សហភាពអឺរ៉ុប៖ ប្រធានគោលនយោបាយកិច្ចការបរទេសរបស់សហភាពអឺរ៉ុបលោក Josep Borrell បានប្រាប់ក្រុមអ្នកសារព័ត៌មានក្រោយជំនួបថ្នាក់រដ្ឋមន្ត្រីការពារជាតិអឺរ៉ុបថា សហភាពអឺរ៉ុបនឹងមិនបណ្ដោយឲ្យប្រទេសអ៊ុយក្រែនអស់គ្រឿងសព្វាវុធឡើយ។
អ្នកការទូតរូបនេះបានបញ្ជាក់ថា រុស្ស៊ីអាចរង "ការខាតបង់ដ៏ធំធេង" ចាប់តាំងពីការវាយលុកលើអ៊ុយក្រែន ដោយបានលើកឡើងថាកងទ័ពស្លាប់ និងរបួសដល់ទៅ ១៥% ប៉ុន្តែបានបដិសេធនៅពេលត្រូវបានសួរថា តើលោកមានអារម្មណ៍ថាសង្គ្រាមនេះនឹងបន្តអូសបន្លាយរយៈពេលប៉ុណ្ណាទៀត ដោយនិយាយថា លោកមិនទាន់ហ៊ានធ្វើសម្មតិកម្មនៅឡើយទេថា តើរុស្ស៊ីអាចទប់ទល់បានយូរប៉ុណ្ណាទៀតនោះ។ កាលពីថ្ងៃសុក្រសប្ដាហ៍មុន ប្រមុខការទូតសហភាពអឺរ៉ុបរូបនេះបានប្រកាសពីកញ្ចប់ជំនួយ សម្រាប់ទិញគ្រឿងសព្វាវុធមួយវគ្គផ្សេងទៀតដែលមានទំហំទឹកប្រាក់ដល់ទៅ ៥២៦លានដុល្លារអាមេរិក ឬស្មើ ៥០០លានអឺរ៉ូសម្រាប់ទីក្រុង Kiev ដែលនាំឲ្យថវិកាជំនួយសរុបឡើងដល់ ២.១១ពាន់លានដុល្លារអាមេរិក ឬស្មើនឹង ២ពាន់លានអឺរ៉ូ។
លោកថា ថវិកាទាំងនេះនឹងយកទៅទិញអាវុធធុនធ្ងន់ដូចជារថក្រោះ និងកាំភ្លើងធំ ដោយបន្ថែមថា លោកក៏មានសុទិដ្ឋិនិយមផងដែរថា សម្ព័ន្ធរបស់ទ្វីបនេះនឹងឈានដល់កិច្ចព្រមព្រៀងដ៏ចម្រូងចម្រាសនេះ ស្ដីពីបម្រាមទិញឧស្ម័នរបស់រុស្ស៊ី។ ចំណែករដ្ឋមន្ត្រីក្រសួងរតនាគារអាមេរិកលោកស្រី Janet Yellen កាលពីថ្ងៃអង្គារបានអំពាវនាវដល់សម្ព័ន្ធមិត្តអាមេរិកជួយចេញថ្លៃចំណាយសម្រាប់ប្រទេសអ៊ុយក្រែន និងស្ថាបនាហេដ្ឋារចនាសម្ព័ន្ធឡើងវិញនៅក្នុងប្រទេសរងការហែកហួរដោយសារសង្គ្រាមមួយនេះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
