​​អ៊ុយ​ក្រែ​ន​៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​ថា អ៊ុយ​ក្រែ​ន​កំពុង​ធ្វើ​ការ​ដើម្បី​នាំ​យក​ទាហាន​របស់​ខ្លួន ​ដែល​នៅ​សេសសល់​ទាំងអស់​ចេញពី​រោងចក្រ​ដែក Azovstal ដោយ​សុវត្ថិភាព​។ លោក​បាន​និយាយ​នៅ​ក្នុង​វីដេអូ​ថា ​បេសកកម្ម​ជម្លៀស​កំពុង​បន្ត​។ វា​ត្រូវ​បាន​ត្រួត​ពិនិត្យ​ដោយ​មន្ត្រី​យោធា ​និង​ចារកម្ម​របស់​យើង ហើយ​អ្នក​សម្រុះសម្រួល​អន្តរជាតិ​ដែល​មាន​ឥទ្ធិពល​បំផុត​ក៏​បាន​មក​ចូលរួម​។​

​លោក Zelenskyy បាន​និយាយ​កាលពី​ថ្ងៃ​អង្គា​រថា កងកម្លាំង​រុស្ស៊ី​បាន​បាញ់​មី​ស៊ី​ល​នៅ​ក្រុង ​Lviv ភាគ​ខាងលិច និង​តំបន់ Sumy ព្រមទាំង​តំបន់​ Chernihiv ភាគ​ឦសាន និង​បាន​វាយប្រហារ​តាម​អាកាស​នៅ​តំបន់ Luhansk ភាគ​ខាងកើត​។ តំបន់​ជាប់​ព្រំដែន​អ៊ុយ​ក្រែ​ន​បានឃើញ​ពី​សកម្មភាពបំផ្លាញ​របស់​រុស្ស៊ី​។ ទាហាន​អ៊ុយ​ក្រែ​ន​បន្ថែមទៀត​ត្រូវបាន​ជម្លៀស​ចេញពី​រោងចក្រ​ដែកថែប Azovstal ក្នុង​ទីក្រុង Mariupol កាលពី​ថ្ងៃ​អង្គារ​។ រថយន្តក្រុង​ជាច្រើន​គ្រឿងដែល​អមដោយ​រថយន្ត​យោធា​រុស្ស៊ី ត្រូវបានគេ​មើលឃើញថា​បានចេញ​មកពី​រោងចក្រ​ដែកថែប​ Azovstal​។ ទាហាន​អ៊ុយ​ក្រែ​នត្រូវបាន​គេ​នាំទៅកាន់​ទីក្រុង Olenivka គ្រប់គ្រង​ដោយ​រុស្ស៊ី​។

​អ្នក​ប្រយុទ្ធ​អ៊ុយ​ក្រែ​ន​ជាង ២៦០​នាក់​ដែល​មួយចំនួន​បាន​រងរបួស​ធ្ងន់ ​បាន​ចាក​ចេញពីអគារ​បាក់បែក​នៃ​រោងចក្រ Azovstal ហើយ​បានប្រគល់​ខ្លួនទៅឱ្យ​ភាគី​រុស្ស៊ី​ នៅក្នុង​កិច្ចព្រមព្រៀង​ដែល​បានចរចា​ដោយ​ភាគី​សង្គ្រាម​។ អាជ្ញាធរអ៊ុយ​ក្រែ​ន​បាន​និយាយថា ពួកគេ​កំពុងធ្វើការ​ដើម្បី​នាំយក​ទាហាន​ដែល​នៅ​សេសសល់​ ចេញពី​រោងចក្រ​ដែក៕

អត្ថបទ៖ ប៊ុនថន