សៀមរាប៖ ដើម្បីធ្វើឱ្យការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ មានភាពត្រឹមត្រូវ សេរី និងយុត្តិធម៌ សហភាពសហព័ន្ធយុវជនកម្ពុជាខេត្ដសៀមរាប នឹងដាក់អ្នក​សង្កេតការណ៍របស់ខ្លួនប្រមាណជាង ៣០០០នាក់ ក្នុងដំណើរការបោះឆ្នោត និងរាប់សន្លឹកឆ្នោត ដែលនឹងប្រព្រឹត្តទៅ នាថ្ងៃទី០៥ ខែមិថុនា ឆ្នាំ២០២២។

លោក ធា សថានី អនុប្រធានសហភាពសហព័ន្ធ ខេត្ដសៀមរាប (សសយក) និងប្រធានក្រុមការងារ​ទទួលបន្ទុកជំរុញ និងតាមដានការអនុវត្ដយុទ្ធនាការ ”ពលរដ្ឋល្អ” ស្ដីពីការបោះឆ្នោតក្រុមប្រឹក្សាឃុំ​សង្កាត់អាណត្ដិទី៥ បានប្រាប់BTVថា តាមរយៈការបណ្តុះបណ្តាល ស្តីពីអ្នកសង្កេតការណ៍​បោះឆ្នោត ​(សសយក) ខេត្តសៀមរាប នឹង​មាន​សមត្ថភាព​គ្រប់គ្រាន់​ក្នុងការបំពេញបេសកកម្មរបស់​ខ្លួនប្រកបដោយ​ប្រសិទ្ធភាព និងគុណភាព។

លោក បានបញ្ជាក់ថា កម្លាំងយុវជនចំនួនជាងបីពាន់នាក់នេះ ជាអ្នកសង្កេតការណ៍សំខាន់ ដើម្បីឱ្យ​មានយុត្ដិធម៌សម្រាប់គណបក្ស​នយោបាយទាំងអស់ ដែលបានចូលរួមប្រកួតប្រជែងក្នុងការ​បោះឆ្នោត​ក្រុម​ប្រឹក្សាឃុំសង្កាត់​ នៅដើមខែក្រោយនេះ។

អ្នកសង្កេតការណ៍ប្រមាណជាង ​៧០ភាគរយហើយ ​ក្នុងចំណោមអ្នកសង្កេតការណ៍ សរុបចំនួន ៣០១៦នាក់ ត្រូវបានបណ្ដុះបណ្ដាល ចាប់ផ្ដើមតាំងពីថ្ងៃទី០៦ ​ខែឧសភានេះ ហើយគ្រោងនឹងបញ្ចប់មុនបោះឆ្នោត។

អនុប្រធាន (សសយក) រូបនេះ បានបញ្ជាក់ថា ខេត្ដសៀមរាប មានការិយាល័យបោះឆ្នោតចំនួន ១៥០៨​ការិយាល័យ ​ដែលក្នុងនោះអ្នកសង្កេតការណ៍របស់ (សសយក) ត្រូវបានដាក់មួយការិយា​ល័យ​ចំនួន​ពីរនាក់ ដើម្បីតាមដានការបោះឆ្នោត និងការរាប់សន្លឹកឆ្នោត នៃការបោះឆ្នោត​ក្រុម​ប្រឹក្សា​ឃុំសង្កាត់អាណត្ដិទី៥ឆ្នាំ២០២២នេះ។

សហភាពសហព័ន្ធយុវជនកម្ពុជា មិនត្រឹមតែធ្វើសកម្មភាពសម្រាប់ការបោះឆ្នោតប៉ុណ្ណោះទេ គឺស្ថាប័ន​នេះ ធ្វើ​សម្មភាពគ្រប់​បែបយ៉ាងនៅក្នុងសង្គម ​ដើម្បីជួយដល់រាជរដ្ឋាភិបាល និង​ប្រជាពលរដ្ឋ។ កម្មវិធីជួយដល់សង្គមមួយនេះ​ ត្រូវបាន (សសយក)​ ប្រសិទ្ធិនាមថាជា ”យុទ្ធនាការពលរដ្ឋល្អ”៕ អត្ថបទ៖ ឈិត សាវី