សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានមានប្រសាសន៍បញ្ជាក់ថា រាជរដ្ឋាភិបាលបានសិក្សាដាក់ចេញ «កម្មវិធីអន្តរាគមន៍គ្រប់ជ្រុងជ្រោយ ឆ្លើយតបនឹងសភាពការណ៍ពហុវិបត្តិ» ក្នុងនោះ រដ្ឋចំណាយថវិកាជិត ៥០០លានដុល្លារអន្តរាគមន៍ថ្លៃភ្លើង និងប្រេងឥន្ធនៈ ដើម្បីកុំឱ្យថ្លៃភ្លើង និងប្រេងឡើងថ្លៃបង្កផលប៉ះពាល់ដល់ជីវភាពប្រជាពលរដ្ឋ។

សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់បែបនេះ ក្នុងឱកាស អញ្ជើញអបអរសាទរខួប៨០ឆ្នាំ ថ្ងៃបង្កើតសាកលវិទ្យាល័យវិទ្យាសុខាភិបាល, សម្ពោធអគារសិក្សាថ្មី និងប្រគល់សញ្ញាបត្រជូននិស្សិត នៅព្រឹកថ្ងៃពុធ ថ្ងៃទី៧ ខែតុលា ឆ្នាំ២០២៦នេះនៅ OCIC។

សម្តេចធិបតី បានថ្លែងថា រាជរដ្ឋាភិបាលបានសិក្សាដាក់ចេញ «កម្មវិធីអន្តរាគមន៍គ្រប់ជ្រុងជ្រោយ ឆ្លើយតបនឹងសភាពការណ៍ពហុវិបត្តិ» ជាមួយគោលបំណងចំនួន ៤ គឺៈ ទី១. រក្សាលំនឹងជីវភាពរបស់ប្រជាជនគោលដៅ រួមមាន ប្រជាជនក្រីក្រ, គ្រួសារងាយរងហានិភ័យ, កសិករ, ពលករទេសន្តរប្រវេសន៍, គ្រួសារភៀសសឹក, និង អ្នកប្រកបរបររត់រ៉ឺម៉កកង់បី ជាដើម; ទី២. លើកកម្ពស់សហគ្រាសធុនមីក្រូ តូច និង មធ្យម, ទាំងក្នុងប្រព័ន្ធ និង ក្រៅប្រព័ន្ធ; ទី៣. លើកកម្ពស់ ការអភិវឌ្ឍជំនាញ, បង្កើតមុខរបរ និងពង្រីកឱកាសការងារ និង ទី៤. ពង្រឹងការគ្រប់គ្រង និង ជំរុញការធ្វើអន្តរកម្ម ព្រមទាំង ការបំប្លែងថាមពល។

សម្ដេចធិបតីបានថ្លែងថា៖«ថវិកាជិត ៥០០លានដុល្លារ ត្រូវបានរាជរដ្ឋាភិបាលបញ្ចេញអន្តរាគមន៍ថ្លៃភ្លើង និងប្រេងឥន្ធនៈក្នុងពេលប្រេងឡើងថ្លៃ»។

សូមជម្រាបថា ផលប៉ះពាល់ពីការកើនឡើងនូវតម្លៃប្រេងឥន្ធនៈ បើគ្មានការអន្តរាគមន៍បញ្ចេញកញ្ចប់ថវិការដ្ឋជួយទប់ ឬការកាត់បន្ថយពន្ធអាករពីរដ្ឋទេនោះ ថ្លៃប្រេងឥន្ធនៈនៅលើទីផ្សារកម្ពុជាអាចនឹងហក់ឡើងខ្ពស់ជាងតម្លៃបច្ចុប្បន្នពី ៩% ទៅ ១០% បន្ថែមទៀត។ ខណៈផ្អែកលើការប្រែប្រួលតម្លៃប្រេងនៅលើទីផ្សារតំបន់ និងអន្តរជាតិ រដ្ឋនៅតែបន្តឧបត្ថម្ភធនបញ្ចុះតម្លៃ ៦.៥ សេនដុល្លារក្នុងមួយលីត្រ ដើម្បីកាត់បន្ថយបន្ទុកចំណាយ និងសម្រួលដល់ជីវភាពរស់នៅប្រចាំថ្ងៃរបស់ប្រជាពលរដ្ឋ៕