ភ្នំពេញ ៖ ស្ត្រីជនជាតិខ្មែរអាយុ៦២ឆ្នាំ ដែលគេដឹងថា ជាម្តាយរបស់តារាកំប្លែងម្នាក់ នៅកម្ពុជា បានបាត់បង់ជីវិត ដោយសារមេរោគកូវីដ-១៩ ការស្លាប់នេះ គឺជាករណីទី៥ហើយ នៅប្រទេសកម្ពុជា ដោយសារតែការវាយលុកខ្លាំងពីជំងឺ បានធ្វើឲ្យសួតទាំងសងខាងរបស់អ្នកជំងឺធ្ងន់ធ្ងរ ក្រុមគ្រូពេទ្យមិនអាចសង្គ្រោះបាននោះ។
សេចក្តីប្រកាសព័ត៌មានរបស់ក្រសួងសុខាភិបាល ដែលបានចេញ នៅព្រឹកថ្ងៃទី២៣ ខែមីនា ឆ្នាំ២០២១នេះ បានបញ្ជាក់ថា ស្ត្រីជនជាតិខ្មែរ អាយុ៦២ឆ្នាំ មានអាសយដ្ឋាននៅសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានស្លាប់បាត់បង់ជីវិត ដោយសារជំងឺកូវីដ-១៩ នាព្រឹកវេលាម៉ោង៥និង៤០នាទី ថ្ងៃទី២៣ ខែមីនា ឆ្នាំ២០២១នេះ។
សេចក្តីប្រកាសរបស់ក្រសួង បានបញ្ជាក់ថា កាលពីថ្ងៃទី២០ ខែមីនា ឆ្នាំ២០២១ ស្ត្រីខាងលើនេះ ដោយមានអាការៈ ហត់ បានចូលសម្រាកពេទ្យនៅមន្ទីរពេទ្យមិត្តភាពខ្មែរ-សូវៀត បន្ទាប់មកបានរកឃើញថា មានវិជ្ជមានកូវីដ-១៩ នៅថ្ងៃទី២១ ខែមីនា។ ក្រោយពិនិត្យសុខភាព និងការថតសួតបានបង្ហាញថា ស្ត្រីរូបនេះ បានរលាក់សួតទាំងសងខាងធ្ងន់ធ្ងរខ្លាំង និងខ្សោយសួតខ្លាំង (ដោយមានអាការៈ ហត់ ២-៣ថ្ងៃ មុនចូលមកមន្ទីរពេទ្យនេះ ព្រមទាំងមានជំងឺធាត់កម្រិត១ផងដែរ) ។ ក្រុមគ្រូពេទ្យក្រៅពីផ្តល់ការព្យាបាលតាមបច្ចេកទេស ក៏បានប្រើប្រាស់ម៉ាស៊ីនជំនួយការដកដង្ហើមបន្ថែម នៅថ្ងៃទី២១ ខែមីនាដដែល ព្រមទាំងបានប្រើប្រាស់ម៉ាស៊ីនជំនួយផ្លូវដង្ហើម តែសួតគាត់កាន់តែខ្សោយទៅៗ ជាអកុសល មិនអាចជួយសង្គ្រោះបាន ហើយគាត់ក៏បានធ្វើមរណភាព កាលនៅព្រឹកថ្ងៃទី២៣ នេះតែម្តង។
សេចក្តីប្រកាសព័ត៌មានរបស់ក្រសួងសុខាភិបាល បានបញ្ជាក់បន្ថែមទៀតថា «ការសន្និដ្ឋានរបស់ក្រុមគ្រូពេទ្យ ស្ត្រីវ័យ៦២ឆ្នាំនេះ គឺបានស្លាប់បាត់បង់ជីវិតដោយសារជំងឺកូវីដ១៩ វ៉ៃលុកលឿន ធ្វើឲ្យរលាកសួតទាំងសងខាងធ្ងន់ធ្ងរ ខ្សោយសួតខ្លាំងពេក»៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
