សម្ដេច​មហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានណែនាំសមត្ថកិច្ចបន្តចុះទប់ស្កាត់ការប្រើប្រាស់បារីអេឡិចត្រូនិក និងហាមវិនិយោគនៅកម្ពុជា ខណៈបច្ចុប្បន្ន​សន្ទុះនៃការ​ប្រើប្រាស់មានការ​ងើបឡើងវិញពីសំណាក់យុវជន​។

សម្ដេច​ធិបតី នាយករដ្ឋមន្រ្ដី មានប្រសាសន៍បញ្ជាក់បែបនេះ ក្នុងឱកាស អញ្ជើញអបអរសាទរខួប៨០ឆ្នាំ ថ្ងៃបង្កើតសាកលវិទ្យាល័យវិទ្យាសុខាភិបាល, សម្ពោធអគារសិក្សាថ្មី និងប្រគល់សញ្ញាបត្រជូននិស្សិត នៅព្រឹកថ្ងៃពុធ ​ថ្ងៃទី៧ ខែតុលា ឆ្នាំ២០២៦នេះនៅ OCIC។​

ក្នុងឱកាសនោះ សម្ដេច​ធិបតី ណែនាំឱ្យសមត្ថកិច្ចពាក់ព័ន្ធបន្តរឹតបន្តឹងលើសកម្មភាពទិញ លក់​បារីអេឡិចត្រូនិច ខណៈឥឡូវនេះសន្ទុះប្រើប្រាស់ បារីអេឡិចត្រូនិកហាក់មានសន្ទុះការ​ប្រើប្រាស់ពីយុវជនឡើងវិញ។ សម្ដេច​បន្តថា កន្លងទៅរដ្ឋាភិបាលបានដាក់ចេញវិធានការ​មួយចំនួនហើយ​ដើម្បីប្រឆាំង ហាមឃាត់​ការ​ប្រើប្រាស់ និងបញ្ឈប់ការលក់​បារីអេឡិចត្រូនិកនេះនៅកម្ពុជា​។ 

សម្ដេច​ធិបតីបានថ្លែងថា៖«ពាក់ព័ន្ធបន្តរឹតបន្តឹង បារីអេឡិចត្រូនិក (Vape) ឥឡូវនេះ សន្ទុះប្រើប្រាស់ បារីអេឡិចត្រូនិកហាក់មានសន្ទុះការប្រើប្រាស់ពីយុវជនឡើងវិញ។ កន្លងទៅរដ្ឋាភិបាលបានដាក់ចេញវិធានការមួយចំនួនហើយដើម្បីហាមឃាត់ការប្រើប្រាស់ និងបញ្ឈប់ការលក់បារីអេឡិចត្រូនិកនេះនៅកម្ពុជា»។ 

សម្តេចធិបតី ក៏បានប្រកាសជំហរយ៉ាងម៉ឺងម៉ាត់ ហាមឃាត់ជាដាច់ខាតមិនឱ្យមានការវិនិយោគបង្កើតរោងចក្រផលិតបារីអេឡិចត្រូនិក (Vape) ឬការដាំកញ្ឆានៅក្នុងប្រទេសកម្ពុជាឡើយ ទោះបីជាការផលិតនោះធ្វើឡើងក្នុងគោលបំណងនាំចេញទៅក្រៅប្រទេស ឬប្រើប្រាស់ក្នុងវិស័យវេជ្ជសាស្ត្រក៏ដោយ៕