ភ្នំពេញ៖ ក្នុងឱកាស ទិវាមនុស្សចាស់កម្ពុជា និងទិវាមនុស្សចាស់អន្តរជាតិ ថ្ងៃទី១ ខែតុលា ឆ្នាំ២០២៦នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា និងជាប្រធានកិត្តិយសគណៈកម្មាធិការជាតិកម្ពុជាដើម្បីមនុស្សចាស់ បានថ្លែងថា «ការវិនិយោគលើយុវជនវ័យក្មេងនៅថ្ងៃនេះសម្រាប់មនុស្សវ័យចាស់ប្រកបដោយផលិតភាពនៅថ្ងៃអនាគត»។

សម្ដេចធិបតី មានប្រសាសន៍បញ្ជាក់បែបនេះ តាមរយៈសារលិខិត ក្នុងឱកាសទិវាមនុស្សចាស់កម្ពុជានិងទិវាមនុស្សចាស់អន្តរជាតិថ្ងៃទី១ ខែតុលា ឆ្នាំ២០២៦នេះ។ ក្នុងឱកាសនេះ សម្ដេចធិបតីបានសម្តែងនូវអំណរសាទរយ៉ាងស្មោះស្ម័គ្រជាមួយលោកយាយ លោកតា ព្រឹទ្ធាចារ្យ និងបងប្អូនជនរួមជាតិទាំងអស់ ព្រមទាំងប្រជាជាតិទូទាំងពិភពលោកក្នុងឱកាសនៃទិវាមនុស្សចាស់ឆ្នាំនេះ ក្រោមប្រធានបទ «ក្មេងមានកម្លាំង និងស្គាល់ផ្លូវឯចាស់មានបទពិសោធ» ដែលជាទិវាមួយសម្រាប់រំឭកគុណដល់មនុស្សវ័យចាស់នៅព្រះរាជាណាចក្រកម្ពុជា ក៏ដូចជាមនុស្សវ័យចាស់នៅទូទាំងពិភពលោក និងលើកកម្ពស់មនសិការទទួលខុសត្រូវរបស់យើងទាំងអស់គ្នាក្នុងការចូលរួមកសាងសង្គមជាតិមួយឱ្យរីកចម្រើនរួមគ្នា។

សម្ដេចធិបតីបានថ្លែងថា ដើម្បីឱ្យសង្គមជាតិមានការអភិវឌ្ឍ មាននិរន្តរភាព មានសុខដុមរមនា និងមានសន្តិភាពទាមទារឱ្យមានសាមគ្គីភាព សហការគ្នារវាងកម្លាំង និងគំនិតច្នៃប្រឌិតរបស់យុវជន គួបផ្សំជាមួយកេរដំណែលដ៏ល្អផូរផង់ ដំបូន្មាន និងបទពិសោធល្អរបស់មនុស្សចាស់ជាពិសេសការគោរពដឹងគុណជានិច្ចចំពោះមនុស្សចាស់ ដែលជាការប្តេជ្ញាចិត្ត និងឆន្ទៈមោះមុតរបស់រាជរដ្ឋាភិបាលក្នុងការបន្តលើកកម្ពស់សុខុមាលភាពរបស់មនុស្សវ័យចាស់នៅព្រះរាជាណាចក្រកម្ពុជា និងនៅទូទាំងពិភពលោកក្នុងការពង្រឹងប្រព័ន្ធគាំពារ និងថែទាំសុខុមាលភាពមនុស្សគ្រប់វ័យ។

សម្ដេចធិបតីបានបន្តថា ដើម្បីឱ្យក្មេងមានកម្លាំង និងស្គាល់ផ្លូវរាជរដ្ឋាភិបាលទាំងអាណត្តិមុនៗ ក៏ដូចជាអាណត្តិទី៧នេះ បានយកចិត្តទុកដាក់ខ្ពស់លើការពង្រឹងគុណភាពអប់រំ និងបណ្តុះបណ្តាលជំនាញវិជ្ជាជីវៈ និងបច្ចេកទេស ព្រមទាំងបានដាក់ចេញនូវកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងគ្រោះ និងគោលនយោបាយជាតិនានាពាក់ព័ន្ធនឹងវិស័យអប់រំនិងវិស័យការងារផងដែរ។ ជាមួយគ្នានេះពាក់ព័ន្ធនឹងគោលនយោបាយជាតិស្តីពីមនុស្សវ័យចាស់២០១៧-២០៣០ ក៏បានរំលេចឡើង អំពីការត្រៀមខ្លួនរបស់ប្រជាជនវ័យក្មេងដើម្បីឈានចូលវ័យចាស់ដែលជាការបង្ហាញអំពីការយកចិត្តទុកដាក់ខ្ពស់របស់រាជរដ្ឋាភិបាលក្នុងការវិនិយោគលើយុវជនវ័យក្មេង ដែលមានន័យថា ការវិនិយោគលើយុវជនវ័យក្មេង នៅថ្ងៃនេះសម្រាប់មនុស្សវ័យចាស់ប្រកបដោយផលិតភាពនៅថ្ងៃអនាគត។

បើតាមប្រសាសន៍សម្ដេចធិបតី ជារៀងរាល់ឆ្នាំ ការប្រារព្ធទិវា មនុស្សចាស់កម្ពុជា និងទិវាមនុស្សចាស់អន្តរជាតិ ថ្ងៃទី១ ខែតុលា គឺស្របទៅនឹងគោលនយោបាយរបស់ រាជរដ្ឋាភិបាលនៃព្រះរាជាណាចក្រកម្ពុជានិងស្របតាមសេចក្តីសម្រេចរបស់អង្គការសហប្រជាជាតិ។ ក្នុងឱកាសអបអរសាទរទិវាដ៏មានអត្ថន័យយ៉ាងជ្រាលជ្រៅនេះ សម្ដេចធិបតី បានសម្តែងនូវមនោសញ្ចេតនារីករាយថ្លែងនូវសារលិខិតជូនជនរួមជាតិជាទីស្នេហា អំពីឆន្ទៈ និងបុព្វហេតុក្នុងការគោរពដឹងគុណមនុស្សវ័យចាស់ និងលើកកម្ពស់មនសិការរបស់បងប្អូនជនរួមជាតិយើងទាំងអស់ឱ្យចូលរួមកាន់តែសកម្ម ដើម្បីឱ្យកូនចៅជំនាន់ក្រោយៗទៀតយល់ដឹងអំពីតម្លៃឥតគណនារបស់មនុស្សវ័យចាស់។

សម្ដេចធិបតីបានថ្លែងថា ជារួមប្រវត្តិសាស្ត្រ និងបទពិសោធនៃសង្គមនីមួយៗបានបង្ហាញឱ្យឃើញថា ការអភិវឌ្ឍសេដ្ឋកិច្ច សង្គមកិច្ច និងវប្បធម៌នៃប្រជាជាតិមួយអាចប្រព្រឹត្តទៅបានប្រកបដោយចីរភាព និងសមធម៌ទាមទារឱ្យមានការអភិវឌ្ឍ ផ្នែកអប់រំសីលធម៌ គុណធម៌ និងវប្បធម៌អហិង្សា។ ផ្ទុយទៅវិញ ក្នុងសង្គមជាតិមួយដែលមានសុជីវធម៌ គុណធម៌ និងសីលធម៌ធ្លាក់ចុះ សង្គមជាតិនោះនឹងត្រូវទទួលរងនូវវិបត្តិនិងមហន្តរាយ។ ព្រះរាជាណាចក្រកម្ពុជាយើង មានប្រពៃណី ទំនៀមទម្លាប់ដ៏ល្អ កេរមរតកសម្បត្តិវប្បធម៌សម្បូណ៌បែប និងសមិទ្ធផលទាំងឡាយដែលត្រូវបាន រក្សាគង់វង្សរហូតមកដល់សព្វថ្ងៃនេះ។ មរតកទាំងអស់នេះកើតចេញពីស្នាដៃ គុណូបការៈ និងការអប់រំទូន្មានប្រៀនប្រដៅប្រកបដោយគតិបណ្ឌិតនៃបុព្វបុរសនិងចាស់ព្រឹទ្ធាចារ្យរបស់យើង ដែលអាចជាក្សត្រ ប្រជាជន មន្ត្រីរាជការ យុទ្ធជន បព្វជិត គ្រហស្ថ អ្នកអក្សរសាស្ត្រ ភាសាវិទូ សេដ្ឋវិទូ អ្នកស្រាវជ្រាវ សិល្បករ អ្នកច្បាប់ និងអ្នកវិទ្យាសាស្ត្រជាដើម៕