលព្រហើនមួយនេះ បាន​ព្យាយាមចង់​ធ្វើបែប​នេះមកលើសម្តេច នៅប្រទេសកូរ៉េខាងត្បូងម្តងហើយនោះ៕ អត្ថបទ៖ បាន ចក់