សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ជាថ្មីម្តងទៀតថា វិស័យអប់រំ និងសុខាភិបាល នៅតែជាវិស័យអាទិភាពចម្បងបំផុតរបស់រាជរដ្ឋាភិបាលតាំងពីអាណត្តិមុនៗរហូតដល់នីតិកាលទី៧នៃរដ្ឋសភានេះ ដែលវិស័យនេះ​ត្រូវបានបង្កើនថវិកាជាតិជាបន្តបន្ទាប់ ដោយគ្មានការកាត់បន្ថយឡើយ។

សម្ដេចធិបតី នាយករដ្ឋមន្រ្ដី បានបញ្ជាក់ជាថ្មីបែបនេះ​ក្នុងឱកាស អញ្ជើញជាអធិបតីក្នុងពិធីប្រគល់សញ្ញាបត្រដល់និស្សិត​សា​កល​វិទ្យាល័យអាស៊ី អឺរ៉ុប ២ ៥៧៣អង្គ/នាក់ នៅមជ្ឈមណ្ឌល​សន្និបាត និងពិព័រណ៍កោះពេជ្រ ព្រឹកថ្ងៃទី២ ខែតុលា ឆ្នាំ២០២៦នេះ។

ក្នុងឱកាសនោះ សម្ដេច​ធិបតីបានច្រានចោលព័ត៌មានមួយចំនួនដែលបានផ្សព្វផ្សយថា រដ្ឋាភិបាលមានផែនការកាត់ថវិកាពីវិស័យអប់រំ និងសុខាភិបាល ទៅបំពេញឱ្យវិស័យការពារជាតិ។ សម្ដេច​ធិបតីបានសង្កត់ធ្ងន់ថា ថវិការដ្ឋមានគ្រប់គ្រាន់សម្រាប់ទប់ទល់នឹងតម្រូវការវិស័យការពារជាតិ ដោយមិនចាំបាច់ប៉ះពាល់ដល់វិស័យទាំងពីរនេះឡើយ។

សម្ដេច​ធិបតី បានបញ្ជាក់ជាថ្មីថា ដូចអាណត្តិមុនៗ រាជរដ្ឋាភិបាលកម្ពុជា នីតិកាលទី៧នេះ តែងតែចាត់ទុកមនុស្សជាអាទិភាពទីមួយនៃយុទ្ធសាស្រ្ដ​បញ្ចកោណ-ដំណាក់កាលទី១ ដែលបន្តផ្ដល់អាទិភាពខ្ពស់ដល់ការ​កែលម្អគុណភាពអប់រំគ្រប់កម្រិត, ការ​ពង្រឹង​ការ​បណ្ដុះបណ្ដាលជំនាញ, ការ​លើក​កម្ពស់​វិទ្យាស្រ្ដ បច្ចេកវិទ្យា និងនវានុវត្តន៍ ព្រមទាំងការ​កសាង​ប្រព័ន្ធអប់រំ ដែលអាច​ឆ្លើយតបទៅនឹង​តម្រូវ​ការ​នៃសង្គម និងការ​អភិវឌ្ឍទីផ្សារ​នៃពេលបច្ចុប្បន្ន និងពេលអនាគត។

សម្ដេច​ធិបតី នាយករដ្ឋមន្រ្ដី បញ្ជាក់ជាថ្មីថា ការ​វិនិយោគទៅលើវិស័យអប់រំ វិស័យសុខាសភិបាល គឺជា​អទិភាពសំខាន់​បំផុត​របស់រាជរដ្ឋាភិបាល ដែលយើងហៅសរុបថា វិស័យសង្គមកិច្ច ដោយផ្ដោតទៅលើសុខភាព និងសមត្ថភាពរបស់ប្រជាជនកម្ពុជា​ទាំងមូល។ ​

សម្ដេច​ធិបតី នាយករដ្ឋមន្រ្ដី បញ្ជាក់ជាថ្មីថា ច្បាប់​ថវិកា​សម្រាប់ក្រសួងអប់រំ និងក្រសួងសុខាភិបាល ឆ្នាំ២០២៧ខាងមុខ គឺមានការ​កើនឡើង ក្នុងនោះថវិកាជាតិក្នុងវិស័យអប់រំនឹងកើនឡើង ៤,៧% បើប្រៀបធៀបនឹងឆ្នាំ២០២៦ ដែលគិតជាទឹកប្រាក់សរុបមានរហូតដល់ ១,១០០លានដុល្លារអាមេរិកក្នុងមួយឆ្នាំ។ ចំណែកវិស័យសុខាភិបាល កើន ១,៥% ស្មើនឹងប្រមាណ ៤២ពាន់លានរៀល ឬប្រមាណ ១០លានដុល្លារ​ បើធៀបនឹងឆ្នាំ២០២៦។

សូមជម្រាបថា ការចំណាយលើវិស័យអប់រំ និងសុខាភិបាល នឹងបន្តកើនឡើងទាំងក្នុងរយៈពេលមធ្យម និងរយៈពេលវែង ព្រោះរាជរដ្ឋាភិបាលចាត់ទុក «មនុស្ស» ឬការអភិវឌ្ឍធនធានមនុស្ស គឺជាអាទិភាពទីមួយនៃគោលនយោបាយជាតិ។ សម្តេចបានបញ្ជាក់ថា បើទោះជាស្ថិតក្នុងស្ថានភាពបែបណាក៏ដោយ វិស័យទាំងពីរនេះ គឺជាវិស័យចុងក្រោយគេបំផុតដែលរដ្ឋត្រូវប៉ះពាល់ ពោលគឺមានតែការបង្កើនបន្ថែមប៉ុណ្ណោះ៕