ខេត្តកំពត៖ នៅថ្ងៃទី២៥ ខែកញ្ញា ឆ្នាំ២០២៦នេះ ឯកឧត្តមអ្នកឧកញ៉ា ម៉ម វណ្ណឌី ទីប្រឹក្សាសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមការងារទទួលបន្ទុកជួសជុល និងសាងសង់ឡើងវិញអគារសិក្សា ដែលជាអំណោយរបស់សម្ដេចតេជោ ប្រធានព្រឹទ្ធសភា បានបន្តដឹកនាំក្រុមការងារចុះពិនិត្យ និងវាយតម្លៃស្ថានភាពអគារសិក្សាចំនួន ៤ ទីតាំងបន្ថែមទៀត ក្នុងស្រុកអង្គរជ័យ ខេត្តកំពត ដោយមានការអញ្ជើញចូលរួមពីសំណាក់ លោក ខាន់ សុខខា អភិបាលរង នៃគណៈអភិបាលខេត្តកំពត តំណាង ឯកឧត្តម ម៉ៅ ធនិន អភិបាល នៃគណៈអភិបាលខេត្តកំពត, លោកស្រី តុ ធីតា ប្រធានក្រុមប្រឹក្សាស្រុក, លោក មួង នឿន អភិបាល នៃគណៈអភិបាលស្រុកអង្គរជ័យ ព្រមទាំងលោក លោកស្រីអភិបាលរង នៃគណៈអភិបាលស្រុក, លោកមេឃុំ, កងរាជអាវុធហត្ថស្រុក, នគរបាលស្រុក, លោកនាយប៉ុស្តិ៍នគរបាលរដ្ឋបាលឃុំ, លោកនាយកសាលា, លោកគ្រូ អ្នកគ្រូ អង្គភាពជំនាញស្រុក និងក្រុមការងារបច្ចេកទេសជាច្រើនរូប។

ឆ្លៀតក្នុងឱកាសនោះ ឯកឧត្តមអ្នកឧកញ៉ា ប្រធានក្រុមការងារ បានគូសរំលេចពីការយកចិត្តទុកដាក់ និង អនុសាសន៍ណែនាំដ៏ខ្ពង់ខ្ពស់របស់សម្ដេចតេជោ ប្រធានព្រឹទ្ធសភា ចំពោះសុខុមាលភាព និងសុវត្ថិភាពនៃការសិក្សារបស់សិស្សានុសិស្សនៅតាមមូលដ្ឋាន។ ការចុះពិនិត្យ និងវាយតម្លៃដល់ទីតាំងផ្ទាល់នេះ ធ្វើឡើងដើម្បីស្វែងយល់ពីស្ថានភាពជាក់ស្តែងរបស់អគារសិក្សា និងកំណត់អាទិភាពសម្រាប់ការជួសជុល និងសាងសង់ឡើងវិញ។ ជាមួយគ្នានេះ អាជ្ញាធរមូលដ្ឋាន និងគណៈគ្រប់គ្រងសាលា បានថ្លែងអំណរគុណ និងដឹងគុណយ៉ាងជ្រាលជ្រៅចំពោះ សម្ដេចតេជោ ប្រធានព្រឹទ្ធសភា ចំពោះការយកចិត្តទុកដាក់ជាបន្តបន្ទាប់ចំពោះវិស័យអប់រំ តាមរយៈការចាត់តាំងក្រុមការងារឱ្យចុះពិនិត្យ និងវាយតម្លៃស្ថានភាពអគារសិក្សានៅតាមមូលដ្ឋាន ព្រមទាំងបានប្តេជ្ញាសហការ និងសម្របសម្រួលជាមួយក្រុមការងារតាមលទ្ធភាព ដើម្បីចូលរួមជំរុញការងារជួសជុល និងសាងសង់ឡើងវិញឱ្យសម្រេចបានតាមគោលដៅដែលបានកំណត់។

គួរបញ្ជាក់ផងដែរថា សាលារៀនទាំង ៤ ទីតាំង ដែលក្រុមការងារបានចុះពិនិត្យ និងវាយតម្លៃ មានអគារសិក្សាសរុបចំនួន ៦ ខ្នង ស្មើនឹង ៣១ បន្ទប់ ដែលអគារទាំងអស់នេះត្រូវបានសាងសង់ឡើងតាំងពីឆ្នាំ ១៩៩៦ រួមមាន៖

១. អនុវិទ្យាល័យសម្តេចហ៊ុនសែន អង្គរជ័យ ស្ថិតនៅភូមិប្រាល ឃុំតានី មានអគារសិក្សា ៣ ខ្នង ស្មើនឹង ១៥ បន្ទប់

២. សាលាបឋមសិក្សាពែងធំ ស្ថិតនៅភូមិពែងធំ ឃុំអង្គភ្នំតូច មានអគារសិក្សា ១ ខ្នង ស្មើនឹង ៥ បន្ទប់

៣. វិទ្យាល័យសម្តេចហ៊ុនសែន អង្គស្តុក ស្ថិតនៅភូមិស្ដុក ឃុំសំឡាញ់ មានអគារសិក្សា ១ ខ្នង ស្មើនឹង ៦ បន្ទប់

៤. សាលាបឋមសិក្សាអង្គខ្ជាយ ស្ថិតនៅភូមិអង្គខ្នាយខាងត្បូង ឃុំដំបូកខ្ពស់ មានអគារសិក្សា ១ ខ្នង ស្មើនឹង ៥ បន្ទប់

ផ្អែកលើលទ្ធផលនៃការចុះពិនិត្យជាក់ស្តែងនេះ ក្រុមការងារនឹងបូកសរុប និងវាយតម្លៃ ដើម្បីកំណត់អាទិភាព និងឈានទៅអនុវត្តការងារជួសជុល និងសាងសង់ឡើងវិញ សំដៅផ្តល់ជូនសិស្សានុសិស្ស និងលោកគ្រូ អ្នកគ្រូ នូវបរិយាកាសសិក្សាប្រកបដោយសុវត្ថិភាព គុណភាព និងផាសុកភាព៕