អាមេរិក៖ កាលពីថ្ងៃចន្ទម្សិលមិញ រដ្ឋមន្ត្រីការបរទេសសហរដ្ឋអាមេរិក លោក អាន់ថូនី ប្ល៊ីនគិន បានប្រកាសទណ្ឌកម្មថ្មីទៅលើសមាជិកយោធាមីយ៉ាន់ម៉ា សម្រាប់វិធានការបង្ក្រាបរបស់ពួកគេ មកលើបាតុកម្មគាំទ្រលទ្ធិប្រជាធិបតេយ្យ ចាប់តាំងពីយោធាបានរឹបអូសអំណាច ពីរដ្ឋាភិបាលស៊ីវិលរបស់លោកស្រី អ៊ុងសាន ស៊ូជី កាលពីថ្ងៃទី១ ខែកុម្ភៈ ឆ្នាំ២០២១ កន្លងទៅ។
ទណ្ឌកម្មនេះដែរគឺជាទណ្ឌកម្មលើកទី២ ហើយដែលសហរដ្ឋអាមេរិកបានប្រកាសកាលពីថ្ងៃចន្ទ ដោយមានការសម្របសម្រួលជាមួយប្រទេសសម្ព័ន្ធមិត្ត។ នៅថ្ងៃនោះដែរ សហរដ្ឋអាមេរិក និងសហភាពអឺរ៉ុប បានប្រកាសទណ្ឌកម្មសិទ្ធិមនុស្សមកលើចិន សម្រាប់ការគាបសង្កត់ជនមូស្លីមអ៊ូហ្គួរនៅខេត្តហ្ស៊ីនជាំង។ លោក ប្ល៊ីនគិន បាននិយាយថា សហរដ្ឋអាមេរិកបន្តអំពាវនាវឲ្យរបបសឹកសហភាពមីយ៉ាន់ម៉ា ដោះលែងអ្នកទាំងឡាយណាដែលត្រូវបានគេឃាត់មិនត្រឹមត្រូវ បញ្ឈប់ការវាយប្រហារមកលើសមាជិកសង្គមស៊ីវិល ក្រុមអ្នកសារព័ត៌មាន ក្រុមសហជីព បញ្ឈប់ការសម្លាប់យ៉ាងឃោរឃៅដោយកងកម្លាំងសន្តិសុខ និងប្រគល់អំណាចឲ្យរដ្ឋាភិបាលឈ្នះឆ្នោតវិញ។
គួរឲ្យដឹងថា ក្រុមបាតុករនៅតាមតំបន់មួយចំនួនទៀត ត្រូវបានចូលរួមផងដែរដោយព្រះសង្ឃកាន់ទៀន ខណៈដែលក្រុមបាតុករប្រើប្រាស់ទៀន ធ្វើជារូបនិមិត្តសញ្ញាម្រាមដៃបី។ ចំនួនមនុស្សស្លាប់ពាក់ព័ន្ធនឹងការធ្វើបាតុកម្មនៅមីយ៉ាន់ម៉ា ចាប់តាំងពីរដ្ឋប្រហារកាលពីថ្ងៃទី១ ខែកុម្ភៈ ឆ្នាំ២០២១ កន្លងទៅបានកើនឡើងដល់ ២៥៤នាក់គិតត្រឹមល្ងាចថ្ងៃចន្ទ ក្រោយមនុស្ស ៤នាក់បន្ថែមទៀតបានស្លាប់ ដែលរួមទាំងកុមារអាយុ ១៣ឆ្នាំម្នាក់ផងដែរ ដែលត្រូវបានកងកម្លាំងបាញ់សម្លាប់នៅទីក្រុងធំទី២ ម៉ាន់ដាឡេ៕
អត្ថបទ៖ សារ៉ាត់
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
