អ៊ុយក្រែន៖ ពលរដ្ឋនៅទីក្រុង Kyiv កំពុងប្តូរទៅប្រើប្រាស់កង់ និងរថយន្តអគ្គិសនី ខណៈកង្វះខាតប្រេងឥន្ធនៈនៅតែបន្តនៅទូទាំងប្រទេសអ៊ុយក្រែន។ ការវាយលុករបស់រុស្ស៊ីដែលបានចាប់ផ្តើមនៅក្នុងខែកុម្ភៈ បានបំផ្លាញហេដ្ឋារចនាសម្ព័ន្ធប្រេងឥន្ធនៈ និងបានបិទកំពង់ផែរបស់ប្រទេស។
ប្រធានាធិបតីអ៊ុយក្រែនលោក Volodymyr Zelenskyy បាននិយាយថា គ្មានដំណោះស្រាយភ្លាមៗនោះទេចំពោះកាខ្វះខាតប្រេងឥន្ធនៈកាលពីចុងខែមេសា។ លោកបានសន្យាថា ក្រុមមន្ត្រីនឹងស្វែងរកប្រព័ន្ធផ្គត់ផ្គង់ប្រេងឥន្ធនៈក្នុងរយៈពេលមួយ ឬពីរសប្តាហ៍ខាងមុខដើម្បីការពារឱនភាព ប៉ុន្តែបានចាត់ទុកថាជាកិច្ចការដ៏លំបាក បន្ទាប់ពីរោងចក្រចម្រាញ់ប្រេងនៅក្រុង Kremenchuk ត្រូវបានវាយប្រហារដោយមីស៊ីល។ រថយន្តជាច្រើនជួរនៅតែអាចមើលឃើញនៅស្ថានីយ៍ប្រេងឥន្ធនៈភាគច្រើន ហើយអ្នកបើកបរអាចទិញប្រេងបានត្រឹមតែ ១០លីត្រប៉ុណ្ណោះក្នុងមួយពេល។
ពលរដ្ឋនៅទីក្រុង Kyiv និយាយថា លោកគិតថា សំណាងដែលបានបើកបររថយន្តអគ្គិសនី ខណៈលោកបានឆ្លងកាត់ស្ថានីយប្រេងឥន្ធនៈដែលលែងមានប្រេងលក់នៅជាយក្រុង។ ក្រុមហ៊ុនលក់រថយន្តនៅទីក្រុង Kyiv ថ្មីៗនេះបានអស់ស្តុករថយន្តអគ្គិសនីរបស់ខ្លួនដោយសារតែតម្រូវការខ្ពស់។ អ្នកលក់រថយន្តម្នាក់បាននិយាយថា អតិថិជននៅទីផ្សារសម្រាប់រថយន្តអគ្គិសនីត្រូវរង់ចាំយ៉ាងហោចណាស់ ១០ថ្ងៃដើម្បីទទួលបានរថយន្តមួយគ្រឿង។ សម្រាប់ពលរដ្ឋផ្សេងទៀត កង់បានក្លាយជាកត្តាចម្បងសម្រាប់ការធ្វើដំណើរជុំវិញទីក្រុង ខណៈការដឹកជញ្ជូនសាធារណៈមិនទាន់បានបន្តដំណើរការពេញលេញនៅឡើយ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
