គណៈកម្មាធិការកាតព្វកិច្ចយោធា បាន​ចាប់​ផ្តើម​ផ្តល់​ពាក្យ​ជូន​យុវជន​ដែល​គ្រប់​អាយុ​ត្រូវ​បំពេញ​កាតព្វ​កិច្ច​យោធា តាមច្បាប់ដែលបានកំណត់ ចាប់ពីថ្ងៃទី១ ខែតុលា ឆ្នាំ២០២៦ នេះតទៅ។

នៅព្រឹកថ្ងៃដំបូង នៃការផ្តល់ពាក្យនេះ នៅតាមបណ្តាមូលដ្ឋានកងរាជអាវុធហត្ថខណ្ឌទាំង១៤ ក្នុង​ក្រប​ខណ្ឌរាជធានីភ្នំពេញ បាននឹងកំពុងរៀបចំការផ្តល់ពាក្យជូនប្រជាពលរដ្ឋខ្មែរទាំង២ភេទ ដែល​មាន​អាយុ​ចាប់ពី១៨ ដល់២៥ឆ្នាំ ដើម្បីចូលបំពេញកាតព្វកិច្ចយោធា សម្រាប់ឆ្នាំ២០២៦។

ក្រោមការដឹកនាំចង្អុលបង្ហាញពីលោកឧត្តមសេនីយ៍ឯក រ័ត្ន ស្រ៊ាង មេបញ្ជាការ​រង​កង​រាជ​អាវុធ​ហត្ថ​លើ​ផ្ទៃ​ប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ មន្ត្រីកងរាជអាវុធ​ហត្ថ​តាម​មូល​ដ្ឋាន​ទាំង​អស់ បានត្រៀមលក្ខណៈពេញលេញ សម្រាប់ការទទួល ការ​ប្រឹក្សា​សួរ​នាំ​ព័ត៌មាន ​និងការផ្តល់ពាក្យជូនយុវជន យុវនារី ដែលគ្រប់អាយុ ប្រកបដោយភាពទទួលខុសត្រូវ និង​ស្និទ្ធស្នាល ដើម្បីអាចឲ្យយុវជន យុវនារី យកពាក្យទៅបំពេញឲ្យបានត្រឹមត្រូវ ជៀសវៀង​ការ​ខុស​ឆ្គង ​ឬកង្វះឯកសារជាដើម។

ក្រុម​យុវនារីស្ម័គ្រចិត្ត ដែលបានទៅទទួលពាក្យ បង្ហាញក្តីពេញចិត្ត ចូលរួមដោយមិនងាករ៉េ ជា​មួយ​ការ​បំពេញកាតព្វកិច្ចយោធា ដោយពួកគាត់យល់ថា នេះជាការបើកឱកាសសម្រាប់ពួកគាត់ អាច​រួមចំណែកជាមួយបុព្វហេតុការពារប្រទេសជាតិ ក្នុងករណី​កើត​មាន​អំពើ​ឈ្លាន​ពាន​ពី​សំណាក់​រដ្ឋ​បរទេស​ណាមួយមកលើដែនអធិបតេយ្យភាពរបស់កម្ពុជា ។

ស្ត្រីជាម្តាយរបស់យុវតីស្ម័គ្រ ថ្លែងអំណរគុណចំពោះរាជរដ្ឋាភិបាលកម្ពុជា ដែល​បាន​បង្កើត​ច្បាប់​កាតព្វ​កិច្ច​យោធាឡើងមក អាចជួយបណ្តុះស្មារតីរបស់ក្មេងៗជំនាន់ក្រោយ ឲ្យមានទឹកចិត្ត​ស្រលាញ់​ទឹក​ដី និងចង់ការពារប្រទេសជាតិរបស់ខ្លួនពីខ្មាំងសត្រូវឈ្លានពាន ។

គួរបញ្ជាក់ថា ការផ្តល់ពាក្យសម្រាប់ការចូលបំពេញកាតព្វកិច្ចយោធា គឺធ្វើឡើងចាប់ពីថ្ងៃទី១ ដល់​ថ្ងៃ​ទី៩ ខែតុលា ឆ្នាំ២០២៦ នៅមូលដ្ឋានកងរាជអាវុធហត្ថទូទាំងប្រទេស រៀងរាល់ម៉ោងធ្វើការ ទាំង​ពេលព្រឹក និងពេលថ្ងៃ ដោយពុំគិតថ្ងៃអាទិត្យនោះឡើយ៕ អត្ថបទ៖ លីហេង