ភ្នំពេញ ៖ រាជរដ្ឋាភិបាល នៅថ្ងៃទី២២ ខែមីនា ឆ្នាំ២០២១នេះ បានអំពាវនាវឲ្យក្រុមហ៊ុនអភិវឌ្ឍអចលនវត្ថុទាំងអស់នៅកម្ពុជា ឲ្យធ្វើការបន្ធូរបន្ថយដល់ប្រជាពលរដ្ឋដែលបានទិញផ្ទះ និងខុនដូ ក្នុងបរិបទការរីករាលដាលជំងឺកូវីដ-១៩។
ក្រសួងសេដ្ឋកិច្ច និងហិរញ្ញវត្ថុ លើកឡើងថា បានអំពាវនាវដល់ក្រុមហ៊ុន អភិវឌ្ឍន៍អចលនវត្ថុទាំងអស់ ឲ្យជួយដោះស្រាយបញ្ហាសម្ពាធហិរញ្ញវត្ថុរបស់ពលរដ្ឋជាអ្នកទិញក្នុង ស្ថានភាពជំងឺកូវីដ-១៩ បានប៉ះពាល់យ៉ាងខ្លាំងដល់ជីវភាពរបស់ប្រជាពលរដ្ឋ។
តាមសេចក្តីប្រកាសរបស់ក្រសួងសេដ្ឋកិច្ច និងហិរញ្ញវត្ថុ រដ្ឋាភិបាលអំពាវនាវដល់ក្រុមហ៊ុនអភិវឌ្ឍន៍អចលនវត្ថុទាំងអស់ បន្ធូរបន្ថយលក្ខខណ្ឌបង់រំលស់ទៅតាមស្ថានភាពជាក់ស្ដែងរបស់អតិថិជន។
ការអំពាវនាវនេះ គឺដើម្បីជួយដោះស្រាយដល់ប្រជាពលរដ្ឋនៅតាមបុរី និងអាគារសហកម្មសិទ្ធនានា លើកលែង ការផាកពិន័យចំពោះអតិថិជន ដែលមិនបានបង់ប្រាក់តាមកាលកំណត់ និងមិនត្រូវមានបន្ទុកការប្រាក់ ឬជាប់ការផាកពិន័យបន្ថែម ចំពោះការយឺតយ៉ាវក្នុងការបង់រំលស់។
លើសពីនេះ រាជរដ្ឋាភិបាល បានស្នើឲ្យមានការដាក់ចេញនូវគោលនយោបាយគាំពារនានាដល់អតិថិជនរបស់ខ្លួនលើការបង់រំលស់អចលនវត្ថុ។ ក្រុមហ៊ុន ត្រូវអនុវត្តវិធានការទាំងនេះឲ្យមានប្រសិទ្ធភាព រហូតដល់បំណាច់ខែមីនា ឆ្នាំ២០២២។
បន្ថែមពីលើនេះ ធនាគារជាតិនៃកម្ពុជា និងក្រសួងសេដ្ឋកិច្ច និងហិរញ្ញវត្ថុ នឹងបន្តតាមដានការវិវត្តសភាពការណ៍ថ្មីៗបន្ត ព្រមទាំងផ្តល់កិច្ចសហប្រតិបត្តិការល្អក្នុងការអនុវត្តវិធានការខាងលើ ដល់ធនាគារ និងហិរញ្ញវត្ថុ និងក្រុមហ៊ុនអភិវឌ្ឍន៍អចលនវត្ថុទាំងអស់៕
អត្ថបទ៖ វណ្ណៈ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
