តាកែវ៖ យុទ្ធនាការចាក់វ៉ាក់សាំងការពារជំងឺកូវីដ១៩ដូសទី៣ ដល់កុមារអាយុ១២ឆ្នាំ និងយុវ័យអាយុ១៧ រហូតមកដល់ពេលនេះ សម្រេចបានជិត ៩០ភាគរយហើយ។ នេះបើយោងតាមរបាយការណ៍របស់មន្ទីរ សុខាភិបាលខេត្តតាកែវ ។

លោកវេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្តតាកែវ បានឲ្យដឹងថា កុមារ និងយុវ វ័យ អាយុ១២ឆ្នាំដល់១៧ឆ្នាំ ដែលត្រូវចាក់លើកទី៣ មានចំនួនប្រមាណ ១០ម៉ឺននាក់ រហូតមក​ដល់ពេលនេះ ក្រុមគ្រូពេទ្យ បានចាក់ជូនពួកគេបានចំនួនជិត ៩ម៉ឺននាក់ហើយ។

លោកវេជ្ជបណ្ឌិត បានបន្តថា សម្រាប់កុមារអាយុ៦ឆ្នាំ ដល់១១ឆ្នាំ ចាក់លើកទី៣ បានចំនួនជាង៥ ម៉ឺននាក់ ឬប្រមាណ៥០ភាគរយ និងកុមារអាយុ៥ឆ្នាំ ​ចាក់បានចំនួនជិត៣ពាន់នាក់ ឬប្រមាណ​១៦ភាគរយ ។ ដោយឡែកកុមារអាយុ៣ឆ្នាំ និង៤ឆ្នាំ មិនទាន់បានចាក់ដូសទី៣នៅឡើយទេ ដោយសារតែពួកគេ ទើបតែចាក់ដូសទី២រួចរាល់។

លោកវេជ្ជបណ្ឌិត បានបញ្ជាក់ថា មន្រ្តីសុខាភិបាល និងអាជ្ញាធរពាក់ព័ន្ធ ​ជាពិសេសអាជ្ញាធរមូល ដ្ឋាន កំពុងតែធ្វើសកម្មភាពយ៉ាងសកម្ម តាមរយៈការចុះទៅផ្សព្វផ្សាយដល់ប្រជាពលរដ្ឋ ដែល​មាន​កូនត្រូវ ចាក់វ៉ាក់សាំងដូសទី៣ ឬដូសទី៤ ​ត្រូវ​បញ្ជូនពួកគេទៅចាក់ឱ្យបានគ្រប់គ្នា ។ ចំណែក​ប្រជាពលរដ្ឋ ​ដែលចាក់ ដូសទី២ ឬដូសទី៣ហើយ ដែលគ្រប់ចំនួនថ្ងៃត្រូវចាក់ដូសទី៣ ឬទី៤ ត្រូវទៅចាក់ឱ្យបានគ្រប់គ្នាផងដែរ។

ក្នុងខេត្តតាកែវ ប្រជាពលរដ្ឋ ដែលបានចាក់វ់ាក់សាំងបង្ការជំងឺកូវីដ-១៩ លើកទី១ ​មានចំនួនជាង ៩០ម៉ឺននាក់ ឬ១១៨ភាគរយ អ្នកដែលបានចាក់វ់ាក់សាំងដូសទី២ ​មានចំនួន៩១ភាគរយ ​និងការចាក់ លើកទី៣ ​ទើបតែបានចំនួនជាង៤០ម៉ឺនាក់​ ឬជាង៦០ភាគរយប៉ុណ្ណោះ៕ អត្ថបទ៖ គុជ វិភាគ