ភ្នំពេញ ៖ ឯកឧត្ដមសាស្រ្ដាចារ្យ ម៉ម ប៊ុនហេង រដ្ឋមន្រ្ដីក្រសួងសុខាភិបាល និងឯកឧត្តម ម៉ាទីន វ៉ាវរ៉ា (H.E. Martin Vávra) ឯកអគ្គរដ្ឋទូតនៃស្ថានទូតសាធារណរដ្ឋឆែក ប្រចាំព្រះរាជាណាចក្រកម្ពុជា បានអញ្ជើញជាអធិបតីភាព ក្នុងពិធីប្រគល់-ទទួល សម្ភារៈឧបករណ៍វេជ្ជសាស្ត្រ ជូនដល់មន្ទីរពេទ្យកុមារជាតិ តាមរយៈគម្រោង«ការពង្រឹងសមត្ថភាពនៃការថែទាំសុខភាពមាតានិងទារកនៅអាគារសង់ថ្មីសម្រាប់ផ្នែកសម្ភពនិងទារកនៃមន្ទីរពេទ្យកុមារជាតិ» គាំទ្រដោយភ្នាក់ងារអភិវឌ្ឍនៃសាធារណរដ្ឋឆែក ព្រឹកថ្ងៃទី១៧ ខែឧសភា ឆ្នាំ២០២២។

បើតាមឯកឧត្តម ញឹប អង្គាបុស្ស ទីប្រឹក្សាក្រសួងសុខាភិបាល និងជានាយកមន្ទីរពេទ្យកុមារជាតិ បានឲ្យដឹងថា មន្ទីរពេទ្យកុមារជាតិ និងសារធាណរដ្ឋឆែក បានចាប់ផ្តើមធ្វើកិច្ចសហប្រតិបត្តិការជាមួយគ្នាតាំងពីឆ្នាំ២០១៨ លើគំរោងអភិវឌ្ឍន៏ផ្នែកជំងឺទារកក្នុងមន្ទីរពេទ្យ ដែលផ្តល់មូលនិធិដោយសាធារណរដ្ឋឆែក។ គំរោងនេះអាចដំណើរការទៅបានដោយរលូន ក្រោមការគាំទ្រ និងសម្របសម្រួលរបស់ក្រសួងសុខាភិបាល តាមរយៈកិច្ចសហប្រតិបត្តិការទ្វេរភាគីជាមួយព្រះរាជាណាចក្រកម្ពុជា លើកិច្ចការអភិវឌ្ឍន៍។ ហើយក្នុងថ្ងៃនេះគឺជាលើកទី៣ ដែលមន្ទីរពេទ្យកុមារជាតិ បានទទួលសម្ភារៈ ឧបករណ៏វេជ្ជសាស្ត្រ បន្ថែមទៀតពីសាធារណរដ្ឋឆែក ចំនួនរហូតដល់២៧មុខ សរុបទាំងអស់ ១២៤ គ្រឿង សរុបជាទឹកប្រាក់ចំនួន សាមសិបប្រាំបីម៉ឺន ពីរពាន់ ប្រាំមួយរយកៅសិបប្រាំបី ដុល្លារសហរដ្ឋអាមេរិក (382,698 USD) ក្នុងគម្រោងមួយទៀតដែលបន្តពីគម្រោងមុន ដែលគាំទ្រដោយភ្នាក់ងារអភិវឌ្ឍនៃសាធារណរដ្ឋឆែក គឺជាគម្រោង«ការពង្រឹងសមត្ថភាពនៃការថែទាំសុខភាពមាតា និងទារកនៅអាគារសង់ថ្មី» ដែលជាការផ្តល់ជូនពីរាជរដ្ឋាភិបាលនៃព្រះរាជាណាចក្រកម្ពុជា សម្រាប់ផ្នែកសម្ភព និងផ្នែកទារកនៃមន្ទីរពេទ្យកុមារជាតិ។ 

ឯកឧត្តម ម៉ាទីន វ៉ាវរ៉ា (H.E. Martin Vávra) ឯកអគ្គរដ្ឋទូតនៃស្ថានទូតសាធារណរដ្ឋឆែក ប្រចាំព្រះរាជាណាចក្រកម្ពុជា បានលើកឡើងថា នាពេលថ្មីៗនេះ អនុស្សារណៈនៃការយោគយល់គ្នាមួយសម្រាប់ចុះហត្ថលេខាលើគម្រោងថ្មីមួយ ដែលមានឈ្មោះថា ការពង្រឹងសមត្ថភាពនៃការថែទាំសុខភាពមាតានិងទារកនៅក្នុងអាគារសង់ថ្មីសម្រាប់ផ្នែកសម្ភពនិងទារកនៃមន្ទីរពេទ្យកុមារជាតិ។ ហើយគម្រោងនេះវេជ្ជបណ្ឌិតបរទេស ជនជាតិសាធារណរដ្ឋឆែក មានវត្តមានក្នុងមនី្ទរពេទ្យកុមារជាតិ ដើម្បីផ្តល់នូវការរៀបចំរចនាសម្ព័ន្ធនេះ ក៏សូមថ្លែងអំណរគុណដល់ភាគីកម្ពុជា ជាពិសេសក្រសួងសុខាភិបាល ក្នុងការវិនិយោគក្នុងការសាងសង់អគារថ្មីនេះ ដើម្បីសម្រេចបាននូវគោលដៅនៃកម្មវិធីរបស់យើង រួមចំណែកយ៉ាងសំខាន់ដល់ការអភិវឌ្ឍន៍ដោយចីរភាពរបស់កម្ពុជា ក្នុងការកាត់បន្ថយមរណៈភាពមាតា និងទារក និងជំងឺធ្ងន់៕

នាឱកាសនោះឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានថ្លែងថាចំណងសាមគ្គីភាពនេះ បានជំរុញឲ្យមានកិច្ចសហប្រតិបត្តិការរវាងប្រទេសទាំងពីរលើការអភិវឌ្ឍលើវិស័យនានា ដូចជា វិស័យអប់រំ អភិវឌ្ឍសហគមន៍ និងវិស័យសុខាភិបាលផងដែរ។ តាមរយៈកិច្ចសហប្រតិបត្តិការលើគម្រោងទ្វេភាគីក្នុងការលើកកម្ពស់ និងពង្រឹងគុណភាពសេវាសុខាភិបាលក្នុងព្រះរាជាណាចក្រកម្ពុជា។ជាពិសេសរឿងដែលធ្វើឲ្យឯកឧត្តម និងប្រជាជនកម្ពុជាទាំងអស់ចងចាំមិនភ្លេច ចំពោះទឹកចិត្តប្រកបដោយមនុស្សធម៌ និងសប្បុរសរបស់សាធារណរដ្ឋឆែក នោះគឺ ក្នុងពេលដែលប្រទេសកម្ពុជា និងពិភពលោកទាំងមូលបាន និងកំពុងស្ថិតក្នុងស្ថានភាពនៃការរីករាតត្បាតនៃជំងឺកូវីដ-១៩។ សាធារណរដ្ឋឆែក តាមរយៈកម្មវិធីជំនួយមនុស្សធម៌ បានផ្តល់ជាសម្ភារៈបរិក្ខារពេទ្យមួយចំនួនដល់មន្ទីរពេទ្យកុមារជាតិ ក្នុងការទប់ស្កាត់ការរាតត្បាតនៃមេរោគកូវីដ-១៩ ដែលជាផ្នែកមួយរួមចំណែកជាមួយក្រសួងសុខាភិបាល និង រាជរដ្ឋាភិបាល នៃព្រះរាជាណាចក្រកម្ពុជា។ ហើយថ្ងៃនេះកាន់តែរំភើបនិងកោតសរសើរស្ញប់ស្ញែងយ៉ាងខ្លាំងបំផុត តាមរយៈប្រសាសន៍គាំទ្ររបស់ឯកឧត្តមម៉ាទីន វ៉ាវរ៉ា (H.E. Martin Vávra) ឯកអគ្គរដ្ឋទូតនៃស្ថានទូតសាធារណរដ្ឋឆែក ប្រចាំព្រះរាជាណាចក្រកម្ពុជា និង សេចក្តីរាយការណ៍របស់ឯកឧត្តមនាយកមន្ទីរពេទ្យ ក្នុងការប្រគល់ជូនសម្ភារៈឧបករណ៏វេជ្ជសាស្ត្រសរុបជាទឹកប្រាក់រហូតដល់ជិត៤០ម៉ឺនដុល្លាសហរដ្ឋអាមេរិក ដែលមានចំនួនជិត៣០មុខ ហើយក្នុង១មុខៗមានចំនួនច្រើនដូចបានជំរាបក្នុងរបាយការណ៏ សម្រាប់ សម្រួលដល់ដំណើរការអភិវឌ្ឍផ្នែកសម្ភពនិងទារក លើអាគារសង់ថ្មីនៃមន្ទីរពេទ្យកុមារជាតិ ដែលផ្តល់ដោយរាជរដ្ឋាភិបាលនៃព្រះរាជាណាចក្រកម្ពុជា៕ ​អត្ថបទ៖ រដ្ឋា

​