ភ្នំពេញ៖ ព្រឹទ្ធសភាជាតិ បានពិនិត្យនិងឱ្យយោបល់ សេចក្តីព្រាងច្បាប់ស្ដីពី សុវត្ថិភាពម្ហូបអាហារ ដែលច្បាប់មួយនេះ ពេលអនុវត្តទៅនឹងជួយលើកកម្ពស់សុខុមាលភាពរបស់ពលរដ្ឋ រួមទាំងការ ទាក់ទាញនូវវិនិយោគទុន ទេសចរណ៍បរទេស និងមានអត្ថប្រយោជន៍ជាច្រើនទៀត ។

សេចក្តីព្រាងច្បាប់ស្តីពី សុវត្ថិភាពម្ហូបអាហារ មានចំនួន ១១ជំពូក និង៤៣មាត្រា ត្រូវបាន អនុម័តក្នុងសម័យប្រជុំវិសាមញ្ញព្រឹទ្ធសភា នីតិកាលទី៤ នាថ្ងៃទី១៨ ខែឧសភា ឆ្នាំ២០២២ ក្រោមអធិបតីភាពសម្ដេចវិបុលសេនាភក្តី សាយ ឈុំ ប្រធានព្រឹទ្ធសភាជាតិ ។

ក្នុង​សន្និសីទ​សារព័ត៌មាន ​បន្ទាប់ពីបញ្ចប់ការអនុម័តច្បាប់នេះ​ ឯកឧត្តម ម៉ម ប៊ុននាង អ្នកនាំពាក្យ​ព្រឹទ្ធសភាជាតិ ​មានប្រសាសន៍ថា ​សេចក្តីព្រាងច្បាប់នេះ នឹងបង្កើតឲ្យមានប្រព័ន្ធត្រួតពិនិត្យ​ម្ហូប​អាហារ ដោយផ្អែកតាមមូលដ្ឋានវិទ្យាសាស្ត្រ ​និងការវិភាគរកហានិភ័យ ព្រមទាំងកសាងនូវ​ចំណុច​អទិភាព ​និងការត្រួតពិនិត្យបំពេញបន្ថែមឲ្យគ្នា ​ប្រកបដោយប្រសិទ្ធភាព ហើយការ​អនុវត្តពេញ​លេញ​នឹង​បង្កើតឲ្យមានរំហូរសេរីនៃទំនិញ​ សេវាកម្ម និងការវិនិយោគ ​ដើម្បីស្រូបយកអាជីវកម្ម អ្នកជំនាញ​ទេពកោសល្យ ​និងរំហូនៃដើមទុនដោយសេរី ។

ឯកឧត្តម បន្តថា ច្បាប់នេះ នឹងផ្ដល់នូវសារសំខាន់ ក្នុងការកំណត់គោលការណ៍ជាមូលដ្ឋាន ដើម្បី​ជំរុញ​ឲ្យ​ផលិតផលម្ហូបអាហារមាន​សុវត្ថិភាព​ និង​អនុលោមតាមច្បាប់ និងលិខិត​បទដ្ឋានជាតិ​ជា​ធរមាន​ សំដៅលើកកម្ពស់​សុខុមាលភាព​ និងប្រសិទ្ធភាព នៃការការពារផលប្រយោជន៍​អ្នក​ប្រើប្រាស់ រួមចំណែកយ៉ាងសំខាន់ ​ក្នុងការកាត់បន្ថយភាពក្រីក្ររបស់ពលរដ្ឋ ហើយវាក៏ជួយលុប​បំបាត់​នូវការក្លែងបន្លំ ​នៃ​ម្ហូបអាហារ​ដែល​ប៉ះពាល់​សុខភាព​អ្នកប្រើប្រាស់ ។

សេចក្តីព្រាងច្បាប់ស្តីពី ​សុវត្ថិភាពម្ហូបអាហារនេះ ​នឹងត្រូវអនុវត្តដោយក្រសួងកសិកម្ម ​រុក្ខាប្រមាញ់ និងនេសាទ ក្រសួងពាណិជ្ជកម្ម ​ក្រសួងសុខាភិបាល ​ក្រសួងទេសចរណ៍ ​និងក្រសួងសេដ្ឋកិច្ច និងហិរញ្ញវត្ថុ ។

គួរបញ្ជាក់ថា ក្នុងសម័យប្រជុំវិសាមញ្ញព្រឹទ្ធសភា ​នីតិកាលទី៤ ​ក៏បានអនុម័តផងដែរ នូវសេចក្តីព្រាង​ច្បាប់ ស្តីពីវិសោធនកម្មមាត្រា១៤០ នៃច្បាប់ស្តីពីការគ្រប់គ្រងរដ្ឋបាលរាជធានី​ ខេត្ត ក្រុង ស្រុក ខណ្ឌ ​ដើម្បីបង្កើនធនធាន​មនុស្សក្នុងជួរ​គណៈអភិបាល ​ដែលមានអង្គប្រតិបត្តិឲ្យមាន​ចំនួន​សម​ស្រប​តាម​ស្ថានភាព ​នៃ​កំណើន​សេដ្ឋកិច្ច ​កំណើន​ពលរដ្ឋ​និងភូមិសាស្ត្រនៃរដ្ឋបាលថ្នាក់​ក្រោម​ជាតិ​នីមួយៗ ៕ អត្ថបទ បាន សុខរិទ្ធិ