​រុស្ស៊ី៖ ប្រធានាធិបតី​រុស្ស៊ីលោក Vladimir Putin បាន​និយាយ​កាលពី​ថ្ងៃ​ចន្ទ​ថា ប្រទេស​ជាសមាជិក​នៃអង្គការ​សន្ធិសញ្ញា​សន្តិ​សុខ​រួម ​(CSTO) នឹងធ្វើ​សមយុទ្ធ​យោធា​រួមគ្នាជា​បន្តបន្ទាប់​នៅក្នុង​រដូវ​ស្លឹកឈើ​ជ្រុះ​ឆ្នាំនេះ​។​

​ថ្លែង​នៅក្នុង​កិច្ចប្រជុំ​រំលឹក​ខួប​លើក​ទី២០​ របស់​អង្គការ​សន្ធិសញ្ញា​សន្តិសុខ​រួម (CSTO) នៅ​ទីក្រុង​មូ​ស្គូ លោក​ Putin ​និយាយ​ថា រុស្ស៊ី​មិនមាន​បញ្ហា​ជាមួយ​ប្រទេសហ្វាំ​ង​ឡង់ ឬ​ស៊ុយអែតដែល​បានសម្រេចចិត្ត​ចូល​ជា​សមាជិក​អង្គការ​សន្ធិសញ្ញា​អា​ត្ល​ង់​ទិ​ក​ខាងជើង ​(NATO) ​នោះទេ​។ លោក​ Putin និយាយថា​ ប្រទេស​ទាំងពីរ​ចូល​ជា​សមាជិក ​NATO នឹងមិន​បង្កើត​ការគំរាមកំហែង​ដោយផ្ទាល់​ដល់រុស្ស៊ី​នោះទេ ប៉ុន្តែ​ការពង្រីក​ហេដ្ឋារចនាសម្ព័ន្ធ​យោធា​របស់ ​NATO ទៅក្នុង​ទឹកដី​របស់​ប្រទេស​ទាំងនេះ ពិតជា​នឹង​បង្កឱ្យមាន​ការឆ្លើយតប​របស់​រុស្ស៊ី ហើយ​ការឆ្លើយតប​ពិតប្រាកដ​នឹងអាស្រ័យ​លើប្រភេទ​នៃការគំរាមកំហែង​ដែល​រុស្ស៊ី​នឹងត្រូវ​ប្រឈមមុខ​។​ ​លោក ​Putin និយាយថា​ ការពង្រីក​ខ្លួន​របស់ NATO ត្រូវបាន​ជំរុញ​ដោយ​ផលប្រយោជន៍ ផ្នែក​ការទូតដែល​ពាក់ព័ន្ធ​របស់​ស​ហ​រដ្ឋ​អាមេរិក​។​

​នៅក្នុង​កិច្ចប្រជុំ​នេះ ប្រធានាធិបតី​​បេឡា​រុសលោក Alexander Lukashenko បាននិយាយថា ប្រទេស​ហ្វាំ​ង​ឡង់ និង​ស៊ុយអែត​កំពុង​ស្វែងរក​ការចូល​ជា​សមាជិក​អង្គការ ​NATO ក្នុងពេលដែល​ប្រទេស​លោកខាងលិច​ខិតខំ​ដើម្បី​បង្កើន​វត្តមាន​យោធា​របស់ខ្លួន​។ លោក Lukashenko បាន​អំពាវនាវ​ឱ្យមាន​កិច្ចសហប្រតិបត្តិការ​កា​ន់​តែ​ជិតស្និទ្ធ និង​ទូលំទូលាយ​នៅក្នុង​អង្គការ​សន្ធិសញ្ញាសន្តិសុខ​រួម ​(CSTO) រួមទាំង​ការជំរុញ​កិច្ចការ​សម្របសម្រួល​ផ្នែក​នយោបាយ និង​ការធ្វើ​ឲ្យ​ប្រសើរឡើង​សមត្ថភាពក្នុងការ​ដោះស្រាយ​ការគំរាមកំហែង​ក្នុង​វិស័យ​ព័ត៌មាន​។ លោកនិយាយថា កិច្ច​សហ ប្រតិបត្តិការ​យោធា​រវាង​រុស្ស៊ី និង​បេឡា​រុស និង​នៅក្នុង​អង្គការ​សន្ធិសញ្ញា​សន្តិសុខ​រួម​ (CSTO) គឺជាស្ថិរភាពដែលបន្ថយ​ភាព​តានតឹង​ក្នុង​តំបន់​៕​

អត្ថបទ៖ ប៊ុនថន