បន្ទាយមានជ័យ៖ ឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថ​ខេត្តបន្ទាយមានជ័យ​ថ្លែងថា កងកម្លាំងបានប្តេជ្ញាការពារសន្តិសុខជូនជាតិ និងការពារ​សណ្តាប់ធ្នាប់ជូនពលរដ្ឋឲ្យបានល្អ។

នៅថ្ងៃទី១៨ ខែឧសភា ឆ្នាំ២០២២ លោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុហត្ថខេត្ត បានអញ្ជើញជាអធិបតីភាពក្នុងពិធីបិទវគ្គ ហ្វឹកហ្វឺន "ការពារសន្តិសុខ រក្សាសណ្តាប់ធ្នាប់ ប្រចាំឆមាសទី១ ឆ្នាំ២០២២" ដែលមានរយៈពេល១ខែ ត្រូវបានបិទបញ្ចប់ នៅទីបញ្ជាការដ្ឋាន កងរាជអាវុធហត្ថខេត្ត បន្ទាយមានជ័យ ។

នាឱកាសនោះ លោកឧត្តមសេនីយ៍ត្រី បោន ប៊ិន ក៏បានថ្លែងនូវអំណរគុណ​ដល់​កងកម្លាំង​ជាសិក្ខាកាម ដែលបានវគ្គហ្វឹកហ្វឺនយ៉ាងយកចិត្តទុកដាក់ប្រកបដោយឆន្ទៈ រយៈពេលពេញ ១ខែកន្លងមកនេះ។

ឧត្តមសេនីយ៍ត្រី បោន ប៊ិន មានប្រសាសន៍ថា ក្នុងនាមកងកម្លាំងត្រូវប្តេជ្ញាការពារសន្តិសុខ ជូនជាតិមាតុភូមិ ការពារសណ្ឋាប់ធ្នាប់ជូនប្រជាពលរដ្ឋ ឲ្យបានល្អ។ កងទ័ពត្រូវរួមចិត្តថ្លើមគ្នា ដើម្បីសម្រេច​នូវកិច្ចការការពារសន្តិសុខជូនជាតិមានតុភូមិ ក្នុងស្មារតីនេះសូមគ្រប់កងកម្លាំង​ទាំងអស់ត្រូវប្តេជ្ញាធ្វើឲ្យបាន។

 ឧត្ដមសេនីយ៍ត្រីបានបញ្ជាក់ថា ភាពរឹងមាំរបស់កងកម្លាំង គឺកើតចេញពីការរួបរួមគ្នាសាមគ្គី សហការគ្នា យល់ពីតួនាទី-ភារកិច្ចរបស់ខ្លួន ដោយមិនត្រូវយកតួនាទីក្នុងនាមជាមន្ត្រី យុត្តិធម៌ ទៅប្រព្រឹត្តនូវអំពើរដែលផ្ទុយនឹងច្បាប់នោះទេ។ បើមានមន្ត្រីយុត្តិធម៌ណាប្រព្រឹត្តខុសនឹងច្បាប់ អង្គភាព គឺមិនត្រូវវានការពារឡើយ ដោយត្រូវអនុវត្តតាមនីតិវិធី ។

 ក្នុងពិធីបិទវគ្គ " ការពារសន្តិសុខ រក្សាសណ្តាប់ធ្នាប់ ប្រចាំឆមាសទី១ ឆ្នាំ២០២២" ក៏មានការ​សម្តែង​នូវមេរៀនសំខាន់ៗ ចំនួន៤មេរៀន ដូចជា ៖ ១- ថ្នាក់កងអនុសេនាធំ​ធ្វើការ​រុញ​ច្រាន​ក្រុមបាតុករ និងវាយលុកក្រុមបាតុករ ចាប់យកមេក្លោងបាតុករ ២- សម្ភារៈចាប់ជនបង្ក មាន​កាំបិត និងដំបង ៣-អាវុធហត្ថជិះម៉ូតូដេញចាប់ជនសង្ស័យ និង៤-បង្ហាញក្បាច់គុណផងដែរ៕