ពិព័រណ៍ឧស្សាហកម្មវិស័យសំណង់លំដាប់អន្តរជាតិ និងធំជាងគេនៅកម្ពុជា (CAMBUILD 2026 ) ​បាន​បើក​សម្ពោធជាផ្លូវការនៅរសៀលថ្ងៃទី២៨ ខែកញ្ញានេះ នៅមជ្ឈ​មណ្ឌល​សន្និបាត​ពិព័រណ៍​កោះ​ពេជ្រ ​ដែល​មានការចូលរួមពីក្រុមហ៊ុនដាក់តាំងបង្ហាញជាង១៨០។

ការរៀបចំពិព័រណ៍ CAMBUILD លើកទី១៥នេះ រៀបចំឡើងដោយក្រុមហ៊ុន Informa Markets ក្រោម​ការ​គាំទ្រពីក្រសួងពាណិជ្ជកម្ម ក្រសួងរៀបចំដែនដី នគរូបនីយកម្ម និងសំណង់ រួម​ទាំង​ក្រសួង​-ស្ថាប័នពាក់ព័ន្ធជាច្រើនទៀត។ ព្រឹត្តិការណ៍នេះ មានរយៈពេល ៣ថ្ងៃ ចាប់ពីថ្ងៃទី២៨ ដល់​ថ្ងៃ​ទី៣០ ខែកញ្ញា ឆ្នាំ២០២៦។ ព្រឹត្តិការណ៍នេះ ត្រូវបានរំពឹងថា នឹងមានភ្ញៀវ​ពាណិជ្ជ​កម្ម​ចូល​ទស្សនា​លើស​ពី ១ម៉ឺននាក់ មកពីក្នុងស្រុក និងតំបន់។

ពិធីបើកជាផ្លូវការនេះ មានការអញ្ជើញចូលរួមពីថ្នាក់ដឹកនាំជាន់ខ្ពស់នៃរាជរដ្ឋាភិបាល រួមមាន ឯកឧត្តម ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ឯកឧត្តម សុខ ពុទ្ធិវុធ រដ្ឋលេខាធិការក្រសួងប្រៃសណីយ៍ និងទូរគមនាគមន៍ ឯកឧត្តម បណ្ឌិត សុខុម ភគវន្តមុនី រដ្ឋលេខាធិការក្រសួងសាធារណការ និងដឹកជញ្ជូន លោក សេង ប៊ុនវីរៈ ប្រធាន​សមាគម​អ្នក​វិនិយោគអ្នកសាងសង់ និងស្ថាបត្យករកម្ពុជា និងភ្ញៀវកិត្តិយសជាច្រើនរូបទៀត។

លោក Gerard Leeuwenburgh អគ្គនាយករងប្រចាំប្រទេសនៃក្រុមហ៊ុន Informa Markets បាន​គូសបញ្ជាក់ថា CAMBUILD 2026 គឺជាវេទិកា​ដ៏​សំខាន់​ក្នុង​ការ​នាំ​យក​នវានុវត្តន៍សកលមកតភ្ជាប់ជាមួយតម្រូវការក្នុងស្រុក បង្កើតឱកាសសម្រាប់សហគ្រាស និងអ្នកជំនាញក្នុងការផ្លាស់ប្តូរចំណេះដឹង និងកសាងភាពជាដៃគូយុទ្ធសាស្ត្រ។ លោកបន្តថា ពិព័រណ៍នេះ ក៏មានការរៀបចំសិក្ខាសាលាបច្ចេកទេស ដែលជាវេទិកាជួបជុំរវាងវិស្វករ អ្នកជំនាញឧស្សាហកម្ម និងក្រុមហ៊ុនតាំងពិព័រណ៍ ដើម្បីផ្លាស់ប្តូរចំណេះដឹងលើបច្ចេកវិទ្យា ការអនុវត្តល្អៗ និងដំណោះស្រាយពាក់ព័ន្ធនឹងបរិស្ថានសំណង់ផងដែរ។

ក្នុងពិធីបើកនាឱកាសនេះ ឯកឧត្តមរដ្ឋលេខាធិការ ឡៅ ទិព្វសីហា បានចាត់ទុកព្រឹត្តិការណ៍នេះ ធ្វើឡើងចំពេលដែលវិស័យសំណង់របស់កម្ពុជាកំពុងបន្តកំណើនយ៉ាងថេរ និងដើរតួនាទីយ៉ាងសំខាន់ក្នុងសេដ្ឋកិច្ចជាតិ ដែលជំរុញឱ្យមានតម្រូវការខ្ពស់លើការលើកកម្ពស់បច្ចេកវិទ្យាសំណង់ ស្តង់ដារ និងសុវត្ថិភាព។

ពិព័រណ៍ឧស្សាហកម្មវិស័យសំណង់លំដាប់អន្តរជាតិ និងធំជាងគេនៅកម្ពុជា រៀបចំឡើងក្នុងពេលដែលវិស័យសំណង់នៅកម្ពុជាកំពុងបន្តដើរតួនាទីយ៉ាងសំខាន់ក្នុងសេដ្ឋកិច្ចជាតិ ជាមួយនឹងកំណើនថេរលើការនាំចូលសម្ភារ និងការផលិតស៊ីម៉ងត៍។ តាមរយៈការភ្ជាប់ទំនាក់ទំនងរវាងវិស័យសំណង់ វិស្វកម្ម ថាមពល យានយន្ត និងបច្ចេកវិទ្យា ព្រឹត្តិការណ៍នេះផ្តល់ជូនអ្នកជំនាញនូវឱកាសស្វែងរកដំណោះស្រាយថ្មីៗ លើកកម្ពស់ស្តង់ដារ សុវត្ថិភាព និងអភិវឌ្ឍទំនាក់ទំនងដើម្បីគាំទ្រដល់ការអភិវឌ្ឍបរិស្ថានសំណង់កម្ពុជាប្រកបដោយចីរភាព៕ អត្ថបទ៖ ឈិត បូរ៉ាវី