នៅព្រឹកថ្ងៃទី២៦ ខែកញ្ញា ឆ្នាំ២០២៦ នេះ​ សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បានចុះពិនិត្យ និងព្យាបាលជំងឺទូទៅ​ ជំងឺ​មាត់ធ្មេញ​ ជំងឺភ្នែក ជំងឺសន្លាក់​ ជំងឺរោគស្រ្តី​ និងជំងឺផ្សេងៗ ជូនដល់សិស្សានុសិស្ស​ លោកគ្រូអ្នកគ្រូ រួមទាំង​អាណាព្យាបាលមកពីសាលាបឋមសិក្សាចំនួនប្រាំ ស្មើនឹងចំនួន​ ៣ ៥៩៩នាក់ ស្មើនឹង ៥ ១៨៩ករណី ព្រមទាំងអប់រំ និងបណ្ដុះបណ្ដាលអំពីការថែទាំសុខភាពបឋម ដល់លោកគ្រូ អ្នកគ្រូ ចំនួន ៩៣នាក់​ ដើម្បីយកទៅបន្តអប់រំដល់សិស្សានុសិស្ស។ កម្មវិធីពិនិត្យព្យាបាលនេះ ប្រព្រឹត្តទៅក្នុងបរិវេណសាលាបឋមសិក្សាអនុវត្ត ស្ថិតនៅភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត ពេជ សោភ័ន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋាន នៃគណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ «គ.វ.អ.» ។

ជាកិច្ចចាប់ផ្តេីម​ ឯកឧត្ដម​វេជ្ជបណ្ឌិត​ ស៊ឹម ស៊ូយេង អនុប្រធានប្រតិបត្តិសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) បានពាំនាំបណ្តាំសួរសុខទុក្ខពីសំណាក់ សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនលោកគ្រូ អ្នកគ្រូ ក្មួយៗដែលមកទទួលសេវានាឱកាសនេះ។ ឯកឧត្ដម​វេជ្ជបណ្ឌិត​ បានឱ្យដឹងទៀតថា សមាគម TYDA ដឹកនាំដោយ សម្តេចធិបតី និង លោកជំទាវបណ្ឌិត អស់រយៈពេល១៣ឆ្នាំមកហើយ ប្រកបដោយក្តីស្រឡាញ់យកចិត្តទុកដាក់យ៉ាងជ្រាលជ្រៅចំពោះសុខភាពរបស់ប្រជាពលរដ្ឋទូទៅនៅទូទាំងប្រទេស។ ជាក់ស្តែងថ្ងៃនេះគឺជាលើកទី៣ហើយដែល សម្តេចធិបតី និង លោកជំទាវបណ្ឌិត បានអនុញ្ញាតឱ្យក្រុមគ្រូពេទ្យរបស់ សមាគម TYDA ចុះមកព្យាបាលជំងឺទូទៅ ជំងឺភ្នែក​ ជំងឺសន្លាក់ ជំងឺបេះដូង និងជំងឺសំខាន់ៗជាច្រើនផ្សេងៗ ជាពិសេសសុខភាពមាត់ធ្មេញ ជូនប្រជាពលរដ្ឋនៅលើទឹកដីខេត្តស្ទឹងត្រែង ដោយមិនមានការគិតថ្លៃអ្វីទាំងអស់ ប្រកបដោយក្តីស្រឡាញ់ និងស្នាមញញឹម ក្នុងន័យជំរុញ លើកកម្ពស់សុខភាពសហគមន៍ ជាពិសេសគឺការបង្ខិតសេវាសុខភាពមកកៀកផ្ទះប្រជាពលរដ្ឋតែម្តង។

ថ្លែងប្រសាសន៍ទៅកាន់ប្រជាពលរដ្ឋចូលរួមពិធី ឯកឧត្តមបណ្ឌិតទេសរដ្ឋមន្ត្រី បានថ្លែងអំណរគុណដល់សន្តិភាពដែលធ្វើឱ្យយើងមានឱកាសជួបជុំគ្នាក្នុងពិធីពិនិត្យព្យាបាលជំងឺដោយឥតគិតថ្លៃនាថ្ងៃនេះ ហើយពិធីនេះគឺជាសក្ខីភាពយ៉ាងពិតប្រាកដបង្ហាញអំពីការយកចិត្តទុកដាក់យ៉ាងដិតដល់របស់ សម្តេចធិបតី និងលោកជំទាវបណ្ឌិត ចំពោះសុខុមាលភាពប្រជាពលរដ្ឋគ្រប់ទីកន្លែង សំដៅលើកស្ទួយសុខភាព រួមទាំងជីវភាពរស់នៅយ៉ាងពិតប្រាកដ។ ឯកឧត្តមបណ្ឌិតទេសរដ្ឋមន្ត្រី ថែមទាំងបានកោតសសើរចំពោះក្រុមគ្រូពេទ្យ TYDA ទាំងអស់ ដែលបានលះបង់កម្លាំងកាយចិត្តខិតខំចុះព្យាបាលជំងឺជូនប្រជាពលរដ្ឋអស់រយៈពេលជាងច្រើនឆ្នាំកន្លងមកនេះ មិនថាព្យុះភ្លៀង រងាក្តៅយ៉ាងណាទេ គឺដើម្បីសុខុមាលភាពប្រជាពលរដ្ឋ។ ឯកឧត្តមបណ្ឌិតទេសរដ្ឋមន្ត្រី បានបញ្ជាក់ផងដែរអំពីតួនាទីរបស់លេខាធិការដ្ឋានក្នុងនាមជាសេនាធិការរបស់ «គ.វ.អ.» ក្នុងគោលបំណងជួយគាំទ្រដល់ការលើកកម្ពស់ ការអប់រំតាមរយៈការពង្រឹងអភិបាលកិច្ចសាលារៀន ការពិនិត្យកែលម្អកម្មវិធីសិក្សានិងរៀបចំកម្មវិធីសិក្សា និងសកម្មភាពក្រៅម៉ោងសិក្សាឱ្យស្របតាមតម្រូវការក្នុងការពង្រឹងចំណេះដឹង វិន័យ សីលធម៍ និងឥរិយាបថសិស្ស, ការយកចិត្តទុកដាក់ លើសុខភាពសិស្សតាមរយៈកម្មវិធីអាហារូបត្ថម្ភដល់កុមារ និងការត្រួតពិនិត្យគុណភាពចំណីអាហារនៅតាមសាលារៀន និងការជំរុញ លើកទឹកចិត្ត ការចូលរួមរបស់មាតាបិតា អាណាព្យាបាល និងសហគមន៍ក្នុងការអប់រំ។ រចនាសម្ព័ន្ឋលេខាធិការដ្ឋាន «គ.វ.អ.» រួមមានផ្នែកចំណុះចំនួន ០៤ ៖ ផ្នែកគោលនយោបាយ, ផ្នែកគាំទ្រសាលារៀន, ផ្នែកតាមដាន ត្រួតពិនិត្យ និងវាយតម្លៃ, និង ផ្នែករដ្ឋបាល ហិរញ្ញវត្ថុ និងទំនាក់ទំនងសាធារណៈ។ ឯកឧត្តមបណ្ឌិត បានបង្ហាញអំពីការប្តេជ្ញាចិត្តដ៏មោះមុតក្នុងការអនុវត្តការងារនេះ និងជាពិសេសគឺការជឿជាក់ និងគាំទ្ររាជរដ្ឋាភិបាលកម្ពុជា ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ក្នុងការដោះស្រាយបញ្ហាជាតិ និងការថែរក្សាសន្តិភាពយ៉ាងរឹងមាំពិតប្រាកដរបស់ជាតិ។

លោកគ្រូអ្នកគ្រូដែលជាគណៈគ្រប់គ្រងមកពីសាលាបឋមចំនួន៥ខាងលើ សូមគោរពថ្លែងអំណរគុណដល់ក្រុមគ្រូពេទ្យ TYDA ក្រោមការដឹកនាំប្រកបដោយគតិបណ្ឌិតឈ្លាសវៃរបស់ សម្តេចធិបតី និង លោកជំទាវបណ្ឌិត ដោយចាត់ឱ្យក្រុមគ្រូពេទ្យជំនាញ ចុះមកព្យាបាលជំងឺជូនសិស្សានុសិស្សដល់សាលារៀន ក្នុងការរួមចំណែកលើកកម្ពស់ស្ថានភាពជីវិតរបស់សហគមន៍ជាពិសេសកុមារ ដែលជាទំពាំងស្នងឫស្សី៕