អ៊ុយក្រែន៖ អ៊ុយក្រែនបានអះអាងថា អ្នកប្រយុទ្ធ ២៦៤នាក់រួមទាំងអ្នករងរបួសធ្ងន់ត្រូវបានជម្លៀសចេញពីរោងចក្រដែកថែប Azovstal ក្នុងទីក្រុង Mariupol ហើយត្រូវបានបញ្ជូនទៅតំបន់ដែលស្ថិតនៅក្រោមការគ្រប់គ្រងរបស់រុស្ស៊ី។
អនុរដ្ឋមន្ត្រីក្រសួងការពារជាតិលោកស្រី Hanna Maliar បាននិយាយថា អ្នកប្រយុទ្ធដែលរងរបួសធ្ងន់ចំនួន ៥៣នាក់ត្រូវបានបញ្ជូនទៅកាន់មន្ទីរពេទ្យក្នុងទីក្រុង Novoazovsk ហើយអ្នកប្រយុទ្ធ ២១១នាក់ផ្សេងទៀតត្រូវបានជម្លៀសទៅកាន់ក្រុង Olenivka តាមច្រករបៀងមនុស្សធម៌។ លោកស្រីនិយាយថា ការដោះដូរនឹងត្រូវធ្វើឡើងសម្រាប់ការវិលត្រឡប់មកមាតុភូមិរបស់ពួកគេវិញ។ រថយន្តក្រុងជាច្រើនគ្រឿងត្រូវបានគេមើលឃើញថា បានចាកចេញពីរោងចក្រដែកថែបដែលអមដោយរថយន្តយោធារុស្ស៊ី នៅពេលយប់ឆ្លងចូលថ្ងៃអង្គារនេះ។ នៅមិនទាន់មានព័ត៌មានភ្លាមៗថា តើអ្នករងរបួសនឹងត្រូវចាត់ទុកជាអ្នកទោសសង្គ្រាម ឬយ៉ាងណានោះទេ។ លោកស្រី Maliar បាននិយាយថា បេសកកម្មកំពុងធ្វើឡើង ដើម្បីជួយសង្គ្រោះអ្នកប្រយុទ្ធដែលនៅសេសសល់នៅក្នុងរោងចក្រ ជាទីតាំងរឹងមាំចុងក្រោយនៃការតស៊ូនៅក្នុងទីក្រុងកំពង់ផែ Mariupol ភាគខាងត្បូងដែលត្រូវបានបំផ្លាញ។
ក្រុមទាហានការពារនៅរោងចក្រដែកបានចេញមក ខណៈទីក្រុងមូស្គូបានទទួលរងនូវវិបត្តិផ្នែកការទូតមួយផ្សេងទៀត នៅក្នុងសង្គ្រាមរបស់ខ្លួនជាមួយអ៊ុយក្រែន ដោយប្រទេសស៊ុយអែតរួមជាមួយប្រទេសហ្វាំងឡង់សម្រេចចិត្ត ស្វែងរកសមាជិកភាពនៅក្នុងអង្គការណាតូ ហើយប្រធានាធិបតីអ៊ុយក្រែនលោក Volodymyr Zelenskyy បានអបអរដល់ទាហានដែលត្រូវបានគេរាយការណ៍ថា បានវាយរុញច្រានកងកម្លាំងរុស្ស៊ីឲ្យដកថយនៅជិតព្រំដែន។ កាលពីថ្ងៃចន្ទ ក្រសួងការពារជាតិរុស្ស៊ីបានប្រកាសកិច្ចព្រមព្រៀងមួយ សម្រាប់អ្នករបួសដើម្បីចាកចេញពីរោងចក្រដែកថែប ដើម្បីទៅព្យាបាលនៅក្នុងទីក្រុងមួយដែលកាន់កាប់ដោយក្រុមផ្តាច់ខ្លួនគាំទ្រទីក្រុងមូស្គូ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
